ភ្នំពេញ៖ ប្រាសាទផ្ទី ដែលស្ថិតនៅចំកណ្តាលបារាយណ៍នៃប្រាសាទបេងមាលា ក្នុងខេត្តសៀមរាបបានបញ្ចប់ការជួសជុលនៅថ្ងៃទី០១ ខែមិថុនា ឆ្នាំ២០២១។ នេះបើតាមហ្វេសប៊ុកអាជ្ញាធរជាតិអប្សរាចេញផ្សាយថ្ងៃទី០១ ខែមិថុនា នេះ។

 

ប្រាសាទផ្ទី ត្រូវបានធ្វើកំណាយពិនិត្យរចនាសម្ពន្ធប្រាសាទកាលពីដើមខែមីនា និងបានចាប់ផ្តើមជួសជុលនៅខែមេសា។ ក្នុងដំណើរការជួសជុលនេះ មានការចូលរួមឧបត្ថម្ភដោយវិស័យឯកជន ក្នុងបំណងដើម្បីចូលរួមអភិរក្សមរតកសម្បត្តិបេតិកភណ្ឌជាតិ។
 

លោក គឹម សុធិន អគ្គនាយករងអាជ្ញាធរជាតិអប្សរា លើកឡើងថា ក្នុងដំណើរការជួសជុលនេះ ក្រុមការងារអាជ្ញាធរជាតិអប្សរាមានការលំបាកបន្ដិច ដោយសារការដ្ឋានស្ថិតនៅកណ្ដាលបារាយណ៍ក្នុងព្រៃ និងមានផ្លូវធ្វើដំណើរតូចបន្ដិច ដែលពិបាកក្នុងការដឹកជញ្ជូនថ្មតាមរថយន្តធុនធ្ងន់។ ដ្បិតដំណើរការជួសជុលលំបាកបន្តិច តែលោកបានបង្ហាញសុទិដ្ឋិនិយម និងអារម្មណ៍រីករាយជាខ្លាំងជាមួយសមិទ្ធផលថ្មីនេះ ពិសេសប្រាសាទដែលដួលរលំឃើញតែគំនរដុំថ្ម ហើយបានខិតខំរកផ្គុំឱ្យមានរូបរាងឡើងវិញ។
 

ប្រាសាទនេះ ស្ថិតនៅភូមិបេងមាលា ឃុំបេងមាលា ស្រុកស្វាយលើ ត្រូវបានសាងសង់អំពីថ្មបាយក្រៀមរាងការេ ប្រវែង១៥ម៉ែត្របួនជ្រុង និងមានជញ្ជាំងព័ន្ធជុំវិញកម្ពស់ ១ម៉ែត្រ។ នៅចំកណ្តាលប្រាសាទ មានតម្កល់រូបព្រះពុទ្ធប្រក់នាគសរុបទាំងខឿនកម្ពស់ ៦,៥ម៉ែត្រ ធ្វើអំពីភក់ ដែលទំនងជាសាងសង់រវាងពាក់កណ្តាលសតវត្សទី១២ ទៅចុងសតវត្សទី១២៕