នាជំនួបវគ្គពាក់ណ្តាល ប្រេស៊ីលបានយកឈ្នះប៉េរូ ១-០ រីឯអាហ្សង់ទីន ឈ្នះ កូឡុំប៊ី ៣-១ ដោយការទាត់ប៉េណាល់ទី ក្រោយលទ្ធផលស្មើ ១-១។ កូឡុំប៊ី បានលេខ៣ បន្ទាប់ពី បានយកឈ្នះ ប៉េរូ ៣-២។

 

សម្រាប់ការប្រជែងពាននេះ ប្រេស៊ីល ត្រូវការពារតំណែងជើងឯករបស់ខ្លួន ខណៈកាលពីឆ្នាំ២០១៩ ពួកគេបានយកឈ្នះ ប៉េរូ ៣-១ នៅវគ្គផ្តាច់ព្រ័ត្រ រីឯអាហ្សង់ទីន ឈ្នះ ស៊ីលី ២-១ ក្នុងជំនួបដណ្តើមយកលេខ៣។

 

នេះក៏ជាការប៉ះគ្នាផងដែររវាងអតីតមិត្តរួមក្រុម Barcelona ទាំងពីរ Neymar-Messi។ Neymar ព្យាយាមដណ្តើមឲ្យបានពានដំបូងសម្រាប់ជម្រើសជាតិរបស់ខ្លួន ខណៈក្រុមទាំងពីរ ត្រូវជួបគ្នានៅវគ្គផ្តាច់ព្រ័ត្រសារជាថ្មី បើគិតចាប់តាំងពីឆ្នាំ២០០៧មក ដែលកាលណោះ ប្រេស៊ីលឈ្នះ ៣-០។

 

Lionel Messi ធ្លាប់ឈ្នះពាន La Liga ១០លើក Champions League ៤លើក ប៉ុន្តែម្ចាស់ពាន Ballon d’Or ៦លើករូបនេះ ធ្លាប់បានពានជាមួយអាហ្សង់ទីន នាអូឡាំពិកឆ្នាំ២០០៨ នៅចិន តែម្តងប៉ុណ្ណោះ។

 

បើគិតចាប់តាំងពីឆ្នាំ១៩១៦មក អ៊ុយរូហ្គាយឈ្នះជើងឯកដល់ទៅ១៥លើក រីឯអាហ្សង់ទីន បាន១៤លើក ប្រេស៊ីលបាន៩លើក ប៉ារ៉ាហ្កាយ ស៊ីលី និងប៉េរូ បាន២លើក ខណៈកូឡុំប៊ី និងបូលីវី ធ្លាប់បាន១លើក៕