ដោយ៖ សុង សុធាវី

 

លោក មៀច គង់ហ៊ុយ ស្ថាបនិក La A Seven Fresh Flowers បានសម្រេចចិត្តដំណើរការអាជីវកម្មដាំផ្កាបរទេសជាច្រើនមុខរួមមាន៖ ផ្កាលីលី ដំណក់ទឹកភ្លៀងពណ៌ស ម៉ាកាឡែតពណ៌ស្វាយ ស្មៅស ស្មៅក្រហម។ល។ ថ្លែងប្រាប់សារព័ត៌មានថ្មីៗ ក្នុងកម្មវិធី «គំនិតថ្មី» លោក មៀច គង់ហ៊ុយ បញ្ជាក់ថា ការបង្កើតអាជីវកម្មនេះ ដើម្បីបំពេញតម្រូវការទីផ្សារក្នុងស្រុក ស្របពេលមានវិបត្តិកូវីដ-១៩ នេះ ដែលទំនិញប្រភេទនេះផ្អាកការនាំចូលស្ទើរតែទាំងស្រុង។
 

ក្រោយដាំដុះបានទិន្នផល ផ្ការបស់លោក គង់ហ៊ុយ បានបញ្ចេញសម្រស់ស្រស់ស្អាត ដែលទាក់ទាញភ្ញៀវទេសចរ។ តាមរយៈការគាំទ្រពីទេសចរ លោក មៀច គង់ហ៊ុយ ក៏មានគំនិតបង្កើត និងពង្រីកជាតំបន់ទេសចរណ៍កម្សាន្ត ដែលមានហាងកាហ្វេ តូបលក់ចំណីអាហារ។ ទាក់ទងនឹងការថែទាំផ្កាឱ្យបានផលល្អ មិនមែនជារឿងងាយស្រួលនោះទេ ដោយទាមទារឱ្យយកចិត្តទុកដាក់ខ្លាំងទៅលើប្រភេទដី អាកាសធាតុ បច្ចេកទេសថែទាំ និងទីតាំងដាំដុះ។
 

បុរសសម្បុរស្រអែមរូបនេះ បញ្ជាក់ថា៖ «បច្ចុប្បន្នយើងដាំបានល្អទៅលើពូជផ្កាបរទេសជាច្រើនប្រភេទនោះ។ តែកាលពីដំបូងវាពិបាកគួរសមដែរដូចជា មិនមានបទពិសោធ អាកាសធាតុស្រុកយើងមានភ្លៀងច្រើននៅខែវស្សា។ ដូចនេះបើមិនមានបច្ចេកទេសលើករោងដាំផ្កាឱ្យមានល្អទេ វាងាយនឹងរងការខូចខាត ថែមទាំងនាំឱ្យខូចពូជផ្កាដែលបានកម្ម៉ង់មកទៀតផង និងត្រូវសិក្សាពីបច្ចេកទេសដាំ ថែទាំជារឿងចាំបាច់បំផុត»។
  

លោក មៀច គង់ហ៊ុយ ម្ចាស់ La A Seven Fresh Flowers.

ម្ចាស់មុខជំនួញដែលមានបទពិសោធ ១១ឆ្នាំរូបនេះ នឹងបន្តឆន្ទៈពង្រីកអាជីវកម្មខ្លួន ផ្តល់ភាពរីករាយ ស្រស់ស្អាត និងផ្តល់ជូននូវសេវាកម្មល្អ ទៅកាន់អ្នកគាំទ្រក្នុងប្រទេសបន្ថែមទៀត។ ជាងនេះទៅទៀត សម្រាប់អ្នកចង់បង្កើតអាជីវកម្មដាំផ្កាបរទេសនៅក្នុងស្រុក លោក គង់ហ៊ុយ រីករាយក្នុងការចែករំលែកបទពិសោធដែលមាន ប៉ុន្តែលោកមិនគាំទ្រនូវអ្វីដែលចង់ចាញ់ឈ្នះគ្នា ដោយបង្កើតអ្វីដូចគ្នា គ្មានគំនិតច្នៃប្រឌិតឡើយ៕