កញ្ញា សៅ សុខអេង៖ ជាម្ចាស់ពានរង្វាន់នាយកសាលាឆ្នើមប្រចាំឆ្នាំ អមដោយថវិកា៧លានរៀល តើពានរង្វាន់នេះ មានតម្លៃយ៉ាងណាដែរចំពោះលោកគ្រូផ្ទាល់?

 

លោក អឿម ឃឿម៖ ពានរង្វាន់នេះ ពិតជាមានតម្លៃធំធេងណាស់សម្រាប់រូបខ្ញុំ រួមទាំង សម្រាប់ លោកគ្រូអ្នកគ្រូនៅវិទ្យាល័យនេតយ៉ង់នេះ។ វាក៏ជាមុខមាត់មួយសម្រាប់ខេត្តបាត់ដំបង សម្រាប់ប្រធានមន្ទីរ អប់រំខេត្ត សម្រាប់សិស្សានុសិស្ស និងបុគ្គលិកនៅក្នុងវិទ្យាល័យនេតយ៉ង់ទាំងមូលផងដែរ។ 

 

កញ្ញា សៅ សុខអេង៖ តើអ្វីជាលក្ខណៈសម្បត្តិ ឬស្នាដៃចម្បង ដែលធ្វើឲ្យលោកគ្រូក្លាយជានាយកសាលា ឆ្នើមមួយរូបក្នុងបរិបទកូវីដ-១៩នេះ?

 

លោក អឿម ឃឿម៖ នៅក្នុងហ្នឹងគឺយើងមានសូចនាករជាច្រើន ដែលយើងត្រូវវាយតម្លៃថា អនុវត្តពីចំណុច ណាទៅចំណុចណា។ ក្នុងបរិបទកូវីដ-១៩ យើងបានរៀបចំកម្មវិធីបង្រៀនពីចម្ងាយដល់សិស្សានុសិស្ស។ ជាពិសេសយើងបានរៀបចំជាតារាងកាលវិភាគសម្រាប់លោកគ្រូអ្នកគ្រូពីការបង្រៀនតាមអនឡាញដោយរលូន។ 

 

 

កញ្ញា សៅ សុខអេង៖ មុនពេលដែលកូវីដ-១៩ រាតត្បាតខ្លាំង តើលោកនាយកបានដឹកនាំសាលារៀន គ្រូបង្រៀន និងសិស្សយ៉ាងដូចម្តេច?

 

លោក អឿម ឃឿម៖ មុនកូវីដ-១៩ គឺយើងបានបែងចែកតាមភារកិច្ច និងតួនាទីរបស់គណៈគ្រប់គ្រងតាម តួនាទីរបស់លោកគ្រូអ្នកគ្រូ តាមប្រធានក្រុមបច្ចេកទេស និងតាមក្រុមមុខវិជ្ជានីមួយៗ។ យើងមានរៀបចំ ផែនការសកម្មភាពជារៀងរាល់ខែ និងធ្វើផែនការសកម្មភាពដើមឆ្នាំដើម្បីឆ្លើយតប ជាមួយនឹង ផែនការ អភិវឌ្ឍសាលា។ យើងមានវត្ថុបំណងថាចង់ឲ្យសាលារៀនដល់ចំណុចណា។ យើងប្រជុំពិភាក្សាជាមួយអ្នកគ្រូ លោកគ្រូ ជារៀងរាល់ខែថាតើយើងទៅដល់ចំណុចណាហើយ។ យើងបានពិភាក្សា ហើយឲ្យគាត់ដោះស្រាយ រាល់បញ្ហាដែលគាត់ជួបប្រទះ។ យើងបានជួបពិភាក្សាយ៉ាងជិតស្និទ្ធ និងមានភាពទទួលខុសត្រូវខ្ពស់។ នេះជាសកម្មភាពដែលយើងធ្វើការផ្ទាល់ ជាមួយពួកគាត់មុនកូវីដ-១៩មិនទាន់កើតឡើង។ 

 

