មួយរយៈចុងក្រោយនេះ ករណីឆ្លង និងស្លាប់នៅទ្វីបអាហ្វ្រិក បានហក់ឡើងប្រមាណ ៤០ភាគរយ។ ករណីឆ្លងសរុបនៅក្នុងទ្វីបមួយនេះ មានចំនួនជាង ៥លានករណី និងអ្នកស្លាប់មានចំនួនជាង ១៣ម៉ឺននាក់។ ម្យ៉ាងវិញទៀត បណ្តាប្រទេសអាហ្រ្វ៊ិក មិនសូវទទួលបានវ៉ាក់សាំងបង្ការជំងឺកូវីដ-១៩ គ្រប់គ្រាន់សម្រាប់ចាក់ឱ្យប្រជាជនខ្លួនឡើយ។ 

 

ទាក់ទិននឹងបញ្ហានេះ អង្គការសុខភាពពិភពលោក បានប្រកាសពីការរៀបចំបង្កើតមជ្ឈមណ្ឌលផ្ទេរបច្ចេកវិទ្យាសម្រាប់ផលិតវ៉ាក់សាំងបង្ការជំងឺកូវីដ-១៩ ដើម្បីចែកចាយនៅទូទាំងទ្វីប។ 

 

«ថ្ងៃនេះ ខ្ញុំពិតជាសោមនស្ស ក្នុងការប្រកាសថា អង្គការ WHO កំពុងពិភាក្សាជាមួយក្រុមហ៊ុន និងវិទ្យាស្ថានមួយចំនួន ដើម្បីបង្កើតមជ្ឈមណ្ឌលផលិតវ៉ាក់សាំងនៅក្នុងទ្វីបអាហ្រ្វ៊ិក»។ លោក Tedros Adhanom Ghebreyesus អគ្គនាយកអង្គការសុខភាពពិភពលោក បានលើកឡើងបែបនេះ នៅក្នុងសន្និសីទសារព័ត៌មានមួយ នៅថ្ងៃទី២១ ខែមិថុនា។ 

 

បើតាមប្រមុខអង្គការសុខភាពិភពលោករូបនេះ ក្នុងចំណោមក្រុមហ៊ុនទាំងនោះ ក្រុមហ៊ុន Afrigen Biologics & Vaccines នឹងផលិតវ៉ាក់សាំងផង និងហ្វឹកហ្វឺនក្រុមហ៊ុន Biovac ផង។ ក្រុមហ៊ុនមួយនេះ នឹងផលិតវ៉ាក់សាំងប្រើប្រាស់បច្ចេកវិទ្យានាំសារ  mRNA។ 

 

ស្របគ្នាដែរ ប្រធានអ្នកវិទ្យាសាស្រ្តអង្គការ WHO លោកស្រី Soumya Swaminathan បានបង្ហាញថា វាមានជម្រើស ៤ ឬ៥ក្រុមហ៊ុន ប៉ុន្តែភាគច្រើនមានតែក្រុមហ៊ុនតូចៗប៉ុណ្ណោះ ខណៈពេល ការចរចាជាមួយក្រុមហ៊ុនធំៗ កំពុងដំណើរការ។ ក្នុងន័យនេះ ប្រធានអ្នកវិទ្យាសាស្រ្ត សង្ឃឹមថា ក្រុមហ៊ុនទាំងនោះ នឹងចូលរួមក្នុងការរៀបចំផលិតវ៉ាក់សាំងនៅអាហ្រ្វ៊ិកខាងត្បូង។ គម្រោងក្នុងការផលិតវ៉ាក់សាំងនេះ នឹងរួចរាល់ក្នុងរយៈពេលពី ៩ខែ ទៅ១២ខែខាងមុខ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

 

ក្រុមហ៊ុនធំៗ ដែលផលិតវ៉ាក់សាំងប្រើប្រាស់បច្ចេកវិទ្យានាំសារ មានដូចជា ក្រុមហ៊ុនអាមេរិក Pfizer, ក្រុមហ៊ុនអាល្លឺម៉ង់ BioNTech, និងក្រុមហ៊ុនអាមេរិក Moderna ជាដើម។ 

 

បន្ទាប់ពីសេចក្តីប្រកាសខាងលើ ប្រធានាធិបតីអាហ្រ្វិកខាងត្បូង លោក Cyril Ramaphosa បានសាទរចំពោះដំណឹងដ៏ល្អមួយនេះ ព្រោះវាជួយទ្វីបអាហ្វ្រិក ក្នុងការប្រយុទ្ធប្រឆាំងជាមួយជំងឺឆ្លងសកល។ បើទោះមានការផ្ទេរបច្ចេកវិទ្យាមកផលិតនៅអាហ្រ្វិកខាងត្បូងក្តី ប្រធានាធិបតីរូបនេះ បានបន្តជំហររបស់ខ្លួន នៅតែមិនបោះបង់ការគាំទ្រឱ្យលុបចោលប៉ាតង់ (ប្រកាសនីយបត្រតក្កកម្ម) វ៉ាក់សាំងប្រឆាំងជំងឺកូវីដ-១៩ ឡើយ។

 

សូមបញ្ជាក់ថា វ៉ាក់សាំងប្រភេទ mRNA ជាវ៉ាក់សាំងប្រភេទថ្មី ដែលបង្កឡើងដើម្បីប្រឆាំងនឹងជំងឺឆ្លង។ ខុសពីវ៉ាក់សាំងផ្សេង ដែលផ្សំចេញបំណែកវីរុសអសកម្ម វ៉ាក់សាំ ងmRNA ធ្វើឱ្យកោសិកាបណ្តុះប្រូតេអ៊ីន ដើម្បីបង្កើតប្រព័ន្ធភាពស៊ាំប្រឆាំងនឹងវីរុស។ វ៉ាក់សាំងប្រភេទនេះ មានប្រសិទ្ធភាពរហូតដល់ ៩៥ភាគរយ ក្នុងការប្រឆាំងនឹងជំងឺកូវីដ-១៩៕