ជាតិ
អាជ្ញាធរខេត្តព្រះសីហនុ នឹងចុះពិនិត្យរោងម៉ាស៊ីន និងសិប្បកម្មកែច្នៃឈើក្នុងតំបន់ការពារ នៅសប្ដាហ៍ក្រោយ
× ភ្នំពេញ៖ នៅសប្ដាហ៍ក្រោយ អាជ្ញាធរនឹងចុះត្រួតពិនិត្យរោងម៉ាស៊ីន រោងសន្និធិ និងរោងសិប្បកម្មកែច្នៃឈើចំនួន ២០កន្លែង នៅក្នុង និងក្បែរតំបន់ការពារធម្មជាតិក្នុងក្រុង-ស្រុក៣ នៃខេត្តព្រះសីហនុ។ បើតាមលោក ឡុង ឌីម៉ង់ អភិបាលរងខេត្តព្រះសីហនុ សកម្មភាពនេះ ធ្វើឡើងក្នុងគោលបំណងការពារ និងអភិរក្សព្រៃ ក្នុងតំបន់កាពារនៃខេត្តព្រះសីហនុ។
លោក ឡុង ឌីម៉ង់ អភិបាលរងខេត្តព្រះសីហនុ បានប្រាប់សារព័ត៌មានថ្មីៗ២៥តាមទូរសព្ទថា កន្លងមកក្រសួងបរិស្ថាន បានចុះពិនិត្យឃើញថាស្រុកស្ទឹងហាវ ស្រុកព្រៃនប់ និងក្រុងព្រះសីហនុ មានរោងម៉ាស៊ីន និងសិប្បកម្មកែច្នៃឈើចំនួន ២០កន្លែង ដែលកំពុងបើកអាជីវកម្ម ក្នុង និងក្បែរតំបន់ការពារនៃខេត្តព្រះសីហនុ។ ក្រោយឃើញសកម្មភាពបែបនេះ ក្រសួងបរិស្ថាន បានជូនដំណឹងមករដ្ឋបាលខេត្ត ដើម្បីចូលរួមជួយដោះស្រាយ។
កាលពីថ្ងៃទី១០ វិច្ឆិកា លោក ឡុង ឌីម៉ង់ អភិបាលរងខេត្តព្រះសីហនុ បានដឹកនាំកិច្ចប្រជុំលើការត្រៀមចុះបញ្ឈប់ទីតាំងរោងម៉ាស៊ីន រោងសន្និធិ និងរោងសិប្បកម្មកែច្នៃឈើគ្មានច្បាប់អនុញ្ញាត នៅក្នុង និងក្បែរតំបន់ការពារ។ ក្នុងបទសម្ភាសជាមួយសារព័ត៌មានថ្មីៗ២៥តាមទូរសព្ទ លោក ឡុង ឌីម៉ង់ បញ្ជាក់ថា៖ «មុនពេលប្រជុំមានក្រុមការងារចាំត្រួតពិនិត្យតាមទីតាំងមួយចំនួន ហើយក៏មានកន្លែងខ្លះបានជួយសហការបង្ហាញនូវឯកសារ ហើយក៏មានកន្លែងខ្លះមិនបានចូលរួមទេ។ ក្រុមការងារបានប្រជុំកាលពីម្សិលមិញហើយថា ដេប៉ូ ឬក៏រោងសិប្បកម្មត្រូវមានអ្វីខ្លះ ដើម្បីអាចបន្តដំណើរការអាជីវកម្មនៅក្នុងតំបន់ទាំងបីនោះ»។
បើតាមអភិបាលរងខេត្តរូបនេះ ចំពោះទីតាំងអាជីវកម្មទាំង២០ក្នុងតំបន់ទាំងបីខាងលើ អាជ្ញាធរមិនទាន់អាចបញ្ជាក់បាននៅឡើយទេថាមានប៉ុន្មានដែលមានច្បាប់ ឬគ្មានច្បាប់បើកអាជីវកម្ម។ លោក ឡុង ឌីម៉ង់ បន្តថា ដំណើរការនៃការចុះត្រួតពិនិត្យតាមទីតាំងអាជីវកម្មនេះ អាចនឹងដំណើរការឱ្យកាន់តែលឿនកាន់តែប្រសើរ។
«យើងកំពុងរៀបចំក្រុមការងារ យើងសង្ឃឹមថានឹ ងអាចចុះឱ្យបានលឿន អាចក្នុងសប្ដាហ៍ក្រោយទៅបាន។ ប្រសិនបើយើងចុះត្រួតពិនិត្យ ហើយទៅតាំងទាំងនោះមិនមានឯកសារគ្រប់តាមការកំណត់ ក្រុមការងារនឹងបញ្ជូនសំណើទៅអភិបាលខេត្ត ដើម្បីបិទអាជីវកម្មតែម្ដង»។ នេះជាការពន្យល់បន្ថែមរបស់លោក ឡុង ឌីម៉ង់ ដោយលោកបន្តថា ជាគោលដៅធំបំផុត គឺចង់ការពារ និងអភិរក្សតំបន់ក្នុងខេត្តព្រះសីហនុ។
សកម្មភាពខាងលើនេះ ក្រសួងបរិស្ថាន រដ្ឋបាលព្រៃឈើ និងរដ្ឋបាលខេត្តព្រះសីហនុ មានគោលបំណងបញ្ឈប់អាជីវកម្មដែលគ្មានច្បាប់អនុញ្ញាត និងដើម្បីត្រួតពិនិត្យកុំឱ្យមានជនខិលខូចឆ្លៀតឱកាសទាញផលប្រយោជន៍ពីតំបន់ការពារ៕
Tag:
ក្រសួងបរិស្ថាន
ខេត្តព្រះសីហនុ
រោងសិប្បកម្ម
© រក្សាសិទ្ធិដោយ thmeythmey.com