ភ្នំពេញ៖ សម្ដេច ហ៊ុន សែន ផ្ដាំលោក ហ៊ីង ប៊ុនហៀង មេបញ្ជាការដ្ឋានកងអង្គរក្ស ចុះប្រមូលទិញមៀន តែពីកសិករប៉ុណ្ណោះ ដើម្បីជួយដោះស្រាយបញ្ហាទីផ្សារពួកគេ ក្នុងអំឡុងពេលថៃបិទខ្ទប់ទីផ្សារនាំចូល ដោយសារកូវីដ-១៩នេះ។

 

តាមរយៈហ្វេសប៊ុក សម្ដេច ហ៊ុន សែន បានប្រាប់លោក ហ៊ីង ប៊ុនហៀង រួមទាំងអភិបាលខេត្តបាត់ដំបង លោក ងួន រតនៈ និងលោកស្រី បាន ស្រីមុំ អភិបាលខេត្តប៉ៃលិន ឱ្យចងចាំពាក្យថា ទិញពីកសិករ ដែលសម្ដេចចង់សំដៅដល់កសិករក្រីក្រ ដែលដាំមៀនដោយផ្ទាល់ ពោលគឺមិនត្រូវទិញមៀនពីចំការអ្នកជំនួញ និងអ្នករកស៊ីធំៗឡើយ។
 

ប្រមុខរដ្ឋាភិបាល បានចេញបញ្ជាដូច្នេះ៖«សម្រាប់ចំការមៀនរបស់មន្ត្រីទាំងស៊ីវិលទាំង កងកម្លាំងប្រដាប់អាវុធ ឬរបស់ឧកញ៉ា អ្នកឧកញ៉ា ឬអ្នកជំនួញ ត្រូវរកទីផ្សារដោយខ្លួនឯង។ ខ្ញុំអាចបញ្ចាំផ្ទះយកលុយទៅទិញពីកសិករ ដែលកំពុងជួបការលំបាកតែខ្ញុំពុំមានលទ្ធភាពជួយដល់ម្ចាស់ដី ដែលមានចំការមៀនច្រើននោះទេ សុំការយោគយល់ផង»។ 
 

ទិន្នផលមៀន ដែលសម្ដេច ហ៊ុន សែន ប្រមូលទិញពីកសិករ កំពុងជួបការលំបាកក្នុងការរកទីផ្សារនេះ នឹងត្រូវយកទៅចែកឱ្យអ្នកជំងឺ និងអ្នកកំពុងចត្តាឡីស័ក រួមទាំងកងកម្លាំងជាដើម។ «នៅពេលប្រមូលទិញបានខ្ញុំនឹងយកទៅចែកជូន កងទ័ព នគរបាល អាវុធហត្ថ គ្រូពេទ្យ អ្នកជំងឺ បងប្អូនដែលកំពុងធ្វើចត្តាឡីស័កទទួលទាន ដោយមិនគិតថ្លៃ។ នេះជាវិធីដោះទាល់ក្នុងកាលទេសៈដ៏លំបាកកុំឱ្យកសិករក្រីក្រយើងខាតបង់ធ្ងន់ធ្ងរពេកហើយខ្ញុំ ក៏មិនប្រើថវិកាជាតិដើម្បីទិញនោះដែរ«។ នេះបើតាមប្រមុខរដ្ឋាភិបាល បានបញ្ជាឱ្យក្រសួងកសិកម្ម រុក្ខាប្រមាញ់ និងនេសាទ ,ក្រសួងពាណិជ្ជកម្ម , អភិបាលខេត្តបាត់ដំបងនិងប៉ៃលិន ត្រូវខិតខំដោះស្រាយរកទីផ្សារផ្លែមៀនជូនកសិករ នាពេលខាងមុខ។