ក្នុងផលិតកម្មចិញ្ចឹមគោ ក្របី កម្ពុជាតែងជួបប្រទះជំងឺឆ្លងសំខាន់ពីរគឺជំងឺសារទឹក និងជំងឺអុតក្តាម។ ក្រសួងកសិកម្ម បានលើកឡើងពីវិធានការសំខាន់ៗ ក្នុងការទប់ស្កាត់ តាមរយៈការចាក់ថ្នាំការពារ ការព្យាបាលសត្វឈឺតាមលទ្ធភាព  វិធានការចត្តាឡីស័ក និងវិធានការជីវសុវត្ថិភាព។

 

 រដ្ឋមន្រ្តីកសិកម្ម បានបង្ហាញពីគម្រោងផលិតវ៉ាក់សាំងការពារជំងឺសត្វ បន្ទាប់ពីសត្វគោ ក្របី ក្នុងស្រុក កាន់តែឆ្លងរាលដាល នូវជំងឺសារទឹក និងជំងឺអុតក្ដាម។ កន្លងមក រដ្ឋាភិបាលចិន បានផ្ដល់វ៉ាក់សាំងការពារជំងឺសារទឹក និងជំងឺអុតក្ដាម ដល់កម្ពុជាចំនួន២០ម៉ឺនដូស រួចមកហើយ។

 

តបនឹងសំណើរបស់ក្រសួងកសិកម្មកម្ពុជា រដ្ឋាភិបាលចិន សន្យាផ្ដល់បច្ចេកទេសផលិតវ៉ាក់សាំងការពារជំងឺសត្វដល់កម្ពុជា ក្រោយជំងឺកូវីដ-១៩ បានថមថយ។ ការផ្ដល់វ៉ាក់សាំង ការពារ សត្វគោ ក្របីនៅកម្រិត តែការរាតត្បាតនៃជំងឺសារទឹក និងជំងឺអុតក្ដាម មិនទាន់ថមថយ  ដូច្នេះទើបកម្ពុជា ស្នើដល់ភាគីចិន ផ្ដល់នូវបច្ចេកទេស ក្នុងការផលិតវ៉ាក់សាំងការពារជំងឺសត្វ ដល់កម្ពុជា។

 

លោក វេង សាខុន បានរៀបរាប់ដូច្នេះ៖«ភាគីចិនបានគាំទ្រលើសំណើរបស់កម្ពុជា ដែលមានឆន្ទៈចង់ផលិតវ៉ាក់សាំងដោយខ្លួនឯង ក្រោមជំនួយឧបត្ថម្ភបច្ចេទេសពីភាគីចិន។ ករណីនេះ ភាគីចិននឹងចុះមកសិក្សាផ្ទាល់ ក្រោយស្ថានភាពកូវីដ-១៩ បានល្អប្រសើរ»។

 

បច្ចុប្បន្ន វ៉ាក់សាំងការពារជំងឺសារទឹក លើសត្វគោ ក្របី ដែលក្រសួងកសិកម្ម ចាក់ឲ្យសត្វគោ ក្របី បានចំនួន ៣០ភាគរយ និងវ៉ាក់សាំងការពារជំងឺអុតក្ដាម ទើបបាន ២ភាគរយប៉ុណ្ណោះ ក្នុងចំណោមសត្វគោ ក្របី ៣លានក្បាល ទូទាំងប្រទេស ។ 

 

ចំពោះវ៉ាក់សាំងការពារជំងឺសារទឹក និងជំងឺអុតក្ដាម លើសត្វគោ ក្របី ដែលរដ្ឋាភិបាលចិន ផ្ដល់ឲ្យកម្ពុជាកន្លងមក ក្រសួងកសិកម្ម ​កំពុងអនុវត្តនៅតាមបណ្តាខេត្ត ចំនួន១២ ដែលមានផ្ទុះជំងឺនេះច្រើនជាងគេ។ ខេត្តទាំងនោះមាន ខេត្តព្រៃវែង,កំពង់ចាម,តាកែវ,សៀមរាប,ព្រះវិហារ,ឧត្តរមានជ័យ,បន្ទាយមានជ័យ,បាត់ដំបង,រតនគីរី,ត្បូងឃ្មុំ,កំពង់ឆ្នាំង និងពោធិ៍សាត់៕