ចំពោះអាណាព្យាបាលវិញ គឺយើងតែងតែផ្តល់ព័ត៌មានអំពីកូនរបស់ពួកគាត់ នៅពេល ដែលកូនពួកគាត់ មិនបានមករៀន។ យើងមានក្រុមផ្តល់ និងទទួលសេវាដល់ឪពុកម្តាយ។ ចំពោះសាលារៀនវិញ គឺយើងមាន ការរៀបចំបរិស្ថាន និងគ្រប់គ្រង ដើម្បីធ្វើយ៉ាងណាឲ្យសាលារបស់យើងគ្មានសំរាម។ ចំពោះលោកគ្រូអ្នកគ្រូ គឺត្រូវតែប្រជុំបច្ចេកទេសមួយខែម្តង ដើម្បីរកចំណុចខ្លាំង និងចំណុចខ្សោយថាហេតុអ្វីបានជាពួកគាត់មិន បានសម្រេចគោលបំណងនៅក្នុងមួយម៉ោងសិក្សាហ្នឹង។ ដូច្នេះគឺយើងត្រូវប្រជុំបច្ចេកទេសដើម្បីកែតម្រូវ ឲ្យការបង្រៀនប្រកបដោយប្រសិទ្ធភាព។ យើងមានអធិការកិច្ចផ្ទៃក្នុង និងផ្ទៃក្រៅ។ ខ្ញុំជានាយកសាលា គឺខ្ញុំត្រូវត្រួតពិនិត្យ ដើរតាមបន្ទប់ថ្នាក់រៀន ថាតើគ្រូបង្រៀនជួបបញ្ហាអ្វី និងបានសម្រេចគោលបំណងអ្វីខ្លះ។ 

 

កញ្ញា សៅ សុខអេង៖ ក្នុងបរិបទកូវីដ-១៩នេះវិញ តើលោកគ្រូបានដឹកនាំសាលារៀន គ្រូ និងសិស្សយ៉ាងដូចម្តេច? 

 

លោក អឿម ឃឿម៖ ការដឹកនាំសាលារៀនក្នុងសម័យកូវីដ-១៩នេះ គឺយើងធ្វើផែនការដឹកនាំសាលាដូចគ្នា។ ដោយសារសម័យកូវីដ-១៨ ដូច្នេះការបង្រៀនតាមអនឡាញរបស់គ្រូមួយចំនួន គឺគាត់មានបញ្ហាលើការប្រើប្រាស់ប្រព័ន្ធបច្ចេកវិទ្យា។ អ៊ីចឹងយើងត្រូវតែធ្វើផែនការមួយយ៉ាងច្បាស់ថា គឺត្រូវតែរៀបចំផែនការសម្រាប់បំប៉នសមត្ថភាពរបស់គ្រូលើការប្រើប្រាស់បច្ចេកវិទ្យា។ មុនយើងធ្វើការរៀបចំបង្រៀនតាមអនឡាញ គឺយើងត្រូវតែទម្លាក់សំណួរ គឺយើងធ្វើតាមកម្មវិធី Google Form ដើម្បីឲ្យដឹងលោកគ្រូអ្នកគ្រូមានបញ្ហាអ្វីខ្លះលើប្រព័ន្ធបច្ចេកវិទ្យា។ ពេលដែលយើងរកឃើញបញ្ហាហ្នឹងហើយ គឺយើងចាប់ផ្តើមបំប៉ន និងបណ្តុះបណ្តាលគ្រូឲ្យចេះប្រើបច្ចេកវិទ្យាសម្រាប់បង្រៀន។ បន្ទាប់មកយើងបង្រៀន និងបណ្តុះបណ្តាលគ្រូឲ្យចេះធ្វើវិញ្ញាសាតាមប្រព័ន្ធGoogle Form និងបង្រៀនឲ្យសិស្សប្រឡងតាមGoogle Form។ ដូច្នេះយើងកែប្រែពីការប្រឡងបែបបុរាណឲ្យក្លាយជាបែបសម័យ។ 

 

 

កញ្ញា សៅ សុខអេង៖ អំឡុងគ្រូបង្រៀនតាមអនឡាញ តើគ្រូ និងសិស្សជួបបញ្ហាអ្វីខ្លះ? អ្វីជាដំណោះស្រាយ ដែលលោកគ្រូប្រើប្រាស់ដើម្បីឆ្លើយតបនឹងផលលំបាកទាំងនោះ?

