ភ្នំពេញ៖ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានផ្ញើព្រះរាជសាររំលែកទុក្ខប្រជាជនឥណ្ឌា ដែលកំពុងរងគ្រោះដោយសារការរាតត្បាតជំងឺកូវីដ-១៩។

 

«វាជារឿងសោកសៅបំផុត ដែលខ្ញុំទទួលបានព័ត៌មានពីស្ថានភាពការរាតត្បាតជំងឺកូវីដ-១៩ នៅប្រទេសឥណ្ឌា ដែលបណ្ដាលឱ្យប្រជាជនឥណ្ឌា បាត់បង់ជីវិតដ៏ច្រើនសន្ធឹកសន្ធាប់នេះ»។ នេះជាព្រះរាជបន្ទូលរបស់ ព្រះមហាក្សត្រនរោត្តម សីហមុនី ដែលបានផ្ញើព្រះរាជសាររំលែកទុក្ខទៅកាន់លោក Devyani Khobragade អគ្គរដ្ឋទូតឥណ្ឌាប្រចាំកម្ពុជាថា៖«នៅក្នុងកាលៈទេសៈដ៏គ្រោះថ្នាក់នេះ ខ្ញុំសូមចូលរួមរំលែកទុក្ខ និងអារម្មណ៍សោកសង្រែង ដោយស្មោះអស់ពីចិត្ត ចំពោះឯកឧត្តម និងប្រជាជនឥណ្ឌា»។
 

ព្រះមហាក្សត្រ មានព្រះរាជសង្ឃឹមថា ប្រជាជនឥណ្ឌា នឹងអាចរួចផុតពីទុក្ខលំបាកនៃជំងឺកូវីដ-១៩នេះ តាមរយៈការខិតខំប្រឹងប្រែងរបស់អាជ្ញាធរឥណ្ឌា ក្នុងការអនុវត្តវិធានការទប់ស្កាត់ និងដោះស្រាយការរាតត្បាតនៃជំងឺកាចសាហាវនេះ ប្រកបដោយភាពជោគជ័យ។