ថ្ងៃទី១៦តុលានេះ លោក វេង សាខុន រួមជាលោកស្រី Kamei Haruko តំណាងអង្គការ JICA ប្រចាំកកម្ពុជា បានសម្ពោធដាក់ឱ្យប្រើប្រាស់ឃ្លាំង លានហាល និងម៉ាស៊ីនសម្រិតសម្រាំងគ្រាប់ពូជស្រូវនៅសហគមន៍កសិកម្មបាភ្នំមានជ័យ ក្នុងស្រុកបាភ្នំ ខេត្តព្រៃវែង។  បើតាមលោក វេង សាខុន​ សមិទ្ធផលនេះ គឺស្ថិតនៅគម្រោងជំរុញផលិតកម្ម និងការប្រើប្រាស់គ្រាប់ពូជស្រាវ(RSPP)ក្រោមកិច្ចព្រមព្រៀងរវាងក្រសួងកសិកម្ម ជាមួយទីភ្នាក់ងារJICA ។

 

នាឱកាសសម្ពោធនូវសមិទ្ធផលខាងលើ រដ្ឋមន្រីកសិកម្មរូបនេះ បានស្នើដល់អង្គការ JICA ឱ្យជួយផ្តល់ការបណ្តុះបណ្តាលពង្រឹងសមត្ថភាពប្រជាកសិករលើការប្រើប្រាស់បច្ចេកទេសកសិកម្មទំនើបប្រកបដោយភាពជឿនលឿន និងនវានុវត្តន៍ដែលកំពុងអនុវត្តនៅក្នុងប្រទេសជប៉ុន ដើម្បីជាបទពិសោធន៍ក្នុងការបង្កើនផលិតភាព គុណភាព និងសុវត្ថិភាពផលិតផលកសិកម្ម ប្រកបដោយភាពវៃឆ្លាត នៅកម្ពុជា។

 

សូមជម្រាបថា គម្រោងជំរុញផលិតកម្ម និងការប្រើប្រាស់គ្រាប់ពូជស្រាវ(RSPP)ក្រោមកិច្ចព្រមព្រៀងរវាងក្រសួងកសិកម្ម ជាមួយទីភ្នាក់ងារJICA ត្រូវបានបង្កើតឡើង ដើម្បីជំរុញកសិករឱ្យប្រើប្រាស់គ្រាប់ពូជស្រូវដែលមានគុណភាពល្អ និងពង្រីកសក្កានុពលផលិតកម្មស្រូវ នៅកម្ពុជា។ គម្រោងនេះ មានរយៈពេល៥ឆ្នាំ គឺចាប់ពីឆ្នាំ២០១៧ ដល់ឆ្នាំ២០២២ ដែលអនុវត្តនៅក្នុងខេត្តគោលដៅចំនួន៤ គឺខេត្តព្រៃវេង តាកែវ កំពង់ឆ្នាំង និងខេត្តបាត់ដំបង៕