អន្តរជាតិ
ករណីជំងឺគ្រុនផ្ដាសាយធំនៅអូស្ត្រាលី បានធ្លាក់ដល់កម្រិតទាបបំផុតក្នុងឆ្នាំ២០២១ រូបភាព៖ AFP
× ក្នុងឆ្នាំ២០២១ ករណីឆ្លងជំងឺគ្រុនផ្ដាសាយធំនៅអូស្ត្រាលី មានចំនួនតិចបំផុតបើប្រៀបធៀបនឹងឆ្នាំមុនៗ។ ប៉ុន្តែអ្នកជំនាញបានបញ្ជាក់ថា ជំងឺគ្រុនផ្ដាសាយធំ នឹងផ្ទុះឡើងម្តងទៀត នៅពេលបើកការធ្វើដំណើរឆ្លងប្រទេសជាថ្មី។ ដើម្បីដោះស្រាយបញ្ហាមួយនេះនាពេលអនាគត ការទទួលយកការចាក់វ៉ាក់សាំងបង្ការជំងឺផ្ដាសាយធំ គឺជាដំណោះស្រាយតែមួយគត់ដែលល្អបំផុត ក្នុងការការពារជំងឺឆ្លង។
មុនពេលផ្ទុះជំងឺកូវីដ-១៩ មន្ទីរពិសោធន៍នៅអូស្រ្តាលី បានរាយការណ៍ ករណីគ្រុនផ្តាសាយធំ ក្នុងឆ្នាំ២០១៩ បានឈានដល់កម្រិតខ្ពស់បំផុត ដោយមានចំនួន៣១៣០៣៣ករណី ពោលគឺខ្ពស់ជាង២,៧ដងនៃចំនួនអ្នកឆ្លងជាមធ្យម ក្នុងរយៈពេល៥ឆ្នាំចុងក្រោយ។ ចំណែកចំនួនអ្នកស្លាប់ច្រើនបំផុតមាន៩៥៣នាក់ឯណោះ។ ក្នុងឆ្នាំ២០២១ ករណីឆ្លងជំងឺផ្តាសាយធំមាន៤៨៤នាក់ និងមិនទាន់អ្នកស្លាប់ឡើយ។ នេះជាកំណត់ត្រានៃការឆ្លងជំងឺផ្តាសាយធំទាបបំផុតប្រចាំឆ្នាំនៅអូស្ត្រាលី។
«ដរាបណាការរឹតត្បិតការធ្វើដំណើរក្នុងបរិបទកូវីដ-១៩ ត្រូវបានអនុវត្ត ហើយព្រំដែនអន្តរជាតិត្រូវបានបិទ យើងឃើញមានការថយចុះគួរឱ្យកត់សម្គាល់ចំពោះករណីឆ្លងជំងឺគ្រុនផ្តាសាយធំ»។ លោក Ian Barr អនុប្រធានមជ្ឈមណ្ឌលសហប្រតិបតិ្តការរបស់អង្គការសុខភាពពិភពលោកសម្រាប់ការស្រាវជ្រាវ និងឯកសារយោងស្តីពីជំងឺគ្រុនផ្តាសាយធំបានលើកឡើងបែបនេះ។ លោកបន្តថា ការបិទសាលារៀន ក៏ជាផ្នែកមួយនៃហេតុផលធ្វើឱ្យចំនួនករណីឆ្លងធ្លាក់ទាបដែរ។
ទន្ទឹមនេះ លោកស្រី Kirsty Short សាស្ត្រាចារ្យសិក្សាផ្នែកវីរុសនៃសាកលវិទ្យាល័យ Queensland បានយល់ថា មូលហេតុចម្បងនៃការថយចុះករណីជំងឺផ្តាសាយ គឺដោយសារការបិទព្រំដែនអន្តរជាតិតែម្ដង។
តាមពិត វិធានការដែលកំពុងអនុវត្តដើម្បីការពារខ្លួនពីជំងឺកូវីដ-១៩ ដូចជា វិធានការរក្សាគម្លាតសង្គម វិធានការក្សាអនាម័យ និងការដាក់បម្រាមធ្វើដំណើរឆ្លងដែនជាដើមនេះក៏បានប្រឆាំងនឹងការចម្លងវីរុសនៃជំងឺផ្តាសាយធំដែរ។ លោក Barr បានប៉ាន់ស្មានថា ជំងឺផ្តាសាយធំ អាចនឹងមានករណីឆ្លងកើនឡើង នៅពេលការធ្វើដំណើរឆ្លងប្រទេសបើកធម្មតា ស្របគ្នានឹងរដូវរងាមកដល់ថែមទៀត។
ដូច្នេះ ការចាក់វ៉ាក់សាំងបង្ការជំងឺគ្រុនផ្តាសាយ គឺជាវិធីការពារដ៏ល្អបំផុតសម្រាប់មនុស្សគ្រប់គ្នាប្រឆាំងនឹងការឆ្លងឡើងវិញនៃជំងឺផ្តាសាយធំ នាពេលអនាគត៕
© រក្សាសិទ្ធិដោយ thmeythmey.com