COVID-19
ជាតិ
សង្គមជាតិ
រដ្ឋមន្ត្រីសុខាភិបាល អនុញ្ញាតឱ្យអ្នកជំងឺកូវីដ-១៩ ប្រភេទ «ដែលតា» ព្យាបាលនៅផ្ទះ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល
× ភ្នំពេញ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល អនុញ្ញាតឱ្យអ្នកជំងឺកូវីដ-១៩ ប្រភេទដែលតា (Delta) សម្រាកព្យាបាលនៅផ្ទះ។ លោក បានបញ្ជាក់ថា ការអនុញ្ញាតឱ្យអ្នកជំងឺកូវីដ-១៩ប្រភេទដែលតា ព្យាបាលនៅផ្ទះនេះ គឺដើម្បីឆ្លើយតបនឹងការវិវត្តថ្មីនៃសភាពការណ៍នៃជំងឺកូវីដ-១៩ និងការរស់នៅក្នុងបរិបទថ្មី។
អ្នកជំងឺកូវីដ-១៩ប្រភេទដែលតា ត្រូវបានរដ្ឋមន្ត្រីក្រសួងសុខាភិបាល លោក ម៉ម ប៊ុនហេង អនុញ្ញាតឱ្យសម្រាកព្យាបាលនៅផ្ទះ ដោយមានការចូលរួមយ៉ាងសកម្មភាពពីអាជ្ញាធរមូលដ្ឋាន និងពង្រឹងវិធានការសុខាភិបាល វិធានការរដ្ឋបាល ឱ្យបានហ្មត់ចត់។ នេះបើយោងតាមលិខិតរបស់លោក ម៉ម ប៊ុនហេង ផ្ញើទៅកាន់ប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ថ្នាក់រាជធានី-ខេត្ត កាលពីថ្ងៃទី៥តុលា ឆ្នាំ២០២១។
ក្រៅពីអនុញ្ញាតឱ្យអ្នកជំងឺកូវីដ-១៩ប្រភេទដែលតា ព្យាបាលនៅផ្ទះ លោក ម៉ម ប៊ុនហេង ក៏បានអនុញ្ញាតឱ្យអ្នកជំងឺប្រភេទនេះ នៅក្នុងមណ្ឌលឬមន្ទីរពេទ្យព្យាបាលជំងឺកូវីដ-១៩ ជាមួយគ្នានឹងអ្នកជំងឺកូវីដ-១៩ប្រភេទអាល់ហ្វា ដោយពុំចាំបាច់ញែកអ្នកជំងឺឡើយ។ លើសពីនេះ លោក ក៏បានអនុញ្ញាតឱ្យវិស័យសុខាភិបាលឯកជនស្របច្បាប់ទទួលព្យាបាលអ្នកជំងឺកូវីដ-១៩ប្រភេទដែលតានេះផងដែរ។
បើតាម លោក ម៉ម ប៊ុនហេង ការអនុញ្ញាតបែបនេះ គឺដើម្បីឆ្លើយតបនឹងការវិវត្តថ្មីនៃសភាពការណ៍នៃជំងឺកូវីដ-១៩ និងការរស់នៅក្នុងបរិបទថ្មី។ ប៉ុន្តែលោក បានបញ្ជាក់ថា ចំពោះអ្នកជំងឺកូវីដ-១៩ប្រភេទដែលតា ដែលកំពុងសម្រាកព្យាបាលនៅតាមមណ្ឌល ឬមន្ទីរពេទ្យព្យាបាលអ្នកជំងឺកូវីដ-១៩ លើសរយៈពេលកំណត់ក្នុងលក្ខខណ្ឌដែលបានចែង គឺត្រូវតេស្ត PCR និងទទួលបានលទ្ធផលតេស្តអវិជ្ជមាន មុននឹងអនុញ្ញាតឱ្យបញ្ចប់ការព្យាបាល៕
Tag:
កូវីដ-១៩
លោក ម៉ម ប៊ុនហេង
© រក្សាសិទ្ធិដោយ thmeythmey.com