កីឡាករឆ្នើម Lionel Messi បានក្លាយជាអ្នករួមចំណែកដ៏ធំមួយសម្រាប់ក្លិប Barcelona ប្រមាណជិត ២០ឆ្នាំមកហើយ ប៉ុន្តែដោយសារតែវិបត្តិហរិញ្ញវត្ថុ ដែលក្លិបបានជួបប្រទះ ព្រមទាំងច្បាប់របស់សហព័ន្ធបាល់ទាត់អេស្ប៉ាញ La Liga ដែលធ្វើឲ្យ Messi មិនអាចបន្តរួមរស់ជាមួយក្លិបអ្នកមានបុណ្យទៀតបាន។ លោក Koeman គ្រូបង្វឹកក្រុម Barca និយាយថា ពេលនេះមិនមែនជាពេល ដែលត្រូវសោកស្តាយនៃការបាត់បង់ប្រធានក្រុម Messi របស់ពួកគេនោះទេ។
 

«វាជារឿងធម្មតាទៅហើយនៅពេលមានកីឡាករដូច Messi ត្រូវចាកចេញ វាពិតជាផ្តល់ការពិបាកដល់អ្នកទាំងអស់គ្នាទទួលយក ប៉ុន្តែពួកយើងត្រូវតែបន្តទៅមុខ ព្រោះយើងមិនអាចផ្លាស់ប្តូរវាក្នុងកាលៈទេសៈនេះបានទេ»។ នេះជាការលើកឡើងរបស់អ្នកចាត់ការក្លិបអ្នកមានបុណ្យ។
 

លោក Koeman ប្រាប់ក្នុងសន្និសីទកាសែត ក្រោយចប់ការប្រកួតថា៖«ពួកយើងត្រូវតែបន្តប្រយុទ្ធ ពួកយើងធ្វើបានល្អ ការឈ្នះនិងខិតខំព្យាយាមបន្ថែមទៀត យើងមានកីឡាករ ដែលអាចជំនួសតំណែងរបស់ Messi នៅទីតាំងដែលគាត់លេង ហើយក៏ជាតំបន់ដ៏សំខាន់សម្រាប់ក្រុមដូចគ្នា។ ពួកយើងមិនមាន Leonel Messi ប៉ន្តែយើងនៅមានកីឡាករល្អៗមានសមត្ថភាពជាច្រើនក្នុងការបន្តដើរផ្លូវមួយនេះបន្តទៀត»។
 

លោក Ronald Koeman ក៏បានរំពឹងដែរថា កីឡាករដទៃទៀត នឹងបន្តបង្ហាញទម្រង់លេងដ៏ល្អបំផុត ទៅកាន់អ្នកគាំទ្រ ក្រោយគ្មានប្រធានក្រុម Lionel Messi ។