COVID-19
ជាតិ
ក្រសួងសុខាភិបាល អំពាវនាវឱ្យក្រុមពលរដ្ឋដែលមានហានិភ័យខ្ពស់ ទៅចាក់វ៉ាក់សាំងកូវីដ-១៩
× គណៈកម្មការចំពោះកិច្ចចាក់វ៉ាក់សាំងកូវីដ-១៩ បានអំពាវនាវឱ្យក្រុមពលរដ្ឋដែលមានហានិភ័យខ្ពស់ រួមមានស្ត្រីមានផ្ទៃពោះ ឬបំបៅកូនដោយទឹកដោះ មនុស្សចាស់ជរា, អ្នកជាពីកូវីដ-១៩ចាប់ពី៤ខែឡើង ឬជាពីជំងឺផ្សេងៗ និងអ្នកមានជំងឺប្រចាំកាយប៉ុន្តែមានស្ថានភាពនឹងនរអាចគ្រប់គ្រងបាន ទៅចាក់វ៉ាក់សាំងបង្ការជំងឺកូវីដ-១៩។ ការអំពាវនាវនេះ ធ្វើឡើង បន្ទាប់ គ.វ.ក-១៩ សង្កេតឃើញថា អ្នកជំងឺកូវីដ-១៩ ដែលបានស្លាប់កន្លងមក ភាគច្រើនជាអ្នកដែលមិនបានចាក់វ៉ាក់សាំងកូវីដ-១៩។
ក្រៅពីក្រុមពលរដ្ឋដែលមានហានិភ័យហើយនោះ គ.វ.ក-១៩ ក៏ទទូចឱ្យពលរដ្ឋទូទៅដែលមិនទាន់ស្ម័គ្រចិត្តចាក់វ៉ាក់សាំងកូវីដ-១៩ ទៅទទួលវ៉ាក់សាំងផងដែរ។ តាមរយៈសេចក្តីជូនព័ត៌មានរបស់ខ្លួន គ.វ.ក-១៩ បានគូសបញ្ជាក់ថា ការបង្កើនភាពស៊ាំនៅក្នុងខ្លួន និងក្នុងសហគមន៍ នឹងអាចកាត់បន្ថយជាអតិបរមានូវអត្រាសម្រាកពេទ្យ និងអត្រាស្លាប់ដែលបណ្តាលមកពីកូវីដ-១៩ ស្របពេលដែលវីរុសកូវីដ-១៩ បំប្លែងថ្មីៗ កំពុងរាតត្បាតនៅលើពិភពលោក ក៏ដូចជានៅកម្ពុជា។
សូមជម្រាបថា គិតត្រឹមថ្ងៃទី១៨ តុលា កម្ពុជាបានចាក់វ៉ាក់សាំងដល់ពលរដ្ឋជាង ១៣,៦០លាននាក់ ឬស្មើនឹងជាង៨៥ភាគរយនៃចំនួនប្រជាជនសរុប ១៦លាននាក់។ ក្នុង១៣,៦០លាននាក់នោះ មានជាង១២,៧១លាននាក់ បានចាក់គ្រប់២ដូស ខណៈអ្នកដែលចាក់បាន៣ដូសមានជាង ១,៤៨លាននាក់ប៉ុណ្ណោះ។
បច្ចុប្បន្នកម្ពុជា មានអ្នកឆ្លងកូវីដ-១៩ សរុប ១១៧ ០៣៥នាក់ ក្នុងនោះអ្នកជាសះស្បើយមាន១១១ ៤២០នាក់ និងអ្នកស្លាប់មាន ២ ៦៨១នាក់៕
© រក្សាសិទ្ធិដោយ thmeythmey.com