ជាតិ
សេដ្ឋកិច្ច
CDC អនុម័តគម្រោងបើករោងចក្រកាត់ដេរ និងរោងចក្រផលិតតង់ ដែលផ្ដល់ការងារជិត៤ពាន់កន្លែង
លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា។ រូបភាពពីហ្វេសប៊ុកក្រុមប្រឹក្សាអភិវឌ្ឍន៍កម្ពុជា
×![]()
ភ្នំពេញ៖ គណៈកម្មាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា(CDC) បានសម្រេចចេញវិញ្ញាបនបត្រចុះបញ្ជីជាស្ថាពរ ដល់ក្រុមហ៊ុនចំនួន២ ដើម្បីបង្កើតរោងចក្រផលិតតង់ សម្ភារបោះជំរំគ្រប់ប្រភេទ និងរោងចក្រកាត់ដេរសម្លៀកបំពាក់ ក្នុងខណ្ឌពោធិ៍សែនជ័យ និងខណ្ឌកំបូល រាជធានីភ្នំពេញ។ គម្រោងបង្កើតរោងចក្រទាំង ២កន្លែងនេះ មានទំហំវិនិយោគសរុប ៨,៤លានដុល្លារ និងអាចបង្កើតការងារជិត ៤ពាន់កន្លែង។
បើតាមការចុះផ្សាយលើទំព័រហ្វេសប៊ុករបស់ក្រុមប្រឹក្សាអភិវឌ្ឍន៍កម្ពុជា(CDC) ក្រុមហ៊ុន KAMOKEEPER (CAMBODIA) CO., LTD ទទួលបានការយល់ព្រម ឱ្យបង្កើតរោងចក្រផលិតតង់ និងសម្ភារបោះជំរំគ្រប់ប្រភេទ ដែលមានទីតាំងនៅភូមិស្រែជំរៅ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ ក្រុមហ៊ុននេះ មានទុនវិនិយោគប្រមាណ ៣,១លានដុល្លារ និងអាចបង្កើតការងារបានចំនួន ៧២៨កន្លែង។
ចំណែកក្រុមហ៊ុនមួយទៀត គឹក្រុមហ៊ុន SUNICON (CAMBODIA) APPAREL CO., LTD ទទួលបានការយល់ព្រមឱ្យបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគ ស្ថិតនៅភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ។ ក្រុមហ៊ុននេះ មានទុនវិនិយោគប្រមាណ ៥,៣លានដុល្លារ និងអាចបង្កើតការងារបានចំនួន ២,៩៤៤កន្លែង៕
Tag:
CDC
រោងចក្រ
កាត់ដេរ
តង់
© រក្សាសិទ្ធិដោយ thmeythmey.com