 

លោក អឿម ឃឿម៖ ទោះអនុវត្តបានពីរឆ្នាំហើយក៏ដោយ ប៉ុន្តែការបង្រៀនតាមអនឡាញគឺនៅ តែជារឿងថ្មី សម្រាប់ពួកគាត់។ ដោយសារគ្រូខ្លះគាត់មានវ័យចំណាស់ ហើយគ្រូខ្លះគាត់អត់ចេះប្រើបច្ចេកវិទ្យា និងកុំព្យូទ័រ ។ ដូច្នេះយើងបាន សហការជាមួយគ្រូព័ត៌មានវិទ្យាជួយបង្រៀនពួកគាត់ពីការប្រើប្រាស់កម្មវិធីក្នុងកុំព្យូទ័រ។ ដូច្នេះបញ្ហាទាំងនេះ គឺលែងមានចំពោះគាត់ទៀតហើយ។ បច្ចុប្បន្នគឺគ្រូសឹងតែ៩៧ភាគរយ ហើយដែល ពួកគាត់ បានយល់ច្បាស់ពី ការប្រើប្រាស់បច្ចេកវិទ្យា។ នៅសល់តែគ្រូ៣ភាគរយទៀតដែលយើងត្រូវតែ ព្យាយាមបំប៉នពួកគាត់ បន្ថែមទៀត។ គឺយើងអត់ទុកពួកគាត់ចោលឡើយ។ គ្រូដែលអត់មានទូរសព្ទ ឬកុំព្យូទ័រសម្រាប់បង្រៀន គឺយើងមាន Tablet ឲ្យគ្រូខ្ចី។ សម្រាប់សិស្សដែលអត់ទូរសព្ទសម្រាប់រៀន គឺយើងកៀរគររកសប្បុរសជន ដើម្បីដោះស្រាយជូនពួកគាត់។  

 

បញ្ហាមួយទៀតដែលមានផលលំបាកច្រើននោះគឺការរៀបចំការប្រឡងប្រចាំខែ ដោយសារសិស្សទាំងអស់ គឺនៅតំបន់ឆ្ងាយ ហើយលោកគ្រូអ្នកគ្រូក៏មានបញ្ហាដែរ។ ដូច្នេះយើងបានបង្កើត៨គណៈកម្មាការដើម្បីបង្រៀន ពួកគាត់ពីការប្រើប្រាស់បច្ចេកវិទ្យា។ គណៈកម្មាការនីមួយៗគឺពួកគាត់ទទួលបន្ទុកទៅតាមកម្រិតថ្នាក់នីមួយៗ និងមានគណៈកម្មាការផ្នែកវិទ្យាសាស្ត្រថ្នាក់ទី១២ និងផ្នែកវិទ្យាសាស្ត្រសង្គមថ្នាក់ទី១២។ គណៈកម្មាការទាំង អស់គឺពួកគាត់មានតួនាទីច្បាស់លាស់ គឺពួកគាត់ត្រូវតែបង្កើតក្រុមទំនាក់ទំនង ទៅឪពុកម្តាយសិស្ស និងគ្រូ។ យើងមានគណៈកម្មាធិការពិសេសមួយទៀតសម្រាប់ទទួល បន្ទុកសម្របសម្រួល ដោះស្រាយលើបញ្ហា ទាក់ទងនឹងការប្រើប្រាស់បច្ចេកវិទ្យា និងចែករំលែកចំណេះដឹងថ្មីដែលគាត់រកឃើញ ទៅគណៈកម្មាការដទៃទៀត។

 

កញ្ញា សៅ សុខអេង៖ វិស័យអប់រំកំពុងឆ្ពោះទៅបច្ចេកវិទ្យាទំនើប តើលោកគ្រូមានវិធីសាស្ត្រដឹកនាំ និងរៀបចំការបង្រៀន ក៏ដូចជាការរៀនសូត្រតាមប្រព័ន្ធបច្ចេកវិទ្យាដូចម្តេចដែរដើម្បីឲ្យមានប្រសិទ្ធភាព?

