តើពាក្យថាបម្រើប្រទេសជាតិដោយឥតលក្ខខណ្ឌ និយាយបាន តែធ្វើមិនបាន ឬយ៉ាងណា? តើគេមិនអាចលះបង់សញ្ជាតិផ្សេង ដើម្បីបម្រើប្រជាជនខ្លួនឯងដោយឥតលក្ខខណ្ឌ ឬយ៉ាងណា?»។ សំណួរទាំងពីរនេះត្រូវបានលោក ហ៊ុន ម៉ានី សមាជិករដ្ឋសភាមណ្ឌលកំពង់ស្ពឺ ចោទឡើងនៅក្នុងការអធិប្បាយរបស់ខ្លួនទាក់ទងនឹងច្បាប់ស្ដីពីការកំណត់ឱ្យមានសញ្ជាតិតែមួយចំពោះប្រធានស្ថាប័នកំពូលទាំង៤របស់ប្រទេស។  នេះជាប្រតិកម្មលើកដំបូងរបស់លោក ហ៊ុន ម៉ានី ទៅលើសំណុំរឿងក្ដៅគគុក ដែលបានក្លាយជាប្រធានបទនៃការជជែក និងការបញ្ចេញមតិចម្រុះជាច្រើនថ្ងៃមកហើយ ចាប់តាំងពីរដ្ឋាភិបាលបានប្រកាសអំពីការសម្រេចចិត្តកំណត់ឱ្យមានសញ្ជាតិតែមួយចំពោះប្រធានស្ថាប័នក្រុមប្រឹក្សាធម្មនុញ្ញ ប្រធានព្រឹទ្ធសភា ប្រធានរដ្ឋសភា និងប្រមុខរដ្ឋាភិបាល។

នៅតាមបណ្ដាសារព័ត៌មាននានា គេឮមន្ត្រីជាន់ខ្ពស់រដ្ឋាភិបាល និងមន្ត្រីជាន់ខ្ពស់គណបក្សប្រជាជនកម្ពុជាថ្លែងការពារសេចក្តីសម្រេចចិត្តរបស់ប្រមុខរដ្ឋាភិបាល ដោយបញ្ជាក់ថាការសម្រេចយ៉ាងនេះ នឹងបង្ហាញឱ្យកាន់តែច្បាស់ថែមទៀតអំពីភាពស្មោះស្ម័គ្របម្រើប្រទេសរបស់គណបក្សប្រជាជនកម្ពុជា។ ប៉ុន្តែសាធារណជនមួយចំនួន អ្នកតាមដានសង្គមនយោបាយ និងគណបក្សនយោបាយខ្លះទៀតផងបានអធិប្បាយជាអវិជ្ជមាន មិនគាំទ្រសេចក្តីសម្រេចរបស់រដ្ឋាភិបាលនេះឡើយ។ ក្រុមចុងក្រោយនេះ ហើយជាពិសេសក្រុមអ្នកនយោបាយនៃចលនាប្រឆាំងរដ្ឋាភិបាលតែម្តង ពួកគេបានធ្វើសេចក្ដីថ្លែងការណ៍ផ្សេងៗចោទប្រកាន់រដ្ឋាភិបាលដែលដឹកនាំដោយគណបក្សប្រជាជនកម្ពុជាថា បានរឹតត្បឹតសិទ្ធិនយោបាយ។