Abraham ទៅចូលរួមជាមួយ Mourinho នៅ Roma ក្នុងតម្លៃផ្ទេរពី Chelsea ៤៧លានដុល្លារ

កីឡាអន្តរជាតិ

អន្តរជាតិ

Abraham ទៅចូលរួមជាមួយ Mourinho នៅ Roma ក្នុងតម្លៃផ្ទេរពី Chelsea ៤៧លានដុល្លារ

18, Aug 2021 , 9:09 am

រូបភាព

ដោយ: ថ្មីៗ

ខ្សែប្រយុទ្ធ Tammy Abraham បានផ្ទេរពី Chelsea ទៅចូលរួមជាមួយ AS Roma ក្នុងតម្លៃ ៣៤លានផោន (៤៧លានដុល្លារអាមេរិក)។ តោខៀវ មានកិច្ចសន្យាទិញយក Abraham វិញនៅក្នុងតម្លៃ ៩៣លានដុល្លារ។

អត្ថបទទាក់ទង

ក្រោយចាកចេញ៧ឆ្នាំ Lukaku ទៅ Chelsea វិញក្នុងតម្លៃខ្លួន១៣៥លានដុល្លារ

Abraham ដែលជាអ្នករកគ្រាប់ច្រើនជាងគេឱ្យ Chelsea រដូវកាលមុន បានយល់ព្រមចុះកិច្ចសន្យារយៈពេល៥ឆ្នាំ ជាមួយក្រុមក្នុងលីគកំពូលអ៊ីតាលី ដែលមានលោក Jose Mourinho ជាអ្នកចាត់ការទូទៅ គិតចាប់ពីរដូវកាល ២០២១-២២ តទៅ។

យ៉ាងណា ការចាកចេញពី Stamford Bridge របស់ខ្សែប្រយុទ្ធសញ្ជាតិអង់គ្គេស វ័យ២៣ឆ្នាំ ក្នុងតម្លៃ៤៧លានដុល្លារនេះ នៅមានលក្ខខណ្ឌពិសេសមួយទៀត ដោយតោខៀវ Chelsea អាចទិញយករូបគេពី Roma វិញ អំឡុងពេលជាប់កិច្ចសន្យាក្នុងតម្លៃ ៩៣លានដុល្លារ។

ទៅដល់ទឹកដីអ៊ីតាលី Abraham និយាយថា៖ «Roma ជាក្លិបមួយដែលសមនឹងទទួលបានការប្រកួតប្រជែងដើម្បីឈ្នះពានរង្វាន់។ ខ្ញុំមានបទពិសោធន៍ក្នុងការឈ្នះពានរង្វាន់ធំៗ ហើយខ្ញុំចង់នៅក្នុងការប្រកួតទាំងនោះម្តងទៀតដូច្នេះខ្ញុំចង់ជួយក្រុមនេះឱ្យសម្រេចបាន និងឈានដល់កម្រិតកំពូលដែល Roma ចង់បាន»។

Abraham ដែលជួយក្រុមលោក Thomas Tuchel ឈ្នះ Champions League រដូវកាលមុន និង Super Cup ថ្មីៗនេះ បន្ថែមថានេះជាកិត្តិយសដ៏ធំធេងដែលរូបគេបានពាក់អាវលេខ៩ជាមួយក្លិបលំដាប់ពិភពលោកមួយនេះ។

ការទៅដល់របស់ Abraham បន្ទាប់ពី Roma អនុញ្ញតឱ្យ Edin Dzeko ចាកចេញទៅចូលរួមជាមួយ Inter Milan។ ដោយឡែក Chelsea ដែលយល់ព្រមលក់ Abraham ក៏ព្រោះពួកគេបានទិញចូលខ្សែប្រយុទ្ធឆ្នើម Romelu Lukaku ពី Inter Milan ក្នុងតម្លៃរហូតដល់ ១៣៤លានដុល្លារអាមេរិក៕