ជាតិ
រដ្ឋមន្រ្តីកសិកម្ម៖ បុណ្យទាន និងកម្មវិធីផ្សេងៗផ្អាក ធ្វើឱ្យតម្លៃជ្រូករស់បន្តធ្លាក់ថ្លៃ
× ភ្នំពេញ៖ តម្លៃជ្រូករស់បន្តធ្លាក់ថ្លៃ ដោយសារការបិទខ្ទប់ ការផ្អាកបុណ្យទាន និងកម្មវិធីជួបជុំផ្សេងៗ ដែលធ្វើឱ្យតម្រូវការសាច់ជ្រូកមានការប្រែប្រួល។ នេះជាការលើកឡើងរបស់លោក វេង សាខុន រដ្ឋមន្រ្តីក្រសួងកសិកម្ម ដោយបន្ថែមថា ក្នុងពិធីបុណ្យភ្ជុំបិណ្ឌកន្លងទៅ កសិករមួយចំនួនបានត្រៀមបញ្ចេញជ្រូកលក់ ប៉ុន្តែពិធីបុណ្យត្រូវផ្អាក បានធ្វើឱ្យជ្រូកមានការកកស្ទះ។
កូវីដ-១៩ បានធ្វើឱ្យតម្លៃជ្រូករស់នាពេលបច្ចុប្បន្នបន្តធ្លាក់ថ្លៃ គឺមានតម្លៃពី៩៥០០រៀលទៅ ១០១០០រៀលប៉ុណ្ណោះក្នុងមួយគីឡូក្រាម ខណៈដើមឆ្នាំ២០២០ តម្លៃជ្រូករស់មានតម្លៃពី១៣០០០ រៀលទៅ ១៣៥០០ រៀលក្នុងមួយគីឡូក្រាម។ បើតាមលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ការធ្លាក់ថ្លៃនៃតម្លៃជ្រូករស់នេះ ដោយសារបញ្ហាកូវីដ-១៩។
លោក វេង សាខុន បានបញ្ជាក់លើទំព័រហ្វេសប៊ុកយ៉ាងដូច្នេះ៖ «វិបត្តិជំងឺកូវីដ-១៩ តម្រូវការសាច់ជ្រូកមានការប្រែប្រួលមិនទៀងទាត់ ដោយសារមានការបិទខ្ទប់ ពុំមានកម្មវិធីតាមបុណ្យទាន កម្មវិធីជួបជុំផ្សេងៗ ជាពិសេសពុំមានភ្ញៀវទេសចរធ្វើដំណើរកម្សាន្តតាមតំបន់រមណីយដ្ឋាននានា ក្នុងព្រះរាជាណាចក្រកម្ពុជា»។
ជាក់ស្ដែង ក្នុងឱកាសពិធីបុណ្យភ្ជុំបិណ្ឌនាពេលកន្លងទៅ កសិករចិញ្ចឹមជ្រូកមួយចំនួន បានត្រៀមបញ្ចេញជ្រូកលក់ ប៉ុន្តែពិធីបុណ្យត្រូវបានរដ្ឋាភិបាលផ្អាក បានធ្វើឱ្យជ្រូកមានការកកស្ទះ។ ជាមួយគ្នានេះ កសិដ្ឋានចិញ្ចឹមជ្រូកនៅកម្ពុជានាពេលបច្ចុប្បន្ន មានកើនឡើងចំនួន ៣៦កន្លែង ស្មើនឹង ៧,២ភាគរយ ដែលកើនពី ៥០៣កន្លែងក្នុងឆ្នាំ២០២០ ឡើងដល់ ៥៣៩កន្លែង ក្នុងឆមាសទី១ ឆ្នាំ២០២១។
ទាក់ទងនឹងតម្លៃជ្រូករស់បន្តធ្លាក់ថ្លៃនេះ រដ្ឋមន្រ្តីកសិកម្ម លើកឡើងថា មិនមែនធ្លាក់ថ្លៃតែកម្ពុជានោះទេ ពោលប្រទេសជិតខាង ដូចជាវៀតណាម ក៏មានការធ្លាក់ថ្លៃយ៉ាងគំហុកផងដែរ។ តម្លៃជ្រូករស់នៅវៀតណាម មានតម្លៃត្រឹម ៦៥០០រៀលប៉ុណ្ណោះក្នុងគីឡូក្រាម ទើបជាងតម្លៃនៅកម្ពុជា។
សត្វជ្រូក ចិញ្ចឹមដោយកសិករនៅខេត្តកំពង់ស្ពឺ។ រូបភាព៖ សែម វណ្ណា
ដើម្បីឱ្យតម្លៃជ្រូករស់មានភាពប្រសើរឡើង លោក វេង សាខុន អះអាងថា អគ្គនាយកដ្ឋានសុខភាពសត្វ និងផលិតកម្មសត្វ នឹងបន្តពិនិត្យ និងពិភាក្សារកដំណោះស្រាយអំពីបញ្ហាតម្លៃជ្រូកនេះបន្ថែមទៀត ដោយបន្តរឹតបណ្តឹងការអនុវត្តច្បាប់ ពិសេសបទល្មើសចរាចរសត្វ និងផលិតផលសត្វ។ គិតត្រឹមបំណាច់ខែកញ្ញា ឆ្នាំ២០២១ បទល្មើសចរាចរសត្វ និងផលិតផលសត្វ ពីប្រទេសជិតខាងបង្ក្រាបបានចំនួន ៥០ករណី ក្នុងនោះ បទល្មើសចលនាដឹកជញ្ជូនជ្រូករស់ចំនួន ២៣ករណី និងសាច់ជ្រូកបង្កកចំនួន ២ករណី។ សូមបញ្ជាក់ថា បច្ចុប្បន្ន ការនាំចូលជ្រូករស់ពីបរទេសមកកម្ពុជា មានត្រឹម៣០០ក្បាលប៉ុណ្ណោះក្នុងមួយថ្ងៃ៕
Tag:
កសិកម្ម
ជ្រូក
COVID-19
© រក្សាសិទ្ធិដោយ thmeythmey.com