ជាតិ
×![]()
ដោយ: សារព័ត៌មានថ្មីៗ
លោក ហ៊ុន ម៉ានី ប្រធានគណៈកម្មការទី៧នៃរដ្ឋសភា កាលពីថ្ងៃទី២៧ ខែកញ្ញា បានដឹកនាំប្រតិភូ ទៅពិនិត្យមើលដំណើរការបើកសាលារៀនទាំងរដ្ឋ និងឯកជនឡើងវិញនៅក្នុងខេត្តកំពង់ស្ពឺ។ បេសកកម្មនេះ បង្ហាញពីការតាមដានរបស់ស្ថាប័ននីតិបញ្ញត្តិលើការអនុវត្តភារកិច្ចរបស់ស្ថាប័នរដ្ឋាភិបាលគ្រប់កម្រិត។
គិតត្រឹមថ្ងៃទី២២ ខែកញ្ញា គ្រឹះស្ថានសិក្សាសាធារណៈ និងឯកជនចំនួន៨៧៤ ដែលស្មើនឹង៨៣,៥៥ភាគរយលើគ្រឹះស្ថានសិក្សាសរុប ១០៤៦ទូទាំងខេត្តកំពង់ស្ពឺ បានដំណើរឡើងវិញ ក្រោយខកខានអស់រយៈពេលប្រមាណ២ឆ្នាំដោយសារកូវីដ-១៩។ នេះបើតាមរបាយការណ៍ដែលបង្ហាញដោយលោក ថន ថារិន ប្រធានមន្ទីរអប់រំ យុវជន និងកីឡាខេត្ត។
លោកប្រធានមន្ទីរ បានបញ្ជាក់ប្រាប់ប្រតិភូគណៈកម្មការទី៧សភាថា ការសម្រេចដំណើរការសាលារៀននៅក្នុងខេត្តទទួលបាននូវការសាទរយ៉ាងខ្លាំងពីសិស្សានុសិស្ស និងអាណាព្យាបាល រីឯគ្រឹះស្ថានសិក្សាដែលមិនទាន់បានបើក សុទ្ធសឹងជាគ្រឹះស្ថានដែលស្ថិតក្នុងតំបន់ទីប្រជុំជន ដែលមានហានិភ័យខ្ពស់ និងជាទីតាំងដែលនៅមានករណីផ្ទុះក្នុងសហគមន៍។
លោក វ៉ី សំណាង អភិបាលខេត្តកំពង់ស្ពឺ បានគូសបញ្ជាក់ពីសារសំខាន់នៃការរួមគ្នារវាងថ្នាក់ដឹកនាំស្ថាប័ននីតិប្រតិបត្តិ និងនីតិបញ្ញត្តិ ក្នុងការពង្រឹងស្ថានភាពនៃការបង្រៀន និងតាមបណ្តុំនៅតាមគ្រឹះស្ថានសាធារណៈ និងឯកជន ជាពិសេសការខ្វាយខ្វល់ចំពោះសុខទុក្ខពលរដ្ឋ និងសិស្សានុសិស្សដែលជាអនាគតសសរទ្រូងនៃប្រទេសជាតិ។
នាឱកាសនោះ លោក ហ៊ុន ម៉ានី ប្រធានគណៈកម្មការទី៧ ដែលទទួលបន្ទុកផ្នែកអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានវាយតម្លៃខ្ពស់ពីការខិតខំបំពេញភារកិច្ចរបស់ថ្នាក់ដឹកនាំខេត្ត និងអ្នកពាក់ព័ន្ធនាអំឡុងបរិបទកូវីដ-១៩។
លោកបានរំលឹកថា ការសម្រេចដំណើរការសាលារៀនឡើងវិញនេះ ដោយសារតែមានការចូលរួមគ្នាជំរុញការចាក់វ៉ាក់សាំងកុមារ និងយុវវ័យចាប់ពីអាយុ១២ឆ្នាំ ដល់១៧ឆ្នាំ ហើយថ្មីៗនេះ មានការចាក់ជូនកុមារពីអាយុ៦ឆ្នាំដល់១១ឆ្នាំ ដែលអាចបង្កើនបាននូវភាពស៊ាំនៅក្នុងសហគមន៍ ប៉ុន្តែអាជ្ញាធររាជធានី-ខេត្ត ក៏ត្រូវធ្វើការវាយតម្លៃតាមស្ថានភាពជាក់ស្តែងផងដែរ។
ក្រៅពីយុទ្ធនាការចាក់វ៉ាក់សាំងបង្កើនភាពស៊ាំក្នុងសហគមន៍ លោក ហ៊ុន ម៉ានី កត់សម្គាល់ឃើញពីការប្រឹងប្រែងរួមគ្នាពីមហាជន ពលរដ្ឋ មន្ត្រីរាជការ និងកងកម្លាំងទាំងអស់លើការអនុវត្តវិធានការ «៣កុំ ៣ការពារ» ជាមួយនឹងក្តីរំពឹងថា សង្គមកម្ពុជាទាំងមូលនឹងវិលត្រឡប់រកសភាពដើមវិញ។
នាបេសកកម្មនៅកំពង់ស្ពឺ ប្រតិភូគណៈកម្មការទី៧សភា បានទស្សនកិច្ចផ្ទាល់ទៅកាន់គ្រឹះស្ថានសិក្សាចំនួន២ ដែលរួមមាន សាលាបឋមសិក្សាសន្តិភាព និងវិទ្យាល័យ សុខា ហើយក៏បានផ្តល់ជូនសម្ភារៈមួយចំនួនជូនសាលារួមមាន៖ ម៉ាស ទឹកថ្នាំលាងដៃ ឡាបូចល័ត និងថវិកាជូនគ្រូបង្រៀនផងដែរ។
សូមបញ្ជាក់ថា កាលពីថ្ងៃទី១៥ ខែកញ្ញា ពោលមុនការចុះពិនិត្យដំណើរការសាលារៀននៅកំពង់ស្ពឺ លោក ហ៊ុន ម៉ានី និង លោក សំ រិទ្ធី អនុប្រធានគណៈកម្មការទី៧ បានធ្វើទស្សនកិច្ចទៅកាន់វិទ្យាល័យ ហ៊ុន សែន ថ្នល់ទទឹង ស្ថិតក្នុងស្រុកអង្គស្នួល ខេត្តកណ្តាល៕
Tag:
អប់រំ
© រក្សាសិទ្ធិដោយ thmeythmey.com
