តាមរបាយការណ៍របស់ក្រសួងសុខាភិបាល ពលរដ្ឋសរុប​ជាង៩លាននាក់ ដែលបានស្ម័គ្រចិត្តចាក់វ៉ាក់សាំងកូវីដ-១៩ ស្មើនឹង៥៥,៩៣ភាគរយ នៃផែនការចាក់វ៉ាក់សាំងលើពលរដ្ឋសរុប១៦លាននាក់​។ 

 

ក្នុងចំណោមពលរដ្ឋជាង៩លាននាក់នោះ ពលរដ្ឋដែលមានអាយុលើស១៨ឆ្នាំឡើងទៅ គឺមានជាង៨លាននាក់, កុមារ និងយុវជនដែលមានអាយុ១២ ទៅ១៧ឆ្នាំ មានជាង៥៥ម៉ឺននាក់ និងអ្នកចាក់វ៉ាក់សាំងកូវីដ-១៩ដូសជំរុញមានជាង២៤ម៉ឺននាក់។​ នេះបើតាមរបាយការណ៍របស់ក្រសួងសុខាភិបាល។

 

គិតមកដល់ពេលនេះ កម្ពុជា មានវ៉ាក់សាំងជាង២៤លានដូសហើយ សម្រាប់ចាក់ឱ្យពលរដ្ឋ។ ក្នុងនោះ Sinovac ជាង១៤,៥លានដូស , Sinopharm ៦,២លានដូស ដែលជាជំនួយ និងការបញ្ជាទិញពីចិន។ ក្រៅពីនេះ អាមេរិក ក៏បានផ្ដល់វ៉ាក់សាំង Jonhson &Jonhson ជាង១លានដូស តាមរយៈCOVAX។ រីឯជប៉ុនផ្ដល់វ៉ាក់សាំង AstraZeneca ១,៣ លានដូស ខណៈអង់គ្លេសផ្ដល់វ៉ាក់សាំងប្រភេទនេះឱ្យកម្ពុជា ចំនួន៤១ម៉ឺនដូសដែរ។ ចំណែកកម្មវិធី COVAX ក៏បានផ្ដល់វ៉ាក់សាំង AstraZeneca ចំនួន៣២៤,០០០ដូស៕