ក្រសួងធនធានទឹក និងឧតុនិយម នៅថ្ងៃទី ១៩នេះ បានជូនដំណឹងថា កម្ពុជានឹងទទួលរងឥទ្ធិពលសម្ពាធខ្ពស់ចិន រីឯភាគខាងត្បូងទទួលឥទ្ធិពលពីជ្រលងសម្ពាធទាបឥណ្ឌា។ ស្ថានភាពបែបនេះ នឹងធ្វើឱ្យអាកាសធាតុនៅកម្ពុជា មានភ្លៀងធ្លាក់ពីតិចទៅបង្គួរ រយៈពេលមួយសប្ដាហ៍ចាប់ពីថ្ងៃទី ២០-២៦ តុលា។
 

បើតាមការព្យាកររបស់ក្រសួងធនធានទឹក បណ្ដាខេត្តនៅតំបន់ទំនាបកណ្ដាល អាចនឹងមានភ្លៀង ក្នុងកម្រិតពីខ្សោយទៅបង្គួរ លាយឡំផ្គររន្ទះ។ ជាមួយគ្នានេះ នៅរាជធានីខេត្តភាគខាងក្រោម  និងមានព្រំប្រទល់ជាប់វៀតណាម អាចមានភ្លៀងធ្លាក់ច្រើនដោយអន្លើ។
 

ចំណែកឯ បណ្ដាខេត្តជាប់ជួរភ្នំដងរែក និងខ្ពង់រាបឦសាន អាចនឹងមានភ្លៀងក្នុងកម្រិតពីខ្សោយទៅមធ្យម។ រីឯ តំបន់មាត់សមុទ្រ អាចមានភ្លៀងក្នុងកម្រិតពីខ្សោយទៅមធ្យម។ 

ជាមួយគ្នានេះ ក្រសួងធនធានទឹក និងឧតុនិយម បានអំពាវនាវឱ្យពលរដ្ឋ  ត្រូវប្រុងប្រយ័ត្នជាមុន ក្នុងការពារគ្រោះថ្នាក់ ដែលអាចនឹងកើតឡើងជាយថាហេតុ ពិសេសក្នុងរដូវវស្សា៕