បើតាមលោក អ៊ិត សំហេង បច្ចុប្បន្ន អគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈកំពុងអនុវត្តគម្រោងធំៗចំនួន២ ក្រោមហិរញ្ញប្បទានADB។ ក្នុងនោះ មានគម្រោងអភិវឌ្ឍវិស័យអប់រំ បណ្តុះបណ្តាលបច្ចេកទេស និងវិជ្ជាជីវៈ និងគម្រោងជំនាញសម្រាប់ការប្រកួតប្រជែង។  

 

លោក អ៊ិត សំហេង បានលើកឡើងចំពោះមុខលោកស្រី Sunniya Durrani-Jamal ដែលជារបស់ ADB ប្រចាំកម្ពុជា តាមប្រព័ន្ធអនឡាញ (Zoom) កាលពីព្រឹកថ្ងៃទី១៣តុលា ឆ្នាំ២០២១ថា គម្រោងទាំង២ខាងលើនេះ បានចូលរួមឆ្លើយតបទៅនឹងគោលនយោបាយអភិវឌ្ឍឧស្សាហកម្ម, គោលនយោបាយអភិវឌ្ឍមុខរបរ និងការងារ, គោលនយោបាយជាតិអប់រំបណ្តុះបណ្តាលបច្ចេកទេស, ផែនការយុទ្ធសាស្រ្តអភិវឌ្ឍវិស័យការងារ, ផែនការយុទ្ធសាស្រ្តសកម្មភាពការធ្វើទំនើបកម្ម ប្រព័ន្ធអប់រំបណ្តុះបណ្តាលបច្ចេកទេស និងផែនការមេសម្រាប់អភិវឌ្ឍគ្រឹះស្ថានអប់រំបណ្តុះបណ្តាល បច្ចេកទេស និងវិជ្ជាជីវៈជាដើម។ 

 

ឆ្លៀតនៅក្នុងឱកាសជួបពិភាក្សាការងារ ជាមួយ Sunniya Durrani-Jamal ដែលត្រូវផុតអាណត្តិនៅកម្ពុជានេះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈរូបនេះ បានស្នើដល់ADB ឱ្យបន្តនូវកិច្ចសហប្រតិបត្តិជាមួយកម្ពុជា លើវិស័យTVET ដែលជាមុំមួយ នៅក្នុងយុទ្ធសាស្រ្តចតុកោណ ផ្តោតលើការអភិវឌ្ឍធនធានមនុស្ស។ ចំពោះការបន្តគាំទ្រគម្រោងនានាលើវិស័យTVET នេះ  លោក អ៊ិត សំហេង ក៏បានស្នើដល់ ADB ផ្តល់ឱ្យភ្នាក់ងារអនុវត្តគម្រោង ដែលក្រសួងសាមីផ្ទាល់តែម្តង ដើម្បីងាយស្រួលក្នុងការគ្រប់គ្រង តាមដាន និងត្រួតពិនិត្យ ក៏ដូចជាប្រសិទ្ធភាព នៃការអនុវត្តគម្រោងប្រកបដោយគុណភាព។

 

ជាមួយគ្នានេះ លោកស្រី Sunniya Durrani-Jamal ព្រមទទួលយកសំណើរបស់លោក អ៊ិត សំហេង ក្នុងការសិក្សារកវិធីសាស្ត្រ និងការគាំទ្រផ្សេងៗ ដើម្បីឱ្យយុវជនងាកមកចាប់អារម្មណ៍ចុះឈ្មោះចូលរៀន ក្នុងប្រព័ន្ធTVET។ លោកស្រីបានបញ្ជាក់ថា ADB នឹងបន្តសហការជាមួយគ្នាក្រសួងការងារ ដើម្បីរៀបចំគម្រោងថ្មីៗថែមទៀត សំដៅដល់ការបណ្តុះបណ្តាលធនធានមនុស្ស តាមរយៈការបណ្តុះបណ្តាលផង ធ្វើការផង ក៏ជាដំណោះស្រាយដ៏ល្អ ក្នុងការបង្កើតកម្លាំងពលកម្មជំនាញនៅកម្ពុជា៕