កងកម្លាំងការពារព្រំដែនគោកលេខ ៨១៩ និងនគរបាលស្រុកកំរៀង បានចុះឃាត់ពលរដ្ឋ១៣០នាក់ ក្នុងនោះមានស្រី្ត៥២នាក់ រួមទាំងកុមារ១៣នាក់។ ពួកគេ មានបំណងឆ្លងដែនខុសច្បាប់ ដើម្បីស្វែងរកការងារធ្វើនៅប្រទេសថៃ ។ ​ក្រោយពីឃាត់ខ្លួនក្រុមពលរដ្ឋទាំងនោះ សមត្ថកិច្ចបន្តស្រាវជ្រាវរកប្រភពមេខ្យល់ ដើម្បីចាត់វិធានការតាមផ្លូវច្បាប់។ 

 

កាលពីថ្ងៃទី១០ តុលា សមត្ថកិច្ចនៅខេត្តបន្ទាយមានជ័យ ក៏បានឃាត់ខ្លួនពលករខ្មែរ២០នាក់ដែរ។ សូមបញ្ជាក់ថា ចាប់តាំងពីមាន​ការរាលដាលកូវីដ-១៩ចូលក្នុងសហគមន៍ រដ្ឋាភិបាលបានចាត់វិធានការទប់ស្កាត់តាមព្រំដែន ដោយពង្រឹងការយាមល្បាតតឹងរឹង ដើម្បីកុំឲ្យមានការឆ្លងដែនខុសច្បាប់ និងរាលដាលឆ្លងកូវីដ-១៩។ 

គិតចាប់ពីខែធ្នូឆ្នាំ២០២០ មកដល់ពេលនេះ មានពលរដ្ឋ និងពលករត្រលប់ពីប្រទេសថៃវិញចំនួន ៥ម៉ឺននាក់ ។ ក្នុងនោះអាជ្ញាធរថៃ បានចាប់បញ្ជូនពលរដ្ឋខ្មែរ ឆ្លងដែនខុសច្បាប់មកវិញជាង៦ពាន់នាក់។ នេះបើតាមរបាយការណ៍ដែលសារព័ត៌មានថ្មីៗ ទទួលបានពីលោក កែវ វណ្ណថន អគ្គនាយករង និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍៕