Monchengladbach បានផ្តល់មេរៀនឈឺចាប់ឱ្យក្រុមយក្សអាល្លឺម៉ង់ Bayern Munich ជាមួយគ្រាប់បាល់សុទ្ធបញ្ចូលទីចំនួន៥គ្រាប់។ Kouadio Kone ជាអ្នកបំប៉ោងសំណាញ់ទីគ្រាប់ដំបូង មុនពេល Ramy Bensebaini និង Breel Embolo បន្ថែមម្នាក់២គ្រាប់តាមក្រោយ។ 
 

៥គ្រាប់របស់ Gladbach កើតឡើងក្នុងចំណោមឱកាសស៊ុតចំនួន៦លើកប៉ុណ្ណោះ ខណៈក្រុមភ្ញៀវ Bayern Munich គ្រប់គ្រងបាល់បានច្រើនលើសលុប តែគ្មានឱកាសសម្រេចទីសូម្បី១គ្រាប់។

 

 

បរាជ័យដ៏អាក្រក់របស់ Bayern Munich ក្នុងរយៈពេល៤៣ឆ្នាំនេះ បានធ្វើឱ្យមានការភ្ញាក់ផ្អើលយ៉ាងខ្លាំងពីសំណាក់អ្នកគាំទ្រ និងនាយកីឡារបស់ក្លិប ដ្បិតក្រុមដាក់ពេញជើងទាំងអស់។ Bayern អាម៉ាស់មុខលើកដំបូងកាលFortuna Dusseldorf ៧-១ ក្នុងក្របខណ្ឌ Bundesliga នៅឆ្នាំ១៩៧៨។
 

លោក Hasan Salihamidzic ជាអតីតកីឡាករឆ្នើម Bayern Munich និងសព្វថ្ងៃមានតួនាទីជានាយកកីឡាបានប្រាប់កាសែត ARD ថាខ្លួនពិតជាភ្ញាក់ផ្អើលនឹងលទ្ធផលនេះណាស់។ 

«នៅវគ្គទី១ Bayern Munich ធ្វើមិនបានល្អទាល់តែសោះ។ នេះជាលទ្ធផលមិនគួរឱ្យជឿង ដ្បិតកម្រិតនៃការលេងរបស់ក្រុមយើងរយៈពេលចុងក្រោយស្ទើតែដល់កំពូលទៅហើយ»។ នេះជាការបញ្ជាក់របស់ Salihamidzic អតីតខ្សែបម្រើជម្រើសជាតិបូស្នី។
 

នេះ ជាបរាជ័យធ្ងន់ធ្ងរលើកទី២ ក្នុងប្រវត្តិសាស្ត្ររបស់ក្រុមឈុតធំ Bayern ក្រោមការដឹកនាំរបស់អ្នកចាត់ការទូទៅលោក Julian Nagelsmann ដែលជាប់ធ្វើចត្តាឡីស័កក្រោយតេស្តវិជ្ជមានកូវីដ-១៩ ខណៈក្រុមយក្សអាល្លឺម៉ង់មួយនេះ ក៏ត្រូវបញ្ចប់ការរកគ្រាប់បាល់បញ្ចូលទីគូប្រជែងក្នុង ៨៥ ប្រកួតជាប់ៗគ្នារបស់ពួកគេផងដែរ៕