ភ្នំពេញ៖ រយៈពេល៦ខែ ឆ្នាំ២០២១នេះ មានករណីគ្រោះថ្នាក់ចរាចរណ៍ទូទាំងប្រទេស ចំនួន១,២៦១ករណី ដែលបណ្តាលឲ្យមនុស្សស្លាប់ និងរបួសធ្ងន់ ២ពាន់នាក់។
របាយការណ៍ក្រសួងមហាផ្ទៃ ចេញផ្សាយនៅថ្ងៃទី៩ កក្កដានេះ បានបង្ហាញថា គ្រោះថ្នាក់ចរាចរណ៍ ៦ខែនេះ ថយចុះ៣៥៨ករណី ស្មើនឹង២២ភាគរយ បើធៀបទៅនឹង រយៈពេលដូចគ្នា នៅឆ្នាំមុន។ ចំណែកអ្នកស្លាប់ ២០៩នាក់ នៅ៦ខែនេះ ក៏ថយចុះ១៥២នាក់ ស្មើនឹង១៨ភាគរយ បើប្រៀបធៀបនឹង៦ខែដូចគ្នា។ ចំពោះអ្នករងរបួស១៧៩២នាក់ ក្នុងនោះរបួសធ្ងន់១០៤៦នាក់ ក៏ថយចុះ៦៥៧នាក់ ឬស្មើនឹង២៧ភាគរយ ដែរ។
បើតាមរបាយការណ៍ ការបើកបរលើសល្បឿនកំណត់,បើកបរមិនគោរពច្បាប់ចរាចរណ៍, ការបើកបរមិនប្រកាន់ស្តាំ,ការបើកបរវ៉ាប្រជែងគ្នា,បើកបរទាំងស្រវឹង និងងងុយ គឺសុទ្ធតែជាដើមហេតុនាំឲ្យកើតមានហេតុការណ៍គ្រោះថ្នាក់ចរាចរណ៍។
រយៈពេល៦ខែឆ្នាំនេះ សមត្ថកិច្ចក៏បានត្រួតពិនិត្យ និងផាកវិន័យនូវយានយន្តចំនួនជាង១០ម៉ឺនគ្រឿង។ ក្នុងនោះម៉ូតូមានជាង៧,៧ម៉ឺនគ្រឿង ដោយ៩០ភាគរយ ជាអ្នកមិនពាក់មួកសុវត្ថិភាព, ៧ភាគរយល្មើសសញ្ញាចរាចរណ៍, ២ភាគរយគ្មានផ្លាកលេខ, ២ភាគរយបើកបរដោយប្រើទូរសព្ទ និង១ភាគរយបើកបរទាំងស្រវឹង។ នេះបើតាមរបាយការណ៍ដដែល។
រីឯរថយន្តល្មើសជាង២,៨ម៉ឺនគ្រឿង ដោយល្មើសល្បឿន១៦ភាគរយ, ១០ភាគរយប្រើទូរសព្ទ, ៥២ភាគរយបើកបរមិនប្រើខ្សែក្រវ៉ាត់សញ្ញាចរាចរណ៍៧ភាគរយ, គ្មានផ្លាកលេខ៥ភាគរយ, ល្មើសចំណុះ ៤ភាគរយ,បណ្ណបើកបរ៤ភាគរយ, ស្រវឹង១ភាគរយ, ឆៀក១ភាគរយ និងអាជីវកម្ម១ភាគរយ។
តាមរបាយការណ៍ដដែល រយៈពេល៦ខែនេះ ភូមិសាស្ត្រដែលមានអត្រាគ្រោះថ្នាក់ចរាចរណ៍ច្រើន គឺរាជធានីភ្នំពេញ កណ្តាល ស្វាយរៀង កំពង់ឆ្នាំង កំពង់ស្ពឺ និងតាកែវ។
សម្តេច ស ខេង រដ្ឋមន្ត្រីក្រសួងមហាផ្ទៃ បានអំពាវនាវដល់អ្នកបើកបរគោរពច្បាប់ចរាចរណ៍ និងមានស្មារតីប្រុងប្រយ័ត្នចំពោះការបើកបរ ដើម្បីជៀសផុតពីការគ្រោះថ្នាក់ចរាចរណ៍កើតឡើងជាយថាហេតុណាមួយ។
«បើស្រលាញ់អាយុជីវិតអ្នក និងក្រុមគ្រួសារអ្នក ព្រមទាំងគោរពជីវិត និងសេចក្ដីសុខអ្នកដទៃ សូមរួមគ្នាគោរពច្បាប់ឱ្យបានល្អ។ នៅពេលយើងគ្រប់គ្នាគោរពច្បាប់បានល្អ នោះនឹងធ្វើឱ្យស្ថានភាពចរាចរណ៍នៅក្នុងប្រទេសយើងមានភាពល្អប្រសើរ កាត់បន្ថយបានអ្នកស្លាប់ របួស ពិការ ការខាតបង់ថវិកា និងទ្រព្យសម្បត្តិ ព្រមទាំងរួមចំណែកលើកតម្កើងកិត្តិយសជាតិផងដែរ»។ នេះជាការលើកឡើងរបស់រដ្ឋមន្ត្រីក្រសួងមហាផ្ទៃ។
សូមបញ្ជាក់ថា ក្នុងឆ្នាំ២០២០ អ្នកស្លាប់ដោយសារគ្រោះថ្នាក់ចរាចរណ៍ មាន១,៦៤៦នាក់ បើធៀបនឹងឆ្នាំ២០១៩ មាន១៩៨១នាក់ គឺថយចុះជាង១៧ភាគរយ។ ចំណែក អ្នករងរបួសឆ្នាំ២០២០ មាន៤៦៨៦នាក់ បើធៀបនឹងឆ្នាំ២០១៩មាន៦១៤១នាក់ គឺថយចុះជាង២៤ភាគរយ៕