សម្រាប់នាយករដ្ឋមន្រ្តី ការអនុញ្ញាតឱ្យជាប់ដោយស្វ័យប្រវត្តិញឹកញាប់ពេកនេះ វានឹងធ្វើឱ្យប៉ះពាល់ដល់វិស័យអប់រំ។ «ឥឡូវឧទាហរណ៍ឱ្យជាប់ ហើយទៅប្រឡងចូលមហាវិទ្យាល័យយ៉ាងម៉េច? បើមុខវិជ្ជាថ្នាក់ទី១២ ដែលជាថ្នាក់ចុងក្រោយ ខ្លួនឯងអត់ចេះផង ហើយទៅប្រឡងចូលមហាវិទ្យាល័យយ៉ាងម៉េច? វាមិនដាច់ជន្ទុល អាហ្នឹង ដូចជាធ្វើផ្ទះបាក់សសរផ្ទះ»។ នេះជាការលើកឡើងរបស់សម្ដេច ដែលប្រាប់យុវជនបន្ថែមថា បើរៀនមិនចេះហើយ ដើម្បីតែបានសញ្ញាបត្រនោះ ក៏មិនអាចយកធ្វើអ្វីបានដែរ។
 

សិស្សប្រឡងសញ្ញាបត្រមធ្យមសិក្សាបឋមភូមិ ឬឌីប្លូម នៅតាមសាលារដ្ឋ នឹងប្រព្រឹត្តទៅនៅថ្ងៃទី១៥ ខែវិច្ឆិកា ឆ្នាំ២០២១ ។ ក្រសួងអប់រំ បានប្រគល់សិទ្ធិអំណាច និងការទទួលខុសត្រូវ ទៅគ្រឹះស្ថានមធ្យមសិក្សានីមួយៗ ឱ្យរៀបចំការប្រឡង។ ចំណែកមន្ទីរអប់រំ មានភារកិច្ចបញ្ជូនបុគ្គលិកអប់រំ នៅការិយាល័យជំនាញ ត្រួតពិនិត្យតាមមណ្ឌលប្រឡងដែរ បើសិនក្នុងករណីចាំបាច់។ ចំពោះលទ្ធផលប្រឡងវិញ នឹងប្រកាស នាថ្ងៃទី២២ ខែវិច្ឆិកា ។ 

 

សម្រាប់សិស្សសញ្ញាបត្រមធ្យមសិក្សាទុតិយសភូមិ ឬបាក់ឌុប នឹងត្រូវធ្វើឡើងនៅថ្ងៃទី០៦ ខែធ្នូ ឆ្នាំ២០២១ ដោយប្រធានមន្ទីរអប់រំ ត្រូវធ្វើសំណើរមណ្ឌលប្រឡងបាក់ឌុប ជូនរដ្ឋមន្ត្រីក្រសួងអប់រំ យុវជន និងកីឡា ដើម្បីពិនិត្យនិងសម្រេច។ នេះបើតាមក្រសួងអប់រំ។ 

 

ជាមួយគ្នានេះក្រសួងអប់រំ ក៏អនុញ្ញាតឱ្យសាលាឯកជនរៀបចំការប្រឡងឌីប្លូម និងបាក់ឌុប នៅតាមសាលារៀងៗខ្លួន។ សិស្សតាមសាលាឯកជននេះ បានប្រឡងជាបន្តបន្ទាប់ហើយ កាលពីថ្ងៃទី១១  និងថ្ងៃ២៥ តុលាកន្លងមក។ លទ្ធផលប្រឡងរបស់សិស្សតាមសាលាឯកជននេះ នឹងប្រកាសនៅថ្ងៃទី២៨-២៩ ខែធ្នូ ឆ្នាំ២០២១៕