Naby Keita បានទៅស្រុកកំណើត ដើម្បីជួយដល់ក្រុមជម្រើសជាតិក្នុងការប្រកួតជម្រុះ World Cup ដែលត្រូវស្វាគមន៍ក្រុមម៉ារ៉ុក ។ ការប្រកួតនេះ ត្រូវបានផ្អាកទៅវិញ ខណៈប្រទេសមួយនេះ បានធ្លាក់ចូលក្នុងដៃក្រុមយោធាដោយការធ្វើរដ្ឋប្រហារបានសម្រេច នាពីថ្ងៃទី៦ ខែកញ្ញា គឺចំថ្ងៃប្រកួតតែម្តង។ ក្រោយការផ្អាកការប្រកួតនេះ ខ្សែបម្រើក្រុមLiverpool រូបនេះ ក៏បានរៀបចេញដំណើរពីទីក្រុងកូណាគ្រីវិញ ប៉ុន្តែត្រូវបានខកខាន ដោយសារជើងហោះហើរក្នុងប្រទេសហ្គីណេ ត្រូវបានបិទមិនឲ្យមានការធ្វើដំណើរចេញពីប្រទេសឡើយ។

 

ក្លិប Liverpool កំពុងព្យាយាមជួយដល់ Keita ក្នុងការត្រឡប់មកកាន់ទឹកដីប្រទេសអង់គ្លេសវិញផងដែរ។ បើតាមអ្នកនាំពាក្យរបស់ក្លិប Liverpool បាននិយាយប្រាប់ទូរទស្សន៍កីឡា ESPN ថា៖«ក្លិបបានទំនាក់ទំនងទៅកាន់ Keita ភ្លាមៗក្រោយទទួលបានដំណឹងថាមានរដ្ឋប្រហារក្នុងប្រទេសរបស់គេ ហើយក្លិបក៏បានទាក់ទងទៅកាន់សហព័ន្ធបាល់ទាត់ហ្គីណេ សុំឲ្យមានការអនុញ្ញាតពិសេសសម្រាប់ Keita ក្នុងការវិលត្រឡប់មកកាន់ក្លិប Liverpool វិញ»។ 
 

បើតាមអ្នកនាំពាក្យរបស់ក្លិប Liverpool ដដែល Keita កំពុងត្រូវបានអាជ្ញាធរហ្គីណេ យកចិត្តទុកដាក់ថែទាំយ៉ាងល្អ ក្រោយក្លិបជូនដំណឹងទៅនេះ។«ស្ថានភាពរបស់ Keita ពេលនេះគឺសុវត្តិភាព ១០០ ភាគរយ។ រូបគេត្រូវបានគេមើលថែបានយ៉ាងល្អ ហើយមកដល់ពេលនេះ ស្ថានភាពក៏បានធូរស្បើយផងដែរ ក្នុងប្រទេសហ្គីណេផ្ទាល់ ។ ហើយយើងក៏កំពុងតែរក្សាការសន្ទនាជាមួយ Keita គ្រប់ពេលទាំងអស់ហើយនិងធ្វើគ្រប់យ៉ាងដើម្បីនាំរូបគេមកកាន់ Liverpool ឲ្យបានឆាប់បំផុតនឹងដោយសុវត្តិភាព»។ នេះបើតាមក្លិបហង្សក្រហម។
 

 
 

គួរបញ្ជាក់ដែរថា ក្រុមទាហានដែលមានបំណងផ្តួលរំលំរដ្ឋាភិបាល បានបង្ហាញខ្លួននៅលើកញ្ចក់ទូរទស្សន៍ជាតិរបស់ហ្គីណេ ដោយអះអាងថា ពួកគេបានរំលាយរដ្ឋាភិបាលហើយ កាលពីថ្ងៃទី ៥ខែ កញ្ញាឆ្នាំ ២០២១៕