របាយការណ៍រដ្ឋបាលខេត្តរតនគិរី នាថ្ងៃទី១៩ តុលា​ បានឱ្យដឹងថា ផលប៉ះពាល់ចេញពីឥទ្ធិពល​ព្យុះ និង​​មូសុង​និរតី​ខ្លាំង បានធ្វើឱ្យ​បណ្ដា​ខេត្តរតនគិរី មាន​ភ្លៀង​ធ្លាក់​ជា​បន្តបន្ទាប់ បង្កជាជំនន់ទឹកភ្លៀង ដែលប៉ះពាល់ស្រុក៥រួមមាន លំផាត់ តាវែង អណ្ដូងមាស កូនមុំ និងស្រុកអូរយ៉ាដាវ។ 

 

បើតាមរបាយការណ៍ដដែល ​ជំនន់ទឹកភ្លៀង បានបណ្ដាលឱ្យប៉ះពាល់ដល់ពលរដ្ឋសរុបជាង២ពាន់គ្រួសារ ដោយក្នុងនោះ មាន៧៧គ្រួសារត្រូវបានជម្លៀសទៅទីទួលមានសុវត្ថិភាព។

 

យោងតាមរបាយការណ៍ដដែល ជំនន់នេះបានធ្វើឱ្យជន់លិចផ្ទះសម្បែងប្រជាពលរដ្ឋ ៩៨២ខ្នង,សាលារៀន៥ខ្នង,វត្តអារាម ៣កន្លែង,តូបលក់អីវ៉ាន់៧៥តូប,និងរោងជាងសិប្បកម្មផ្សេងៗ​ ១៣កន្លែង។

 

ទន្ទឹមនោះផ្ទៃដីស្រែចំនួន​ ១.០៧៧ហិកតាបានលិចលង់ ខណៈគោ​ ២៤៨ក្បាល,ជ្រូក ១១៦ក្បាល,មាន់ទា១.០៦៥ក្បាល ត្រូវបានជម្លៀសទៅទីទួលមានសុវត្ថិភាព។ក្រៅពីនោះ ផ្លូវក្រាលគ្រួសក្រហមប្រវែង​ ១៥.៦០០ម៉ែត្រ,ស្ពានបេតុង១១កន្លែង, លូកាត់ផ្លូវ ១១កន្លែង​ អណ្តូងស្នប់​ ៩៣,អណ្តូងលូ ៣៦៨,បង្គន់អនាម័យ ៤៨១៕