ជាតិ
សង្គមជាតិ
ឈប់សម្រាកថ្ងៃទី១នៃបុណ្យភ្ជុំបិណ្ឌ មានភ្ញៀវទេសចរជិត១៥ម៉ឺននាក់ ដើរកម្សាន្តតាមរមណីយដ្ឋាននៅទូទាំងប្រទេស
ភ្ញៀវទេសចរ នាំគ្នាទៅកម្សន្តនៅខេត្តកែប ក្នុងថ្ងៃទីមួយនៃពិធីភ្ជុំបិណ្ឌ។ រូបថត៖ ក្រសួងទេសចរណ៍
×![]()
ភ្នំពេញ៖ ថ្ងៃឈប់សម្រាកទី១នៃពិធីបុណ្យភ្ជុំបិណ្ឌ មានភ្ញៀវទេសចរក្នុងស្រុកជិត១៥ម៉ឺននាក់ ចេញដើរកម្សាន្ត តាមរមណីយដ្ឋាននានានៅទូទាំងប្រទស ដោយនៅក្នុងនោះ ខេត្តកំពតមានភ្ញៀវទេសចរចំនួន ៣០ ៤៥៥នាក់ បានទៅលេងកម្សាន្ត។
ថ្ងៃទី៥តុលា ឆ្នាំ២០២១ ដែលជាថ្ងៃឈប់សម្រាកទី១នៃពិធីបុណ្យភ្ជុំបិណ្ឌ មានភ្ញៀវទេសចរក្នុងស្រុកចំនួន ១៤៩ ០១៣នាក់ (ជិត១៥ម៉ឺននាក់) បានដើរកម្សាន្តនៅទូទាំងប្រទេស។ ក្នុងចំណោមភ្ញៀវទេសចរទាំងនេះ គឺមាន១ ៤៦៩នាក់ ជាភ្ញៀវបរទេសផ្ទៃក្នុង។ នេះបើយោងតាមរបាយការណ៍របស់ក្រសួងទេសចរណ៍ ដោយបានបញ្ជាក់ថា តួលេខនេះ បានធ្លាក់ចុះជិត៤៥ភាគរយ ធៀបនឹងថ្ងៃទី១នៃពិធីបុណ្យភ្ជុំបិណ្ឌកាលពីឆ្នាំ២០២០។
របាយការណ៍របស់ក្រសួងទេសចរណ៍ដដែលបានបង្ហាញពីគោលដៅទេសចរណ៍សំខាន់ៗនៃពិធីបុណ្យភ្ជុំបិណ្ឌ ដែលមានភ្ញៀវទេសចរទៅទស្សនាច្រើនជាងគេ ចំនួន៦ខេត្ត។ ក្នុងនោះមាន ខេត្តកំពត មានភ្ញៀវទេសចរទៅកម្សាន្ត រហូត ៣០ ៤៥៥នាក់ (ជាង៣ម៉ឺននាក់) ខេត្តកែប ទទួលបានភ្ញៀវទេសចរ ២៦ ៨៩០នាក់ (ជាង២,៦ម៉ឺននាក់) ខេត្តព្រះសីហនុ ទទួលបានទេសចរ ១៨ ១៩៧នាក់ (ជាង១,៨ម៉ឺននាក់) ខេត្តពោធិ៍សាត់ មានភ្ញៀវទេសចរទៅកម្សាន្ត ៨ ៧០៥នាក់ (ជាង៨,៧ពាន់) ខេត្តមណ្ឌលគិរី មានភ្ញៀវទេសចរទៅមានកម្សន្ត ៧ ២៣៣នាក់ (ជាង៧ពាន់នាក់) និង សៀមរាប មានភ្ញៀវទេសចរទៅកម្សន្ត ៦ ០៨៦ នាក់ (ជាង៦ពាន់នាក់)។
បើតាមក្រសួងទេសចរណ៍ ថ្ងៃឈប់សម្រាកទី១នៃពិធីបុណ្យភ្ជុំបិណ្ឌនេះ មានពលរដ្ឋមួយចំនួនបានជ្រើសរើសដើរកម្សាន្តជារង្វង់ខ្សែទស្សនកិច្ច(សៀគ្វី) ដែលបានឆ្លងកាត់ខេត្តច្រើន។ ដូចជា នៅភាគភាគឦសាន (មណ្ឌលគិរី រតនគិរី ស្ទឹងត្រែង និងក្រចេះ ឬអាចភ្ជាប់ទៅព្រះវិហារ និងសៀមរាបជាដើម) ព្រមជាមួយគោលដៅខេត្តតំបន់ឆ្នេរសមុទ្រទាំង៤។
ក្រសួងបានរៀបរាប់ដូច្នេះថា៖«បន្ទប់ស្នាក់នៅតាមគោលដៅទេសចរណ៍សំខាន់ៗ ដូចជាមណ្ឌលគិរី កំពត និងកែបជាដើម ត្រូវបានភ្ញៀវកក់ស្ទើរពេញទាំងស្រុងរហូតដល់ចុងសប្តាហ៍។ ទន្ទឹមនឹងនេះ ភ្ញៀវទេសចរមួយចំនួនបានងាកមកជ្រើសរើសកក់កន្លែងស្នាក់នៅដែលមានផ្ទះបាយ ឬកន្លែងចម្អិនអាហារភ្ជាប់ជាមួយ ដោយសារពួកគាត់ដើរកម្សាន្តជាក្រុមគ្រួសារ និងចង់កាត់បន្ថយការជួបជុំ និងប៉ះពាល់ជាមួយភ្ញៀវដទៃ»។
ក្រសួងទេសចរណ៍ បានបន្តអះអាង ថា គ្រប់គោលដៅទេសចរណ៍ សុទ្ធតែបានអនុវត្តតាមវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា(SOP) ក្រោមការចុះពិនិត្យ អប់រំ ណែនាំ និងសម្របសម្រួលពីរដ្ឋបាលរាជធានីខេត្ត មន្ទីរទេសចរណ៍ និងអង្គភាពពាក់ព័ន្ធ៕
Tag:
ទេសចរណ៍
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
