ជាតិ
សង្គមជាតិ
តំណាងសហគមន៍សាមគ្គីចេកមាស២នាក់ ត្រូវឃុំខ្លួនបណ្តោះអាសន្ន ពាក់ព័ន្ធនឹងការតវ៉ារឿងដីធ្លី កសិករក្នុងស្រុកស្វាយជ្រុំ នាំគ្នាតវ៉ាមិនព្រមទទួលយកសំណងតម្លៃដីត្រឹម៩០០រៀលក្នុងមួយម៉ែត្រការ៉េ ពីអាជ្ញាធរ កាលពីរសៀលថ្ងៃទី២សីហា។ រូបថត៖ សមាគមសម្ព័ន្ធសហគមន៍កសិករកម្ពុជា
× អ្នកស្រី យស់ សោភ័ណ្ឌ និងអ្នកស្រី ឥន សូត្រ ដែលជាតំណាងសហគមន៍សាមគ្គីចេកមាស ក្នុងស្រុកស្វាយជ្រំ ខេត្តស្វាយរៀង ត្រូវបានអាជ្ញាធរបញ្ជូនទៅឃុំខ្លួនបណ្តោះអាសន្ន បន្ទាប់ពីចូលខ្លួនបំភ្លឺជុំវិញការប្រមូលផ្តុំតវ៉ារឿងដីធ្លី កាលពីដើមខែសីហាកន្លងទៅ។ បើតាមការផ្សាយរបស់អង្គការលីកាដូ តំណាងសហគមន៍ដីធ្លីទាំង២នាក់នេះ ត្រូវឃុំខ្លួនក្រោមការចោទប្រកាន់ពីបទ“មិនគោរពវិធានការរដ្ឋបាល” និង “រារាំងការអនុវត្តវិធានការ” តាមមាត្រា ១០ និងមាត្រា១១ នៃច្បាប់ស្តីពីវិធានការទប់ស្កាត់ការរាលដាលជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។
លោក វ៉ែន សុខឿន ដែលជាស្វាមីរបស់អ្នកស្រី យស់ សោភ័ណ្ឌ បានថ្លែងប្រាប់សារព័ត៌មានថ្មីៗនៅរសៀលថ្ងៃទី២៨ សីហានេះថា ភរិយារបស់ខ្លួន និងសកម្មជនម្នាក់ទៀត ត្រូវគេចាប់ទៅឃុំនៅពន្ធនាគារខេត្តស្វាយរៀងហើយ។ លោក វ៉ែន សុខឿន ដែលកំពុងធ្វើដំណើរត្រឡប់ពីយកសម្ភាររបស់ប្រពន្ធវិញនោះ បន្តប្រាប់សារព័ត៌មានថ្មីៗថា ភរិយាលោកទំនងត្រូវចាប់ខ្លួននៅម៉ោងប្រមាណ៨ព្រឹក ថ្ងៃទី២៧ ខែសីហា នៅពេលចូលបំភ្លឺនៅតុលាខេត្តតាមការកោះហៅ។ លោក វ៉ែន សុខឿន ស្នើឱ្យតុលាការដោះលែង ភរិយាខ្លួន និងសកម្មជនម្នាក់ទៀតវិញ។
សូមរំឭកថា អ្នកស្រី យស់ សោភ័ណ្ឌ និងអ្នកស្រី ឥន សូត្រ ត្រូវបានអាជ្ញាធរស្រុកស្វាយជ្រំ ពិន័យបង់ប្រាក់ម្នាក់២លានរៀល បន្ទាប់ពីប្រមូលផ្ដុំពលរដ្ឋតវ៉ា ហើយអាជ្ញាធរអះអាថា ល្មើសនឹងវិធានការរដ្ឋបាល និងវិធានការរបស់ក្រសួងសុខាភិបាល ស្តីពីការទប់ស្កាត់ការឆ្លងរាលដាលនៃជំងឺកូវីដ-១៩។ អាជ្ញាធរទុកពេលឱ្យ តំណាងសហគមន៍សាមគ្គីចេកមាសទាំង២នាក់បង់ប្រាក់ពិន័យដល់ដំណាច់ខែសីហានេះ និងបានព្រមានថា នឹងបញ្ជូនសំណុំរឿងទៅតុលាការ បើអ្នកទាំង២ មិនបានបង់ប្រាក់តាមការសម្រេចនេះ។
ជុំវិញបញ្ហានេះ លោក ហែម សារិទ្ធ អភិបាលស្រុកស្វាយជ្រំ ប្រាប់សារព័ត៌មានថ្មីៗថា សំណុំរឿងនេះ បានទៅដល់ដៃតុលាការខេត្តហើយ។ លោក ក៏មិនពន្យល់មូលហេតុនៃការបញ្ជូនសំណុំរឿងទៅតុលាការមុនកាលបរិច្ឆេទកំណត់នោះដែរ។
សូមជម្រាបថា ប្រជាកសិករចំនួន១២០គ្រួសារ ក្នុងស្រុកស្វាយជ្រុំ ខេត្តស្វាយរៀង បាននាំគ្នាតវ៉ា ព្រោះមិនព្រមទទួលយកសំណងតម្លៃដីស្រែត្រឹម៩០០រៀលក្នុងមួយម៉ែត្រការ៉េ ពីអាជ្ញាធរ។ ផ្ទៃដីស្រែរបស់ពួកគេ ដែលក្រសួងធនធានទឹក គ្រោងយកធ្វើអាងស្តុកទឹកនោះ គឺមានទំហំ៩៩,៥ហិកតា ហើយបញ្ហាទំនាស់ដីរវាងភាគីទាំងពីរនេះ បានកើតឡើងតាំងពីឆ្នាំ២០០៨មកម្ល៉េះ។ ប្រជាកសិករទាំងនោះ សុំសំណងតម្លៃដី១២,០០០រៀល ឬស្មើ៣ដុល្លារក្នុងមួយម៉ែត្រការ៉េ ដើម្បីបញ្ចប់បញ្ហានេះ៕
Tag:
យស់ សោភ័ណ្ឌ
ឥន សូត្រ
© រក្សាសិទ្ធិដោយ thmeythmey.com