ដើម្បីលើកទឹកចិត្ត និងជាការដឹងគុណ លោកប្រធានាធិបតីអេហ្ស៊ីប Abdel Fattah El-Sisi បានប្រកាសពីគម្រោងប្រសិទ្ធនាមបណ្តាផ្លូវមួយចំនួនតាមឈ្មោះអត្តពលិកដែលទើបដណ្តើមបានមេដាយអូឡាំពិកក្រុងតូក្យូ ដោយក្នុងនោះមាន មាស១ ប្រាក់១ និងសំរឹទ្ធ៤។
កីឡាការិនីការ៉ាតេ Faryal Ashraf ជាម្ចាស់មេដាយមាសលើវិញ្ញាសាទម្ងន់លើស៦១គីឡូក្រាម ខណៈកីឡាករ Almed Elgendy បានមេដាយប្រាក់លើវិញ្ញាសា Mordern Pantathlong និងមេដាយសំរឹទ្ធ៤ ដែលសម្រេចបានដោយ កីឡាការិនីតេក្វាន់ដូ Hedaya Malak, កីឡាករតេក្វាន់ដូ Seif Eissa, កីឡាករចំប៉ាប់ Mohamed Ibrahim El-Sayed និងកីឡាការិនីការ៉ាតេ Giana Farouk។
«Faryal Asharaf បានលើកកម្ពស់អេហ្ស៊ីប ដូច្នេះសម្រាប់នាង និងជ័យលាភីមេដាយអូឡាំពិកផ្សេងទៀត យើងនឹងយកឈ្មោះរបស់ពួកគេទៅដាក់ជាឈ្មោះនៃបណ្តាផ្លូវមួយចំនួន»។ មេដឹកនាំអេហ្ស៊ីប បានថ្លែងយ៉ាងដូច្នេះ នាពិធីអបអរជ័យលាភីអូឡាំពិកអេហ្ស៊ីប ដែលបានវិលត្រឡប់ពីការប្រកួតនៅក្រុងតូក្យូ ប្រទេសជប៉ុន។
Feryal Ashraf អាយុ២២ឆ្នាំ បានក្លាយជាម្ចាស់មេដាយមាសដំបូងរបស់អេហ្ស៊ីបលើប្រភេទកីឡាតេក្វាន់ដូផ្នែកស្ត្រី។ នាងបានយកឈ្នះកីឡាការិនីអាស៊ែរបៃហ្សង់ Irana Zaretska ២-០ នាការប្រកួតវគ្គផ្តាច់ព្រ័ត្រ។
ក្នុងសេចក្តីថ្លែងការណ៍តាមទូរទស្សន៍រដ្ឋ លោក Sisiបាន កោតសរសើរម្ចាស់មេដាយមាស និងម្ចាស់មេដាយ៥នាក់ទៀត ដែលបានរួមចំណែកលើកទង់ជាតិអេហ្ស៊ីបឲ្យខ្ពស់ឡើងលើឆាកអន្តរជាតិ។ លោកបានបញ្ជាក់ថា៖ «យើងបានប្រឹងប្រែងខ្លាំងនារយៈពេលចុងក្រោយនេះ ប៉ុន្តែខ្ញុំគិតថា មិនគ្រប់គ្រាន់នោះឡើយ យើងត្រូវកសាងធនធានកីឡា និងក្រុងកីឡាឲ្យបានច្រើនបន្ថែមទៀត»។
គ្រួសាររបស់អត្តពលិក មានតួនាទីស្នូលក្នុងការកសាងសមត្ថភាពវីរបុរស-វីរនាទីផ្នែកកីឡា។ «ពួកគាត់ក៏ដូចជាយើងទាំងអស់គ្នាផងដែរ នៅផ្ទះរបស់ពួកគាត់ ដូចជាផ្ទះពលរដ្ឋអេហ្ស៊ីបទូទៅ ពួកគាត់ត្រូវតែបន្តគាំទ្រកូនៗ ដើម្បីជំរុញឲ្យពួកគេសម្រេចបានគោលដៅច្បាស់លាស់»។ នេះជាការបញ្ជាក់របស់មេដឹកនាំអេហ្ស៊ីប។
បើគិតចាប់តាំងពីឆ្នាំ១៩១២មក អេហ្ស៊ីប បានឈ្នះមេដាយសរុប៣៨ពីព្រឹត្តិការណ៍កីឡាអូឡាំពិក ក្នុងនោះមានមេដាយមាស៨ ប្រាក់១១ និងសំរឹទ្ធ១៩។ ថ្វីត្បិត៦មេដាយពី Tokyo 2020 ជាចំនួនដែលច្រើនជាងគេសម្រាប់អេហ្ស៊ីប ប៉ុន្តែ
ថ្វីត្បិត Tokyo 2020 ជាព្រឹត្តិការណ៍ដែលអេហ្ស៊ីបឈ្នះមេដាយសរុបច្រើនជាងគេ ប៉ុន្តែកន្លងមក ពួកគេក៏ធ្លាប់ឈ្នះមេដាយមាស២ក្នុង១ព្រឹត្តិការណ៍ផងដែរ ពោលគឺកាលពីឆ្នាំ១៩២៨ ឆ្នាំ១៩៣៦ និងឆ្នាំ១៩៤៨។ កាលពីព្រឹត្តិការណ៍នៅ Rio de Janeiro ឆ្នាំ២០១៦ ពួកគេដណ្តើមបានមេដាយសំរឹទ្ធ៣៕