 

 

លោក អឿម ឃឿម៖ ដើម្បីឲ្យសិស្សគាត់បានចូលរៀនតាមអនឡាញប្រកបដោយប្រសិទ្ធភាព និងឲ្យដឹងពីវត្តមានសិស្សណាចូលរៀន និងមិនចូលរៀន គឺយើងប្រើ Google Sheet ដើម្បីឲ្យលោកគ្រូ អ្នកគ្រូចូលទៅត្រួតពិនិត្យលើការដាក់អវត្តមានសិស្ស និងដាក់ពិន្ទុទៅឲ្យសិស្ស។ ពេលសិស្សណាម្នាក់អវត្តមានគឺយើងមានគ្រូសម្រាប់ទាក់ទងទៅឪពុកម្តាយ និងផ្តល់ព័ត៌មានពីការសិក្សាកូនទៅអាណាព្យាបាលវិញ។ 

 

ការរៀនតាមអនឡាញគឺយើងទទួលបានតែប្រសិទ្ធផល ប៉ុន្តែខ្វះប្រសិទ្ធភាព។ អ៊ីចឹងដើម្បីឲ្យការបង្រៀន និងការរៀនទទួលបានទាំងប្រសិទ្ធផល និងប្រសិទ្ធភាព។ អ៊ីចឹងខាងសាលារបស់ខ្ញុំគឺបានបែងចែកការបង្រៀនតាមអនឡាញ ដើម្បីជំរុញ និងលើកទឹកចិត្តឲ្យសិស្សបានចូលរៀនពេញលេញ។ បើសិស្សចូលរៀនតាមប្រព័ន្ធអនឡាញ គឺយើងនឹងឲ្យពិន្ទុពួកគាត់៣០ភាគរយលើការប្រឡង ដើម្បីជំរុញឲ្យពួកគាត់ចូលរៀនតាមអនឡាញ។ យើងនឹងផ្តល់ពិន្ទុ១០ភាគរយបន្ថែមទៀតសម្រាប់សិស្សដែលសកម្មក្នុងថ្នាក់ និងកិច្ចការផ្ទះ១០ភាគរយទៀត។

 

 

កញ្ញា សៅ សុខអេង៖ តើអ្វីដែលជាចក្ខុវិស័យ និងបេសកកម្មចម្បងបំផុតសម្រាប់វិទ្យាល័យនេតយ៉ង់?

 

លោក អឿម ឃឿម៖ ខ្ញុំមានចក្ខុវិស័យ និងបេសកកម្មទៅមុខទៀតសម្រាប់សាលារបស់ខ្ញុំ ដោយទី១ គឺខ្ញុំត្រូវ តែពង្រឹងទៅលើបំណិនរបស់សិស្សានុសិស្សដែលផ្តោតលើ Soft Skill និងHard Skill។ យើងត្រូវធ្វើយ៉ាងម៉េច នៅពេលដែលសិស្សនៅសាលាយើងពេលបញ្ចប់ការសិក្សា គឺពួកគាត់មានជំនាញទាំងពីរនេះតែម្តង។ ហើយខ្ញុំនឹងលើក ទឹកចិត្តគ្រូឲ្យរៀនពេញមួយជីវិតលើប្រព័ន្ធបច្ចេកវិទ្យា។ ជាពិសេសខ្ញុំមានមហិច្ឆតា ចង់កែប្រែសាលារៀននេតយ៉ង់ឲ្យក្លាយជាសាលាគំរូទូទាំងប្រទេសដែលផ្តោតទៅលើការសិក្សារបស់ក្មេង និងការផ្តល់សេវាដល់សិស្សានុសិស្ស និងឪពុកម្តាយ៕