ថ្លែងប្រាប់សារព័ត៌មានថ្មីៗតាមទូរស័ព្ទ លោក ម៉ែន គង់ បានឲ្យដឹងថា ពួកគេទាំង៧នាក់ បានប្រើកំណាត់ឈើវាយទម្លាយជញ្ជាំងពន្ធនាគារ ដើម្បីរត់គេចខ្លួន។ លោកបញ្ជាក់ថា អ្នកទោសដែលរត់ចេញទាំងនោះ មានអ្នកជាប់ទោសមួយជីវិតម្នាក់។ ក្រៅពីនេះ មានអ្នកទោសម្នាក់ត្រូវជាប់ពន្ធនាគារ៤ឆ្នាំ ហើយអ្នកផ្សេងទៀត គឺជាប់ទោសប្រមាណ២០ឆ្នាំ។ 

 

លោកថ្លែងយ៉ាងដូច្នេះថា៖ «ករណីនេះ ពួកគេបានប្រើប្រាស់ដុំឈើធំមួយ ទម្លាយជញ្ជាំងចេញ។ ហើយបានរត់ចេញនៅពេលយប់ទៀបភ្លឺ។ ឥឡូវនេះ កម្លាំងសមត្ថកិច្ចពាក់ព័ន្ធទាំងអស់កំពុងតាមស្រាវជ្រាវ»។ 

ទន្ទឹមនឹងនេះ​ លោកសង្កត់ធ្ងន់ថា ក្រុមអ្នកទោសទាំងនោះ ប្រាកដជាបានរៀបគម្រោងទុកជាមុន។ ប៉ុន្តែ សម្រាប់នរណាខ្លះដែលជាប់ពាក់ព័ន្ធនេះ លោកសុំមិនទាន់បកស្រាយឡើយ ដោយរង់ចាំការស៊ើបអង្កេតបន្ថែម។ ករណីនេះ លោកអំពាវនាវឲ្យសាធារណជនទាំងអស់ ជួយសហការរាយការណ៍មកអាជ្ញាធរ ប្រសិនបានឃើញអ្នកទោសទាំងនោះ៕