ដោយ៖ សុង សុធាវី

 

 

ជាក្មេងកំព្រា និង​ជា​អតីត​ពលករពី​ប្រទេស​កូរ៉េ លោក ស៊ឺន សុកគា បាន​ក្លាយជា​ម្ចាស់បុរី អេស អេ លែន តាមរយៈការ​​ប្រឹង​ប្រែង និង​តស៊ូ។ ទម្រាំមកដល់ចំណុចនេះ លោក បានហ្វឹកហាត់សមត្ថភាពជាច្រើនដូចជា ទម្លាប់​អានសៀវភៅដែលបណ្តុះស្មារតីសហគ្រិន សេពគប់បុគ្គលមានគុណភាព និងរៀនសូត្រពីរៀមច្បង។ ជាមួយគ្នានេះ អតីតពលកររូបនេះ តែងស្រាវជ្រាវនូវចំណេះដឹងថ្មីៗ ដកយកបទពិសោធន៍ ចេះប្រើប្រាស់ហិរញ្ញវត្ថុ និងពង្រឹងអាជីវម្មក្នុងដៃឱ្យបានល្អក្នុងនាមជាអ្នកដឹកនាំមួយរូប។
 

​លោក សុកគា បញ្ជាក់ថា៖ «ឧបសគ្គតូចធំដែលចូលមកក្នុងជីវិតយើង វាគឺជាកែវវាស់ស្តង់នូវសមត្ថភាពយើងនោះឯង។ ការណ៍ដែលអាចជម្នះបានបញ្ហាកាន់តែធំ កាន់តែខ្លឹម នោះយើងនឹងខ្លាំងជាងបញ្ហាដូចគ្នាដែរ ហើយត្រូវធ្វើខ្លួនធំ ជាងបញ្ហាជានិច្ច»។
  

លោក ស៊ឺន សុកគា អគ្គនាយកក្រុមហ៊ុនបុរី អេស ខេ លែន..

សហគ្រិនរូបនេះ តែងតែយកការមើលងាយពីមនុស្សមួយចំនួន ចំពោះអតីតកាលរបស់លោក មក​ជំរុញ​ការងារនាពេល​បច្ចុប្បន្ន​។ ទន្ទឹមនេះ ដើម្បីក្លាយជាម្ចាស់អាជីវកម្មអចលនទ្រព្យ ដូចសព្វថ្ងៃ លោក សុកគា តែយកចិត្តទុកដាក់លើការរៀនសូត្រក្រៅសាលា រៀនពីបទពិសោធន៍ជីវិត ចំណេះជំនាញជាច្រើនដែលទាក់ទងនឹងវិស័យនេះ។ ម្ចាស់បុរីវ័យ៣០ឆ្នាំរូបនេះ រៀបរាប់​យ៉ាងដូច្នេះ៖ «ម្ចាស់អាជីវកម្មគឺជាតួឯក នៅក្នុងសាច់រឿង ដែលដើរតួនាទីយ៉ាងសំខាន់ ដើម្បីធានាឱ្យបាននូវដំណើរការរបស់ក្រុមហ៊ុន និងមានទិន្នន័យគ្រប់ផ្នែក នៅក្នុងដៃជានិច្ច។ ត្រូវរៀនពីរបៀបធ្វើទីផ្សារបែបថ្មី ដើម្បីជំរុញការលក់ឱ្យមានប្រសិទ្ធភាព ហើយការដឹកនាំ តែងតែមានត្រជាក់ មានក្តៅ ជៀសមិនរួចឡើយ»៕