រដ្ឋមន្រ្តីប្រចាំរដ្ឋ Victoria លោក Dean Andrews រំពឹងថារដ្ឋាភិបាលអូស្រ្តាលី នឹងមិនមានការលើកលែងណាមួយ ចំពោះច្បាប់វ៉ាក់សាំងសម្រាប់កីឡាក រដែលនឹងត្រូវមកប្រកួតនៅក្នុងប្រទេសអូស្រ្តាលី នាទីក្រុងមែលប៊ូន ឡើយ។ នេះជាការព្រមានពីសំណាក់លោក Andrews ទៅកាន់កីឡាករ ដែលនឹងត្រូវប្រកួតពានរង្វាន់ Grand Slam នៅខែមករាឆ្នាំ ២០២២ ខាងមុខ ។ 
 

ជុំវិញរឿងនេះលោក Andrews បាននិយាយថា«ខ្ញុំមិនគិតថា កីឡាករ ដែលត្រូវមកប្រកួតដោយមិនបានចាក់វ៉ាក់សាំងកូវីដ នឹងអាចទទួលបានទិដ្ឋាការចូលមកប្រកួតក្នុងប្រទេសបានឡើយ។ប្រភពមេរោគនៃជំងឺកូវីដ មិនបានខ្វាយខ្វល់ពីលំដាប់ថ្នាក់ពិភពលោករបស់កីឡាករវាយកូនបាល់គ្រប់រូប ឬពានរង្វាន់ Grand Slam ដែលអ្នកបានឈ្នះនោះឡើយ។ បើសិនពួកគេទទួលបានទិដ្ឋាការសម្រាប់មកប្រកួតនោះពួកគេក៏នឹងត្រូវធ្វើច​ត្តា​ឡី​ស័កប្រមាណជាជាង២សប្តាហ៍ផងដែរមុនការប្រកួតមកដល់»។ នេះបើតាមសម្តីលោក Dean Andrews រដ្ឋមន្រ្តីរដ្ឋ Victoria។
 

ទោះជាយ៉ាងនេះ ក្តីតារាវាយកូនបាល់លំដាប់លេខ១ពិភពលោក Djokovic នៅតែបង្ហាញនូវការប្រឆាំងរបស់ខ្លួន ទៅនឹងការចាក់វ៉ាក់សាំង ហើយរូបគេក៏បានបដិសេធមិនទទួលការចាក់វ៉ាក់សាំង ប្រឆាំងកូវីដ-១៩ដែរ។