ជាតិ
សេដ្ឋកិច្ច
កម្ពុជា ជាម្ចាស់ប្រេងឆៅជិត៣០ម៉ឺនបារ៉ែលស្របច្បាប់ ហើយច្រានចោលការបកស្រាយរបស់ម្ចាស់នាវា MT Strovolos
សកម្មភាពបូមប្រេងរបស់ក្រុមហ៊ុន KrisEnergyកន្លងមកនៅប្លុកA។ រូបថត៖ ក្រសួងរ៉ែ និងថាមពល
×![]()
ភ្នំពេញ៖ វិវាទរវាងម្ចាស់នាវា MT Strovolos និងក្រុមហ៊ុន គ្រីសអេនើជី (KriEnergy) មិនពាក់ព័ន្ធជាមួយកម្ពុជាឡើយ។ ដូច្នេះប្រេងឆៅជិត៣០ម៉ឺនបារ៉ែល គឺជាកម្មសិទ្ធស្របច្បាប់របស់កម្ពុជា។
រដ្ឋាភិបាលកម្ពុជា តាមរយៈក្រសួងរ៉ែ និងថាមពល បានច្រានចោលសេចក្តីថ្លែងការណ៍របស់ម្ចាស់នាវា MT Strovolos ដែលយកប្រេងឆៅរបស់កម្ពុជាចំនួន ២៩៥ ០០០បារ៉ែល នៅលើនាវាធ្វើជាកម្មវត្ថុនៃការទាមទារប្រាក់ពីកម្ពុជា។ នេះបើយោងតាមសេចក្តីប្រកាសព័ត៌មានរបស់ក្រសួងរ៉ែនិងថាមពល នៅថ្ងៃទី៣០កញ្ញានេះ។
«ក្រសួងរ៉ែនិងថាមពល បានឃើញព័ត៌មាន និងការអះអាងមិនពិតពាក់ព័ន្ធនឹងកម្មសិទ្ធិលើប្រេងក្នុងសេចក្តីថ្លែងការណ៍មួយចំនួនរបស់ម្ចាស់នាវា និងអ្នកគ្រប់គ្រងនាវា MT Strovolos ដែលចាំបាច់ត្រូវកែតម្រូវ»។ នេះបើតាមក្រសួងរ៉ែ ដែលបានអះអាងជាថ្មីថា ប្រេងដែលនាវា MT Strovolos លួចដឹកចេញពីដែនសមុទ្រកម្ពុជា គឺជាកម្មសិទ្ធរបស់កម្ពុជាយ៉ាងស្របច្បាប់។
កម្ពុជាតាមរយៈក្រសួងរ៉ែនិងថាមពលបានបន្តអះអាងដូច្នេះ៖ «ប្រេងឆៅទាំងអស់ គឺជាទ្រព្យសម្បត្តិរបស់ព្រះរាជាណាចក្រកម្ពុជាគ្រប់ពេលវេលាទាំងអស់។ ការលួច ឬការរំលោភបំពានកម្មសិទ្ធិលើប្រេងឆៅ ដោយម្ចាស់នាវា អ្នកគ្រប់គ្រង និងក្រុមនាវិកនៃនាវា MT Strovolos និងបក្ខពួករបស់គេ គឺជាបទល្មើសក្រោមច្បាប់កម្ពុជា»។
បើតាមលោក ជៀប សួរ ដែលជាអគ្គនាយកប្រេងកាតនៃក្រសួងរ៉ែ និងថាមពល បច្ចុប្បន្ន កម្ពុជាកំពុងធ្វើនីតិវិធីផ្លូវច្បាប់ ដើម្បីយកប្រេងឆៅរបស់ខ្លួនមកវិញ។ ប៉ុន្តែ លោកមិនទាន់អាចបញ្ជាក់អំពីការនាំយកប្រេងឆៅមកកម្ពុជា បាននៅពេលណាទេ។ លោក ជៀប សួរ ប្រាប់សារព័ត៌មានThmeyThmeyតាមប្រព័ន្ធតេលេក្រាម នារសៀលថ្ងៃទី៣០កញ្ញាយ៉ាងខ្លីដូច្នេះ ៖ «ខ្ញុំមិនអាចប៉ាន់ស្មានលើរយៈពេលនៃនីតិវិធីច្បាប់បានទេ»។
សូមរម្លឹកថា នាវឹក MT Strovolos បានលួចដឹកប្រេងឆៅរបស់កម្ពុជាចេញពីសមុទ្រ កាលពីថ្ងៃទី១៩មិថុនា ឆ្នាំ២០២១ រហូតដល់ថ្ងៃទី២៥សីហា អាជ្ញាធរប្រទេសឥណ្ឌូណេស៊ីផ្តល់ដំណឹងឱ្យកម្ពុជា ថា ខ្លួនបានចាប់នាវាដឹកប្រេងឆៅជិត៣០ម៉ឺនបារ៉ែល និងប្រធានក្រុមនាវាដែលជាជនជាតិបង់ក្លាដែសនិងសមាជិកនាវិកចំនួន១៨នាក់ផ្សេងទៀត។
ក្រោយពីកងទ័ពជើងទឹកឥណ្ឌូណេស៊ី រឹបអូសបាននាវាMT Strovolos ទៅតាមការស្នើសុំរបស់អាជ្ញាធរកម្ពុជា។ ក្រុមហ៊ុន World Tankers Management ដែលជាគ្រប់គ្រងនាវា MT Strovolos នោះ បានចេញមុខបដិសេធលើការចោទប្រកាន់នេះភ្លាមៗថា នាវានេះ មិនបានលួចប្រេងពីកម្ពុជាឡើយ។ សេចក្តីថ្លែងការណ៍របស់ក្រុមហ៊ុនWorld Tankers Management នៅថ្ងៃទី២៧ សីហា បានបញ្ជាក់ថា នាវា MT Strovolos ដែលនៅលើដែនទឹករបស់ឥណ្ឌូណេស៊ី ធ្វើឡើងក្រោមហេតុផលមនុស្សធម៌ និងធ្វើប្រតិបត្តិការតាមកិច្ចសន្យាតែប៉ុណ្ណោះ។
តែក្រសួងរ៉ែ និងថាមពល ចាត់ទុកការបកស្រាយរបស់ម្ចាស់នាវា MT Strovolos នេះ គឺផ្ទុយពីការពិត៕
:
Tag:
ប្រេងឆៅ
MT Strovolos
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
