​កម្ពុជាកំពុងរៀបចំផែនការយុទ្ធសាស្ត្រ ទាក់ទាញទេសចរជនជាតិជប៉ុន ក្នុងការបើកទេសចរណ៍វ៉ាក់សាំង។ ក្នុងជំនួបរវាងលោក ថោង ខុន រដ្ឋមន្ត្រីក្រសួងទេសចរណ៍​ និងលោក Mikami Masahiro ឯកអគ្គរាជទូតជប៉ុនប្រចាំកម្ពុជា នៅថ្ងៃទី ១០ វិច្ឆិកា រដ្ឋមន្ត្រីក្រសួងទេសចរណ៍ លើកឡើងថា កម្ពុជាពិតជាចង់ឃើញវត្តមានភ្ញៀវទេសចរជប៉ុនមកដើរកម្សាន្តនៅកម្ពុជា ពេលបើកទេសចរណ៍វ៉ាក់សាំង។
 

ជាមួយគ្នានេះ លោក ថោង ខុន ស្នើឱ្យលោក Mikami Masahiro ពិនិត្យមើលលទ្ធភាពនៃការបើកជើងហោះហើរត្រង់មកកម្ពុជាបន្ថែមទៀត ដើម្បីសម្រួលការធ្វើដំណើរសម្រាប់ទេសចរ ជាពិសេសអ្នកវិនិយោគ។ បន្ថែមពីនេះ រដ្ឋមន្ត្រីក្រសួងទេសចរណ៍ ចង់ឱ្យជប៉ុន គាំទ្រក្នុងការអភិវឌ្ឍផលិតផលទេសចរណ៍ ក្នុងសហគមន៍ និងអេកូទេសចរណ៍ ក៏ដូចជាកសិ-ទេសចរណ៍។

ក្រសួងទេសចរណ៍កម្ពុជា ក៏ចង់ឱ្យមានការបណ្ដុះបណ្ដាល និងគាំទ្រពីប្រទេសជប៉ុន ពាក់ព័ន្ធការរៀបចំទេសចរណ៍ផ្ទះទី២ ដែលផ្ដល់ភាពកក់ក្ដៅដល់ភ្ញៀវទេសចរ។ តាមរយៈការជួបពិភាក្សានេះ លោក ថោង ខុន រំពឹងថាទេសចរជនជាតិជប៉ុន នឹងមកកម្សាន្តកម្ពុជាច្រើន​ក្នុងគម្រោងទេសចរណ៍វ៉ាក់សាំង៕