ក្នុងដំណើរទស្សនកិច្ច៣ថ្ងៃនេះ លោក ប្រាក់ សុខុន ក៏នឹងជួបពិភាក្សាលើកិច្ចសហការប្រតិបត្តិការទ្វេ​ភាគី ជាមួយ​លោក ឈុង អើយយ៉ុង រដ្ឋមន្ត្រីការបរទេសកូរ៉េខាងត្បូង ក្នុងនោះរួមមាននយោបាយ និងការពារជាតិជាដើម។

​

ចំណែកកិច្ចការអភិវឌ្ឍ សេដ្ឋកិច្ច វិទ្យាសាស្ត្រ និងបច្ចេកវិទ្យា ក៏ នឹងត្រូវលើកយកមកពិភាក្សាផងដែរ ដើម្បីពង្រឹងទំនាក់ទំនងល្អស្រាប់ រវាងប្រទេសទាំង២។  

 

ក្រៅពីនេះ ភាគីទាំង២ ក៏នឹងពិភាក្សា​ផ្លាស់ប្តូរយោបល់គ្នាដែរ លើបញ្ហាតំបន់ និងអន្តរជាតិ ដែលជាការចាប់អាម្មណ៍រួម។ នេះបើតាមសេចក្តីប្រកាសព័ត៌មានក្រសួងការបរទេសកម្ពុជា។ 

 

នៅរសៀលថ្ងៃទី៨ ខែកញ្ញា លោក ប្រាក់ សុខុន និងលោក ឆុង អើយយ៉ុង នឹងអញ្ជើញធ្វើជាសហប្រធាន នៃកិច្ចប្រជុំរដ្ឋមន្ត្រីការបរទេសមេគ្គង-សាធារណរដ្ឋកូរ៉េលើកទី១១ ខណៈដែលរដ្ឋមន្ត្រីការប្រទេស នៃ​ប្រទេសទន្លេមេគង្គផ្សេងទៀត​ រួមមានឡាវ មីយ៉ាន់ម៉ា ថៃ និងវៀតណាម នឹងចូលរួមកិច្ចប្រជុំតាមប្រព័ន្ធវីដេអូ។ 

 

បើតាមសេចក្តីប្រកាសព័ត៌មានដដែល កិច្ចប្រជុំនេះ នឹងពិនិត្យឡើងវិញ នូវវឌ្ឍនភាពនៃកិច្ចសហប្រតិបត្តិការមេគង្គ-សាធារណរដ្ឋកូរ៉េ ក៏ដូចជាយន្តការដែលបានកំណត់ នៅក្នុងផែនការសកម្មភាព(២០២១-២០២៥) ការចូលរួមចំណែករបស់វិស័យឯកជន និងទិសដៅនាពេលអនាគតនៃយន្តការនេះ។ ​រដ្ឋមន្ត្រីការបរទេសមេគង្គ-សាធារណរដ្ឋកូរ៉េ ក៏នឹងចែករំលែកទស្សនៈនានា ពាក់ព័ន្ធនឹងបញ្ហាតំបន់ និង​សកល រួមមានការប្តេជ្ញារួម ក្នុងការដោះស្រាយវិបត្តិគំរាមកំហែងសុខភាពសាធារណៈជាសកល ដែលបង្កឡើងដោយជំងឺកូវីដ-១៩ផងដែរ៕