ជាតិ
សេដ្ឋកិច្ច
លោក នាក់ ភា៖សហគមន៍មានលទ្ធភាពផ្គត់ផ្គង់«គល់ស្លឹកគ្រៃ»លើទីផ្សារ ជំនួសការនាំចូលបាន លោក នាក់ ភា ប្រធានសហគមន៍កសិកម្មមានជ័យស្នួលទ្រេត
× ភ្នំពេញ៖ សហគមន៍កសិកម្មមានជ័យស្នួលទ្រេត នៅក្នុងខេត្តបន្ទាយមានជ័យ មានសមត្ថភាពគ្រប់គ្រាន់ ក្នុងការផ្គត់ផ្គង់គល់ស្លឹកគ្រៃភ្លុកដំរី ប្រភេទសរីរាង្គ ឱ្យទីផ្សារក្នុងស្រុកបានពី៥០ ទៅ១០០តោន ក្នុងមួយថ្ងៃ។ នេះជាការលើកឡើងរបស់ លោក នាក់ ភា ជាប្រធានសហគមន៍កសិកម្មមានជ័យស្នួលទ្រេត ដោយបានបញ្ជាក់ថា លទ្ធភាពនៃការផ្គត់ផ្គង់គល់ស្លឹកគ្រៃ សរីរាង្គនេះ គឺអាចជំនួសនូវគល់ស្លឹកគ្រៃ ដែលនាំចូលពីបរទេសបាន។
ស្លឹកគ្រៃភ្លុកដំរី ដែលជាដំណាំប្រភេទសរីរាង្គរបស់សហគមន៍មានជ័យស្នួលទ្រេត ខេត្តបន្ទាយមានជ័យ កំពុងមានតម្រូវការខ្ពស់នៅលើទីផ្សារក្រៅស្រុក ដូចជា៖ នៅប្រទេសថៃ សិង្ហបុរី និងកូរ៉េខាងត្បូងជាដើម។ តែបើតាមលោក នាក់ ភា ដែលជាប្រធានសហគមន៍កសិកម្មមានជ័យស្នួលទ្រេត ការផ្គត់ផ្គង់ស្លឹក និងគល់ស្លឹកគ្រៃនៅលើទីផ្សារបរទេសកន្លងមក គឺមែនមិនជាគោលដៅអាទិភាពរបស់សហគមន៍ឡើយ។
«តាមពិតទៅ យើងមានគោលបំណងផ្គត់ផ្គង់ស្លឹកគ្រៃសរីរាង្គយើង នៅលើទីផ្សារនៅក្នុងស្រុក ដែលជាអាទិភាពទីមួយ ហើយការនាំចេញទៅទីផ្សារបរទេស មិនមែនជាការងារអាទិភាពទីមួយរបស់យើងទេ។ យើងអាចមានសមត្ថភាពផ្គត់ផ្គង់គ្រប់តម្រូវការក្នុងស្រុក ជំនួសឱ្យការនាំចូលបាន ឱ្យតែមានការគាំពីអ្នកប្រើប្រាស់ក្នុងស្រុក។ អាចថាមួយថ្ងៃ៥០តោន ឬ១០០តោនអី ក៏យើងអាចផ្គត់ផ្គង់បានដែរ»។ លោក នាក់ ភា អះអាងដូច្នេះប្រាប់សារព័ត៌មានThmeyThmey ។
ដ្បិតថា សហគមន៍កសិកម្មមានជ័យស្នួលទ្រេត បច្ចុប្បន្នមានសមត្ថភាពគ្រប់គ្រាន់ក្នុងការផ្គត់ផ្គង់គល់ស្លឹកគញរៃសរីរាង្គ ឱ្យទីផ្សារនៅក្នុងស្រុកក៏មិនមែន ប៉ុន្តែការប្រកួតប្រជែងតម្លៃជាមួយគល់ស្លឹកគ្រៃដែលនាំចូលពីប្រទេសវៀតណាម នៅតែជាបញ្ហាចម្បងសម្រាប់សហគមន៍។ លោក នាក់ ភា បានលើកឡើងថា ៖ « ទីផ្សារបោះដុំគល់ស្លឹកគ្រៃក្នុងស្រុក ត្រូវបានគ្រប់គ្រងទាំងស្រុង ដោយគល់គ្រៃនាំចូល ហើយគល់ស្លឹកគ្រៃដែលនាំចូលពីបរទេសនោះ គឺមានតម្លៃទាបជាងរបស់យើងទៅទៀត»។ បើតាមប្រធានសហគមន៍កសិកម្មមានជ័យស្នួលទ្រេតរូបនេះ នៅក្នុងទីផ្សារបោះដុំ គល់ស្លឹកគ្រៃនាំចូលមានតម្លៃត្រឹម ១ ០០០រៀល ទៅ១ ២០០រៀល ក្នុងមួយគីឡូក្រាម ឬមានតម្លៃក្រោមនេះ ខណៈគល់ស្លឹកគ្រៃភ្លុកដំរី មានតម្លៃ ១ ៨០០រៀល ក្នុងមួយគីឡូក្រាម។
ទោះបី គល់ស្លឹកគ្រៃភ្លុកដំរី របស់សហគមន៍កសិកម្មមានជ័យស្នួលទ្រេត មិនអាចប្រកួតប្រជែងតម្លៃបោះដុំ ជាមួយនឹងគល់ស្លឹកគ្រៃនាំចូលក៏ពិតមែន ប៉ុន្តែ លោក នាក់ ភា នៅបន្តឆន្ទៈក្នុងការផ្គត់ផ្គង់ទំនិញល្អ មានភាពគុណ និងប្រភពច្បាស់លាស់ ទៅឱ្យអ្នកប្រើប្រាស់ ឬអ្នកបរិភោគនៅក្នុងស្រុក។ បើតាមលោក នាក់ ភា សព្វថ្ងៃ សហគមន៍កំពុងរៀបចំកន្លែង ស្តុក ឬរក្សាទុកស្លឹកគ្រៃ ដើម្បីផ្គត់ផ្គង់ទីផ្សារ ឱ្យបាន២៥រាជធានី-ខេត្ត ជាពិសេសគឺផ្គត់ផ្គង់ច្រើននៅភ្នំពេញ ខេត្តសៀមរាប និងព្រះសីហនុ ដើម្បីចែកចាយដោយផ្ទាល់ដល់អ្នកប្រើប្រាស់ចុងក្រោយ។
«យើងមានផែនការលក់ស្លឹកគ្រៃ ជូនដល់អ្នកប្រើប្រាស់ចុងក្រោយនៅក្នុងស្រុកយើង ត្រឹមតម្លៃ២ ៥០០រៀលទេ ក្នុងមួយគីឡូក្រាម»។ លោក នាក់ ភា បានបញ្ជាក់ថា តម្លៃនេះ បើធៀបនឹងតម្លៃដែលអ្នកប្រើប្រាស់ទិញគល់ស្លឹកគ្រៃនាំចូល គឺទាបជាងពាក់កណ្តាល។ លោកបន្តនិយាយដូច្នេះ៖ «ទីផ្សារបោះដុំនៃគល់ស្លឹកគ្រៃនាំចូល មានតម្លៃគឺទាបជាងយើងក៏ពិតមែន តែសម្រាប់អ្នកប្រើប្រាស់ចុងក្រោយ នៅតែចំណាយខ្ពស់ដដែលក្នុងការទិញផលិតផលនេះ។ គល់ស្លឹកគ្រៃនាំចូល ដែលលក់រាយលើទីផ្សារទូទៅ មានតម្លៃយ៉ាងហោចណាស់ ៥ ០០០រៀល ក្នុងមួយគីឡូក្រាម ដោយសារឆ្លងកាត់ដំណាក់កាលនៃអាជីវករច្រើន»។
បច្ចុប្បន្ន សហគមន៍កសិកម្មមានជ័យស្នួលទ្រេត ក្រៅពីបើកចំហទីផ្សារ ជូនពលរដ្ឋក្នុងស្រុកហើយនោះ ក៏ត្រៀមធ្វើយុទ្ធនាការបន្ទាបការចំណាយ លើថ្លៃម្ហូបអាហានៃរសជាតិ ជូនដល់អ្នកប្រើប្រាស់ចុងក្រោយ ឱ្យបានពី៣០ ទៅ៥០ភាគរយដែរ។ យុទ្ធនាការនេះ គ្រោងអនុវត្តនៅអំឡុងខែធ្នូ ឆ្នាំ២០២១។ បើតាម លោក នាក់ ភា៕
Tag:
កសិកម្ម
គល់ស្លឹកគ្រៃ
បន្ទាយមានជ័យ
លោក នាក់ ភា
© រក្សាសិទ្ធិដោយ thmeythmey.com