COVID-19
ជាតិ
ក្រសួង ឱ្យសណ្ឋាគារនៅភ្នំពេញ និងសៀមរាប ព្យាបាលអ្នកជំងឺកូវីដ-១៩
× ក្រសួងសុខាភិបាល នឹងដាក់ឱ្យដំណើរការសាកល្បង ការថែទាំ និងព្យាបាលអ្នកជំងឺកូវីដ-១៩ កម្រិតស្រាល នៅសណ្ឋាគារមួយចំនួន នៅក្នុងរាជធានីភ្នំពេញ និងសៀមរាប។ បើតាមលិខិតជូនដំណឹងរបស់ក្រសួងសុខាភិបាល នៅថ្ងៃទី ១ កញ្ញា រដ្ឋបាលរាជធានីភ្នំពេញ និងរដ្ឋបាលខេត្តសៀមរាប ត្រូវបញ្ចេញឈ្មោះសណ្ឋាគារ ដែលទទួលបានការអនុញ្ញាតឱ្យសាកល្បង ការថែទាំ និងព្យាបាលអ្នកជំងឺកូវីដ-១៩។
ក្រសួងសុខាភិបាល ក៏បានប្រាប់ទៅម្ចាស់សណ្ឋាគារ ដែលចង់រៀបចំជាកន្លែងផ្តល់សេវាថែទាំ និងព្យាបាលអ្នកជំងឺកូវីដ-១៩កម្រិតស្រាល ទាក់ទងទៅអនុគណៈកម្មការបច្ចេកទេស និងព្យាបាល ដើម្បីទទួលបានការណែនាំពីរបៀបដាក់ពាក្យស្នើសុំ។
គួរកត់សម្គាល់ថា កន្លងមកក្រសួងសុខាភិបាល បានសម្រេចឱ្យអ្នកជំងឺកូវីដ-១៩ កម្រិតស្រាល គ្មានរោគសញ្ញាមួយចំនួន ព្យាបាលនៅតាមផ្ទះ ដើម្បីសម្រាលបន្ទុក និងបន្ថយភាពចង្អៀតនៅមណ្ឌលព្យាបាល។ បើតាមរបាយការណ៍ពីក្រសួងសុភិបាល គិតត្រឹមដំណាច់ខែសីហា កម្ពុជានៅសល់អ្នកជំងឺប្រមាណ ៣ ៤០០នាក់ប៉ុណ្ណោះ ហើយក្នុងចំណោមនោះ ក៏ទំនងមានអ្នកសម្រាកព្យាបាលនៅផ្ទះដែរ។
សូមជម្រាបដែរថា កម្ពុជាបានរកឃើញអ្នកឆ្លងជំងឺកូវីដ-១៩ សរុប ៩៣ ៥១០នាក់ ក្នុងនោះអ្នកជាសះស្បើយ ៨៩ ១១៤នាក់ និងអ្នកស្លាប់១ ៩១៦នាក់។ ករណីកូវីដ-១៩ បំប្លែងថ្មីដែលតា ក៏ត្រូវបានរកឃើញជាបន្តបន្ទាប់នៅកម្ពុជាដែរ ដោយបច្ចុប្បន្ន មានករណីDelta ជិត ២ ០០០ករណី ក្នុងនោះភ្នំពេញ បន្ទាយមានជ័យ និងឧត្តរមានជ័យមានច្រើនជាងគេ៕
© រក្សាសិទ្ធិដោយ thmeythmey.com