ជាតិ
សេដ្ឋកិច្ច
លោក ប៉ាន សូរស័ក្តិ ៖ ពាណិជ្ជកម្មតាមប្រព័ន្ធអេឡិចត្រូនិក កំពុងជួយ MSMEs នៅកម្ពុជា
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។ រូបថត៖ MoC
×![]()
ភ្នំពេញ៖ ការផ្លាស់ប្តូរឌីជីថល(Digital Transformation) និងពាណិជ្ជកម្មតាមប្រព័ន្ធអេឡិចត្រូនិក (E-commerce) កំពុងជួយជំរុញផលិតភាព និងភាពប្រកួតប្រជែងរបស់សហគ្រាសមីក្រូធុនតូច និងមធ្យម (MSMEs) នៅកម្ពុជា។ នេះជាការលើកឡើងរបស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។ 
បើតាមលោក ប៉ាន សូរស័ក្តិ បច្ចុប្បន្ន រដ្ឋាភិបាលកម្ពុជា កំពុងរៀបចំ និងពង្រឹងគោលនយោបាយ ច្បាប់ លិខិតបទដ្ឋានគតិយុត្ត និងវិធានការពាក់ព័ន្ធនានាស្តីពីការពាណិជ្ជកម្មតាមប្រព័ន្ធអេឡិចត្រូនិក(E-commerce) ដើម្បីពន្លឿនការអភិវឌ្ឍវិស័យសហគ្រាសមីក្រូ ធុនតូច និងមធ្យម (MSMEs)ឱ្យបានជោគជ័យ ប្រកបដោយចីរភាព និង បរិយាបន្ន។
រដ្ឋមន្ត្រីក្រសួងពាណិជ្ជកម្មរូបនេះ បានថ្លែងនៅក្នុងសន្និសីទថ្នាក់រដ្ឋមន្ត្រីលើកទី១៥ នៃសន្និសីទសហប្រជាជាតិស្ដីពីពាណិជ្ជកម្ម និងការអភិវឌ្ឍ (UNCTAD 15) នៅទីក្រុងហ្សឺណែវ ប្រទេសស្វីស តាមប្រព័ន្ធវីដេអូ កាលពីថ្ងៃទី៨តុលា ឆ្នាំ២០២១ ដូច្នេះ៖ «ការផ្លាស់ប្តូរឌីជីថល និងពាណិជ្ជកម្មតាមប្រព័ន្ធអេឡិចត្រូនិក បាន និងកំពុងជួយជំរុញផលិតភាព និងភាពប្រកួតប្រជែងរបស់សហគ្រាសមីក្រូ ធនតូច និងមធ្យម (MSMEs) ដែលជាឆ្អឹងខ្នងសេដ្ឋកិច្ចកម្ពុជា»។
តែយ៉ាងណាមិញ ការរីកចម្រើនយ៉ាងឆាប់រហ័សនៃពាណិជ្ជកម្ម និងសេដ្ឋកិច្ចឌីជីថលនេះ ក៏បានពង្រីកគម្លាតឌីជីថលរវាងប្រទេសអភិឌ្ឍន៍ និងប្រទេសកំពុងអភិវឌ្ឍន៍។ ជាពិសេសនោះគឺប្រទេសអភិវឌ្ឍន៍តិចតួច ដូចជាកម្ពុជា ជាដើម។ ក្នុងន័យនេះ លោកប៉ាន សូរស័ក្តិ ជឿជាក់ថា តាមរយៈកិច្ចសហប្រតិបត្តិការទ្វេភាគី និងពហុភាគី ជាមួយប្រទេសជាដៃគូពាណិជ្ជកម្ម ដៃគូអភិវឌ្ឍន៍ និងអង្គការអន្តរជាតិពាក់ព័ន្ធនានា គឺមានតួនាទីសំខាន់ក្នុងការជួយគាំទ្រដល់ការអភិវឌ្ឍ និងការទទួលបានផលប្រយោជន៍ពីពាណិជ្ជកម្មឌីជីថល នឹងជួយកសាងហេដ្ឋារចនាសម្ព័ន្ធ ការផ្ទេរបច្ចេកវិទ្យា ការពង្រឹងប្រព័ន្ធច្បាប់ និងគោលនយោបាយ និងការអភិវឌ្ឍសមត្ថភាព ដើម្បីលើកកម្ពស់ភាពច្នៃប្រឌិត និងនវានុវត្តន៍របស់ប្រទេសកំពុងអភិវឌ្ឍន៍ និងប្រទេសអភិវឌ្ឍន៍តិចតួច។ នេះបើយោងតាមការចុះផ្សាយរបស់ក្រសួងពាណិជ្ជកម្ម។
លោក ប៉ាន សូរស័ក្តិ បានបន្តលើកឡើងនៅក្នុងសន្និសីទថ្នាក់រដ្ឋមន្ត្រីខាងលើ ដែលជាកិច្ចប្រជុំកំពូលរបស់អង្គការ UNCTAD ដែលធ្វើឡើងរយៈពេល៤ឆ្នាំម្ដង ដោយមានការចូលរួមពីសមាជិកអង្គការ UNCTAD ១៩៥ប្រទេស និងអង្គការអន្តរជាតិ ព្រមទាំងដៃគូមួយចំនួនទៀត ថា រដ្ឋាភិបាលកម្ពុជា បានដាក់ចេញក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣៥ ដែលនឹងរួមចំណែកយ៉ាងខ្លាំងក្នុងការស្តារ ជំរុញសន្ទុះកំណើនសេដ្ឋកិច្ចថ្មី និងលើកកម្ពស់សុខុមាលភាពសង្គម តាមគន្លងប្រក្រតីថ្មី ក្រោយពីវិបត្តិនៃការឆ្លងរាតត្បាតនូវជំងឺកូវីដ-១៩។
ជាមួយគ្នានេះ លោក ក៏បានអំពាវនាវឱ្យ UNCTAD បន្តជួយគាំទ្រដល់ប្រទេសអភិវឌ្ឍន៍តិចតួច រួមទាំងកម្ពុជា ក្នុងការពង្រឹងសមត្ថភាពផលិត ការអភិឌ្ឍសមត្ថភាពស្ថាប័ន និងធនធានមនុស្ស និងជំនាញបច្ចេកទេសផងដែរ៕
Tag:
ពាណិជ្ជកម្ម
MSMEs
លោក ប៉ាន សូរស័ក្តិ
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
