កីឡាអន្តរជាតិ
អន្តរជាតិ
អត្តពលិកគ្មានវ៉ាក់សាំង នៅតែអាចចូលរួមអូឡាំពិកប៉េកាំងបាន តែត្រូវចត្តាឡីស័ក២១ថ្ងៃ
× អត្តពលិកអូឡាំពិក មន្ត្រី បុគ្គលិក និងអ្នកសារព័ត៌មានដែលទៅដល់ព្រឹត្តិការណ៍កីឡារដូវរងារក្រុងប៉េកាំងឆ្នាំ ២០២២ តម្រូវឱ្យចាក់វ៉ាក់សាំងបង្កាជំងឺកូវីដ-១៩។ អ្នកគ្មានវ៉ាក់សាំងនៅតែអាចចូលរួមបាន តែត្រូវនៅដាច់ដោយឡែករយៈពេល២១ថ្ងៃសិន ពោលគឺយូរជាងព្រឹត្តិការណ៍ ដែលមានរយៈពេលប្រកួតផ្លូវការ១៧ថ្ងៃ។ នេះបើតាមការណែនាំថ្មីរបស់គណៈកម្មាធិការអូឡាំពិកអន្តរជាតិ (IOC)។
ការធ្វើចត្តាឡីស័កក្នុងរយៈពេលដ៏យូរចំនួន៣សប្តាហ៍ សម្រាប់អ្នកមិនទាន់បានចាក់វ៉ាក់សាំង ជាវិធានការតឹងរ៉ឹងរបស់ម្ចាស់ផ្ទះចិន ដើម្បីធានាថាព្រឹត្តិការណ៍លំដាប់ពិភពលោក ដែលចាប់ផ្តើមពីថ្ងៃទី៤ ខែកុម្ភៈ ឆ្នាំ២០២២ ដំណើរការដោយរលូន ខណៈជំងឺកូវីដ-១៩ នៅតែរាតត្បាត។
លោក Colleen Wrenn ប្រធានផ្នែកដឹកជញ្ជូននៃគណៈកម្មាធិការប៉ារ៉ាឡាំពិកអន្តរជាតិអះអាងថា៖ «ស្របពេលជំងឺរាតត្បាត COVID-19 កំពុងវាយលុកជាថ្មី នោះយើងមិនអនុញ្ញាតនរណាម្នាក់ចូលរួមក្នុងព្រឹត្តិការណ៍កីឡាអូឡាំពិក និងប៉ារ៉ាឡាំពិករដូវរងាក្រុងប៉េកាំងឆ្នាំ ២០២២ អាចមានលទ្ធភាពឆ្លងបានឡើយ»។
ការធ្វើតេស្ត PCR ប្រចាំថ្ងៃក៏នឹងត្រូវធ្វើដដែលទោះអ្នកចូលរួមមានវ៉ាក់សាំង និងចត្តាឡីស័កតាមគោលការណ៍។ វិធានការទាំងអស់នេះ ត្រូវបានបង្កើតឡើងពីសំណាក់ IOC រួមជាមួយអ្នករៀបចំកីឡានេះ និងរដ្ឋាភិបាលរបស់ប្រទេសចិនផ្ទាល់តែម្តង។
លោក Juan Antonio Samaranch ប្រធានគណៈកម្មការសម្របសម្រួលកីឡាអូឡាំពិកប៉េកាំង បន្ថែមថាអ្នកចូលរួមនឹងទទួលបានបទពិសោធន៍ថ្មីខុសពីមុន ហើយពួកគេត្រូវតែគោរពតាមវិធានការរឹតបន្តឹងដែលជាមធ្យោបាយតែមួយគត់ក្នុងការរៀបកីឡានេះដោយសុវត្ថិភាពក្នុងអំឡុងពេលមានជំងឺរាតត្បាត។
ដោយឡែក អ្នកណាក៏ដោយដែលចង់ទៅលេងប្រទេសចិន អំឡុងពេលកីឡាអូឡាំពិក ត្រូវចាក់វ៉ាក់សាំងយ៉ាងហោចណាស់ ១៤ ថ្ងៃមុនពេលទៅដល់៕
Tag:
Beijing 2022
COVID-19
© រក្សាសិទ្ធិដោយ thmeythmey.com