ជាតិ
រូបភាពទិដ្ឋភាពសិស្សានុសិស្សប្រឡងសញ្ញាបត្រមធ្យមសិក្សាទុតិយភូមិនៅឆ្នាំ២០១៧
×![]()
ភ្នំពេញ៖ ក្រសួងអប់រំ យុវជន និងកីឡា បានអនុញ្ញាតឲ្យគ្រឹះស្ថានសិក្សាឯកជនទាំងអស់ រៀបចំការប្រឡងបញ្ចប់ថា្នក់ទី៦ និងថ្នាក់ទី៩ នៅតាមគ្រឹះស្ថានសិក្សារៀងៗខ្លួន។ នេះបើតាមលិខិតក្រសួងអប់រំ ដែលឆ្លើយតាមសំណើរបស់ប្រធានគណៈប្រតិបត្តិសមាគមគ្រឹះស្ថានឧត្តមសិក្សាកម្ពុជា នៅថ្ងៃទី៣ ខែមិថុនា ឆ្នាំ២០២១។ 
លោក ហង់ ជួន ណារ៉ុន បានបញ្ជាក់ក្នុងលិខិតថា ក្រសួងអប់រំនឹងផ្តល់ការទទួលស្គាល់ចំពោះលទ្ធផលនៃការប្រឡងបញ្ចប់ថ្នាក់ទី៦ និងថ្នាក់ទី៩ របស់គ្រឹះស្ថានសិក្សាឯកជន និងធ្វើអធិការកិច្ច ប្រសិនបើចំាបាច់។
ទាក់ទងនឹងព័ត៌មានលម្អិតពីដំណើរការរៀបចំបញ្ចប់ថ្នាក់ទី៦ និងទី៩របស់គ្រឹះស្ថានសិក្សាឯកជន លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា ក្រសួងអប់រំនឹងចេញសេចក្តីប្រកាសនៅថ្ងៃខាងមុខ។
«នាពេលខាងមុខ ឆាប់ៗនេះ ក្រសួងនឹងចេញសេចក្តីណែនាំស្តីពីការរៀបចំ និងការប្រព្រឹត្តទៅនៃការប្រឡងសញ្ញាបត្រមធ្យមសិក្សាបឋមភូមិ នៅតាមគ្រឹះស្ថានសិក្សាឯកជន សម្រាប់ឆ្នាំសិក្សា២០២០-២០២១»។ នេះជាការលើកឡើងរបស់អ្នកនាំពាក្យក្រសួងអប់រំ យុវជន និងកីឡា។
កាលពីថ្ងៃទី២៨ ខែឧសភា ឆ្នំា២០២១ លោក លី ឆេង ប្រធានសមាគមគ្រឹះស្ថានឧត្តមសិក្សាកម្ពុជា បានស្នើសុំឲ្យក្រសួងអប់រំ យុវជន និងកីឡាអនុញ្ញាតឲ្យគ្រឹះស្ថានសិក្សាឯកជនរៀបចំការប្រឡងបញ្ចប់ថ្នាក់ទី៦ ទី៩ និងទី១២ទៅតាមសាមីគ្រឹះស្ថានសិក្សារៀងៗគ្នា។
ទាក់ទងនឹងសំណើនេះ លោក ហេង វ៉ាន់ដា ប្រធានក្រុមប្រឹក្សាភិបាលនៃសមាគមគ្រឹះស្ថានឧត្តមសិក្សាបានបញ្ជាក់មូលហេតុដែលប្រធានសមាគមគ្រឹះស្ថានឧត្តមសិក្សាកម្ពុជាដាក់សំណើនេះទៅក្រសួងអប់រំដូច្នេះថា៖«សាលារៀនឯកជន បើកាលណាមិនឲ្យប្រឡង។ អ៊ីចឹងរង់ចំាដូចសាលារៀន ការប្រឡងឌីប្លូម និងបាក់ឌុបនឹងដាច់មួយកង់ កូនសិស្សនៅទំនេរច្រើន។ បើសិនយើងមិនព្រមឲ្យសាលាឯកជនប្រឡងទេ ទីមួយលុយកក់ និរន្តភាពលុយកក់ ហើយកាលបរិច្ឆេទរៀនហ្នឹងគឺវាដាច់មួយកង់»។
ក្រោមហេតុផលខាងលើនេះ ទើបប្រធានសមាគមគ្រឹះស្ថានឧត្តមសិក្សាកម្ពុជា សម្រេចចិត្តស្នើក្រសួងអប់រំ អនុញ្ញាតឲ្យគ្រឹះស្ថានសិក្សាឯកជនរៀបចំការប្រឡងតាមបែបប្រព័ន្ធបច្ចេកវិទ្យា ដើម្បីចូលរួមទប់ស្កាត់ជំងឺកូវីដ-១៩៕
Tag:
គ្រឹះស្ថានសិក្សា
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
