រាជបណ្ឌិត្យសភាកម្ពុជា គ្រោងបើកថ្នាក់បង្រៀនជំនាញធ្វើម្ហូបសម្រាប់អ្នកទៅធ្វើការក្រៅប្រទេស

ជាតិ

រាជបណ្ឌិត្យសភាកម្ពុជា គ្រោងបើកថ្នាក់បង្រៀនជំនាញធ្វើម្ហូបសម្រាប់អ្នកទៅធ្វើការក្រៅប្រទេស

26, Sep 2021 , 10:29 pm

រូបភាព

លោក សុខ ទូច ប្រធានរាជបណ្ឌិត្យសភាកម្ពុជា

ដោយ: ប៉ូ សាគុន

ភ្នំពេញ៖ រាជបណ្ឌិត្យសភាកម្ពុជា នឹងបើកថ្នាក់បណ្ដុះបណ្ដាលវិជ្ជាធ្វើម្ហូបបរទេស និងក្រឡុងស្រាជាដើម សម្រាប់អ្នកមានបំណងទៅធ្វើការនៅក្រៅប្រទេស។ គម្រោងនេះ នឹងបើកបង្រៀន ក្រោយពេលជំងឺកូវីដ-១៩ ត្រូវបានបិទបញ្ចប់។

លោក សុខ ទូច ប្រធានរាជបណ្ឌិត្យសភាកម្ពុជា បានប្រាប់សារព័ត៌មានថ្មីៗថា ការបណ្ដុះបណ្ដាលវិជ្ជាជីវៈ មានការធ្វើម្ហូប និងការក្រឡុកស្រាជាដើមនេះ មាន៣វគ្គ គឺវគ្គខ្លី វគ្គមធ្យម និងវគ្គមធ្យមឯកទេស។ លោក សុខ ទូច ថា ជំនាញវិជ្ជាជីវៈនេះ បង្កើតឡើងជាជំហានដំបូង ផ្ដោតលើអ្នកចេញទៅធ្វើការក្រៅប្រទេស ដើម្បីឱ្យពួកគេទទួលបានប្រាក់ខែច្រើនជាងមុន។

ប្រធានរាជបណ្ឌិត្យសភាកម្ពុជា ពន្យល់ថា ក្រោយពីលោកបានសិក្សាលើវិស័យទេសចរណ៍ ឃើញថាប្រជាជនកម្ពុជា ដែលចេញទៅធ្វើការក្រៅប្រទេស មានតែកម្លាំងពលកម្ម ប៉ុន្តែមិនមានជំនាញវិជ្ជាជីវៈ ដែលជាហេតុធ្វើឱ្យពួកគេទទួលបានប្រាក់ខែតិច។

«រាជបណ្ឌិត្យសភាកម្ពុជា ចង់បណ្ដុះបណ្ដាលវិជ្ជាជីវៈ ឱ្យគាត់ចេះក្រឡុកស្រា ចេះធ្វើម្ហូប និងជាម្ហូបស្ដង់ដាតាមប្រទេសនីមួយៗ។ បើគាត់ទៅកូរ៉េ ត្រូវចេះធ្វើម្ហូបកូរ៉េ ទៅជប៉ុនត្រូវចេះម្ហូបជប៉ុន បើគាត់ទៅប្រទេសណា ក៏គាត់ត្រូវមានជំនាញ។ ឧទាហរណ៍ថា បើគាត់ធ្វើការនៅប្រទេសគេ បានតែ៥០០ ទៅ៦០០ដុល្លារ គាត់មានជំនាញគាត់អាចបានដល់ទៅ១ពាន់ដុល្លារ»។ នេះជាការបញ្ជាក់របស់លោក សុខ ទូច។

បើទោះបីជាជំហានដំបូង ការបណ្ដុះបណ្ដាលជំនាញវិជ្ជាជីវៈនេះ ផ្ដោតសំខាន់សម្រាប់អ្នកទៅធ្វើការក្រៅប្រទេសក្ដី ប៉ុន្តែចំពោះអ្នកធ្វើការក្នុងប្រទេសក៏អាចរៀនបានដែរ។ លោក សុខ ទូច សង្កត់ធ្ងន់ថា ការបណ្ដុះបណ្ដាលនេះ ត្រូវបង់ថ្លៃ ប៉ុន្តែប្រសិនបើអ្នករៀនខ្វះខាតប្រាក់ ពួកគេអាចទៅរៀនសិន ហើយក្រោយពីពួកគេទទួលបានប្រាក់ខែ គេអាចកាត់ប្រាក់ខែសងទៅរាជបណ្ឌិត្យសភាកម្ពុជាវិញ តាមដំណាក់កាល។ យ៉ាងណាក៏ដោយ សម្រាប់អ្នករៀនពូកែ រាជបណ្ឌិត្យសភាកម្ពុជា ក៏អាចផ្ដល់អាហារូបករណ៍ជូនផងដែរ។

លោក សុខ ទូច ពន្យល់បន្ថែម៖«រៀនបានទាំងអស់គ្នា គ្រាន់តែពេលនេះយើងចង់សម្រួចសម្រាប់អ្នកទៅធ្វើការក្រៅប្រទេសសិន។ វគ្គខ្លីសម្រាប់មេផ្ទះ គាត់អាចរៀនដើម្បីចម្អិនទទួលទានខ្លួនឯង ឬសម្រាប់គ្រួសារគាត់ គាត់អាចរៀនតែ២ ទៅ៣មុខ តាមចិត្តគាត់ចង់។ វគ្គមធ្យម មានរយៈពេល៦ខែ និងវគ្គមធ្យមឯកទេស គឺថ្នាក់បរិញ្ញាបត្ររង មានរយៈពេល២ឆ្នាំ។ យើងមិនអាចបង្រៀន ដោយមិនគិតថ្លៃទេ ព្រោះនាំឱ្យពួកគេមិនខំរៀន ម្យ៉ាងការងារនេះ យើងត្រូវចំណាយប្រាក់ទាំងអស់»៕