កីឡាអន្តរជាតិ
អន្តរជាតិ
«រួមគ្នាតែមួយ» ជាអត្តន័យមេដាយអូឡាំពិក និងប៉ារ៉ាឡាំពិកក្រុងប៉េកាំងឆ្នាំ ២០២២ មេដាយប៉ារ៉ាឡាំពិកឆ្នាំ២០២២
× មេដាយកីឡាអូឡាំពិក និងប៉ារ៉ាឡាំពិកប៉េកាំងរដូវរងាឆ្នាំ ២០២២ ត្រូវបានបង្ហាញជាផ្លូវការហើយ ខណៈការប្រកួតនៅសល់១០០ថ្ងៃទៀតនឹងចូលមកដល់។ «រួមគ្នាតែមួយ» ជាអត្ថន័យដែលម្ចាស់ផ្ទះចិនដាក់ឈ្មោះឱ្យមេដាយរបស់ខ្លួន។
ចិននៅថ្ងៃទី២៦ ខែតុលា បានបង្ហាញរូបរាងមេដាយទាំងបីប្រភេទដែលខ្លួនរចនាឡើងដើម្បីផ្តល់ជូនអត្តពលិកជ័យលាភីក្នុងព្រឹត្តិការណ៍អូឡាំពិកឆ្នាំ២០២២។ និមិត្តសញ្ញាមួយត្រូវបានភ្ជាប់នៅក្នុងមេដាយ ដើម្បីឆ្លុះបញ្ចាំងពីវប្បធម៌របស់ប្រទេសម្ចាស់ផ្ទះផងដែរ។
យោងតាមគណៈកម្មាធិការអូឡាំពិក មេដាយអូឡាំពិកក្រុងប៉េកាំង មានឈ្មោះជាភាសារចិនថា «Tong Xin» ដែលមានន័យថា «រួមគ្នាតែមួយ»។ ការរចនាមេដាយ នៅតែបង្ហាញច្បាស់ពីសញ្ញាកងប្រាំអូឡាំពិកនៅចំកណ្តាល រួមជាមួយរចនាបថលំនាំក្បាច់បុរាណចិននៅជុំវិញនោះផង។ ពាក្យ «XXIV Olympic Winter Games Beijing 2022» ក៏ត្រូវបានឆ្លាក់នៅខាងមុខមេដាយផងដែរ។
នៅផ្នែកខាងក្រោយវិញ និមិត្តសញ្ញានៃព្រឹត្តិការណ៍កីឡា Beijing 2022 ស្ថិតនៅចំកណ្តាល ដោយមានឆ្លាក់ឈ្មោះជាភាសាចិនពេញថា កីឡាអូឡាំពិករដូវរងាឆ្នាំ ២០២២ ក្រុងប៉េកាំង។ នៅផ្នែកខាងក្រោយនេះ ក៏មានបង្ហាញផ្ទាំងទឹកកក ព្រិល និងលំនាំពពកដែរ។
ដោយឡែកមេដាយកីឡាប៉ារ៉ាឡាំពិករដូវរងាក៏ប្រើការរចនាស្រដៀងគ្នានឹងមេដាយអូឡាំពិកដែរ។ នៅចំកណ្តាលផ្នែកខាងមុខ ត្រូវបានឆ្លាក់សញ្ញារបស់គណៈកម្មាធិការប៉ារ៉ាឡាំពិកអន្តរជាតិ ហើយហ៊ុំព័ទ្ធដោយអក្សរឆ្លាក់ថា «Beijing 2022 Paralympic Winter Games» ជាភាសាអង់គ្លេស និងអក្សរស្ទាប (សម្រាប់អ្នកពិការភ្នែក)។
កីឡាអូឡាំពិករដូវរងាឆ្នាំ ២០២២ នឹងចាប់ផ្តើមនៅថ្ងៃទី៤ ខែកុម្ភៈ ឆ្នាំ ២០២២ ខណៈកីឡាប៉ារ៉ាឡាំពិកចាប់ផ្តើមនៅថ្ងៃទី៤ ខែមីនា ឆ្នាំ ២០២២៕
© រក្សាសិទ្ធិដោយ thmeythmey.com