ភ្នំពេញ៖ ពីរឆ្នាំចុងក្រោយនៃអំឡុងពេលរីករាលដាលកូវីដ-១៩ បញ្ហាដីធ្លីមិនបានថមថយឡើយ ខណៈសកម្មជនដីធ្លី ត្រូវបានចាប់ខ្លួនជាបន្តបន្ទាប់។ តែយ៉ាងណា រដ្ឋាភិបាល អះអាងថា ខ្លួនមានយន្តការដោះស្រាយបញ្ហាដីធ្លីនេះ។
របាយការណ៍លីកាដូ បានបង្ហាញថា ការរំលោភយកដីធ្លីនៅក្នុងប្រទេស មិនមានសញ្ញាថមថយនោះទេ ក្នុងរយៈពេលពីរឆ្នាំចុងក្រោយ នៃអំឡុងពេលរីករាលដាលជំងឺកូវីដ -១៩ ដែលមានប្រជាពលរដ្ឋជាង ៥.០០០ គ្រួសារ ទទួលរងផលប៉ះពាល់ ។ លើសពីនេះ ការចាប់ និងឃុំខ្លួនសមាជិកសហគមន៍ និងសកម្មជនដីធ្លី ដាក់ពន្ធនាគារ កាន់តែមានការកើនឡើង។
គិតត្រឹមខែតុលានេះ សមាជិកសហគមន៍ និងសកម្មជនដីធ្លី យ៉ាងតិចណាស់ចំនួន ២១ នាក់ត្រូវបានឃាត់ខ្លួន ហើយក្នុងនោះ ១០ នាក់ កំពុងជាប់ឃុំក្នុងពន្ធនាគារនៅឡើយ។ នេះបើតាមរបាយការណ៍របស់លីកាដូ។
ក្នុងវីដេអូជាង៣នាទីរបស់អង្គការលីកាដូស្ដីពី «ដីគឺជាជីវិត៖ ការប្រារព្ធទិវាសិទ្ធិលំនៅឋានអន្តរជាតិឆ្នាំ២០២១» ដែលចេញនៅថ្ងៃទី១៧ បានស្រង់សម្តី អ្នកស្រី ហង្ស ចិន្ដា ដែលជាអ្នកមានបញ្ហាដីធ្លីក្នុងសហគមន៍២២គ្រួសារ ក្នុងខេត្តព្រះសីហនុ បានអះអាងថា អ្នកស្រី និងពលរដ្ឋនៅក្នុងសហគមន៍ រងការគំរាមកំហែងគ្រប់រូបភាព ដោយសារបញ្ហាដីធ្លីនេះ។ អ្នកស្រី ហង្ស ចិន្ដា ដែលធ្លាប់ជាប់ឃុំខ្លួនដោយសារបញ្ហាដីធ្លីនេះ យល់ឃើញថា អាជ្ញាធរបានប្រើលេស កូវីដ-១៩ ដើម្បីធ្វើទុក្ខបុកម្នេញលើសកម្មជន ដែលចេញតវ៉ារឿងដីធ្លី។
«នៅព្រះសីហនុ យើងប្រឈមខ្លាំងនឹងទំនាស់ដីធ្លី ដែលផ្ទុះឡើងនៅអំឡុងពេលកូវីដ-១៩ ហើយជាការឆក់ឱកាសរបស់អាជ្ញាធរ មិនឲ្យពលរដ្ឋប្រមូលផ្ដុំ។ បើមានការប្រមូលផ្ដុំ លើសពី១០នាក់ គេអាចយកវិធីសាស្រ្តមួយ ទៅពិនិត្យសំណាក និងទៅចត្តាឡីស័ក»។ នេះបើតាមអ្នកស្រី ចិន្តា ដែលបានបន្ថែមថា បើពលរដ្ឋបាត់បងដីធ្លី ប្រៀបដូចជាបាត់បង់ជីវិត ។
ចំណែក លោក ស្មិន តិក នៅសហគមន៍ព្រៃឈើរតនៈរុក្ខា ខេត្តឧត្តរមានជ័យ បានសង្កត់ធ្ងន់ថា កម្ពុជាមិនមានការគោរពសិទ្ធិមនុស្សឡើយ គឺឃើញមានតែការចាប់ខ្លួនពលរដ្ឋដែលរងការរំលោភដីធ្លី។
សារព័ត៌មានថ្មីៗ មិនអាចសុំការឆ្លើយតបពីលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ ជុំវិញបញ្ហាដីធ្លីនេះបាននៅឡើយ។
ជុំវិញវិវាទដីធ្លីកន្លងមក លោក ផៃ ស៊ីផាន អ្នកនាំពាក្យរដ្ឋាភិបាល អះអាងថា រដ្ឋមានយន្តការច្រើន ក្នុងការដោះស្រាយបញ្ហាដីធ្លី ដោយយកច្បាប់ជាធំ តាមរយៈគណៈកម្មការដោះស្រាយវិវាទនៅថ្នាក់ជាតិ និងតាមស្រុក ខេត្តនានា ដែលជាសេនាធិការរបស់រដ្ឋាភិបាល។ បើតាមលោក ផៃ ស៊ីផាន រដ្ឋាភិបាល ក៏មានគណៈកម្មការចាំទទួលដោះស្រាយវិវាទ តាមរយៈទំព័រហ្វេសប៊ុកសម្ដេច ហ៊ុន សែន នាយករដ្ឋមន្រី្ត និងសម្ដេច ស ខេង រដ្ឋមន្ត្រីក្រសួងមហាផ្ទៃផងដែរ។
អ្នកនាំពាក្យរដ្ឋាភិបាលរូបនេះ សង្កត់ធ្ងន់ថា៖ «បើយើងមិនទុកចិត្តថ្នាក់លើ យើងមិនទុកចិត្តយន្តការដោះស្រាយ យើងនាំគ្នាធ្វើបាតុកម្ម បានសេចក្ដីថាមិនមែនជារឿងវិវាទដីធ្លីទេ។ គឺគ្រាន់តែយករបៀបវីរៈដីធ្លី ទៅធ្វើរឿងអ្វីផ្សេង! ក៏សូមជម្រាបជូនពលរដ្ឋ ឲ្យរៀបចំក្រដាសស្នាមឲ្យចំយន្តការ ដែលមានស្រាប់»៕