ភ្នំពេញ៖ ក្រសួងសុខាភិបាល នាថ្ងៃទី១៦ ខែសីហា បានកំណត់ខេត្តចំនួន១៥ ឲ្យអនុវត្តកាតព្វកិច្ចពាក់ម៉ាស់ និងរក្សាគម្លាតសុវត្ថិភាព ដោយសារផ្ទុះករណីកូវីដ-១៩ បំប្លែងថ្មី ដែលតា (Delta)។
ខេត្តទាំង១៥ ដែលត្រូវគោរពវិធានាការសុវត្ថិភាពនោះ គឺមានខេត្តពោធិ៍សាត់ ,បាត់ដំបង,មណ្ឌលគីរី,រតនគីរី,ក្រចេះ, ស្ទឹងត្រែង,កំពត,កែប,កំពង់ធំ,ព្រះវិហារ កោះកុង,ប៉ៃលិន,កំពង់ឆ្នាំង ត្បូងឃ្មុំ និងឧត្តរមានជ័យ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានបញ្ជាក់ថា ការកំណត់ខេត្តទាំង១៥នេះ ដោយសារជំងឺកូវីដ-១៩ បំប្លែងថ្មី«ដែលតា» កំពុងតែរាតត្បាតខ្លាំងក្នុងខេត្តទាំងនោះ។ បើតាមរដ្ឋមន្រ្តី សុខាភិបាល កាតព្វកិច្ចពាក់ម៉ាស់ និងរក្សាគម្លាតសុវត្ថិភាពនេះ គឺត្រូវអនុវត្តឡើងរហូតដល់មានការជូនដំណឹងសាជាថ្មី។
ដើម្បីអនុវត្តគោលការណ៍នេះឲ្យមានប្រសិទ្ធភាព លោក ម៉ម ប៊ុនហេង បានណែនាំដល់អាជ្ញាធរមូលដ្ឋាន និងសមត្ថកិច្ចគ្រប់លំដាប់ថ្នាក់ ចាត់វិធានការឲ្យបានម៉ឹងម៉ាត់។ ជាមួយគ្នានេះ រដ្ឋមន្ត្រីក្រសួងសុខាភិបាល ណែនាំដល់ពលរដ្ឋរួមគ្នា អនុវត្តឲ្យបានខ្ជាប់ខ្ជួននូវវិធានការសុខាភិបាល ដើម្បីជៀសផុតពីជំងឺកូវីដ-១៩។
រដ្ឋមន្រ្តីក្រសួងសុខាភិបាល បានបញ្ជាក់ថា បើបុគ្គលណា មិនពាក់មាស់ ក្នុងទីសាធារណៈ ឬក្នុងកន្លែងដែលមានមនុស្សចាប់ពី២នាក់ឡើងទៅ បុគ្គលនោះ នឹងត្រូវទទួលទណ្ឌកម្ម តាមអនុក្រឹត្យលេខ៣៧ អនក្រ.កប ស្តីពីការទប់ស្កាត់ជំងឺកូវីដ-១៩។
បើតាមអនុក្រឹត្យដដែលនេះ បុគ្គល មិនពាក់ម៉ាស់ នៅទីកន្លែង ដែលមានមនុស្សចាប់ពី២នាក់ឡើងទៅ ដូចការកំណត់របស់ក្រសួងសុខាភិបាល នឹងត្រូវទទួលការព្រមានសិន សម្រាប់កំហុសលើកទី១ ហើយបើនៅតែបំពានលើកទី២ នឹងប្រឈមការពិន័យប្រាក់ពី២សែនរៀល ទៅ១លានរៀល។ ចំណែកបុគ្គលដែលមិនរក្សាគម្លាតសុវត្ថិភាព ក៏រងការពិន័យដូចគ្នាដែរ៕