ជាតិ
សិល្បះ
ល្ខោនសៀកកម្ពុជាហ្វារ រៀបចំការសម្ដែងជាថ្មី ដើម្បីអបអរបុណ្យអុំទូក ការសម្ដែងរបស់សិល្បករ នៃសហគ្រាសសង្គមហ្វារ កាលពីពេលកន្លងទៅ
× ភ្នំពេញ៖ ល្ខោនសៀកកម្ពុជាហ្វារ នឹងបើកការសម្ដែងជាថ្មី អមដោយកម្មវិធីសិល្បៈពិសេសៗ រយៈពេល៣ថ្ងៃ ចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០២១ ដើម្បីអបអរព្រះរាជពិធីបុណ្យអុំទូក និងស្វាគមន៍សិល្បករ មកសម្ដែងលើឆាកម្ដងទៀត។ កម្មវិធីនឹងបើកឱ្យទស្សនិកជនចូលរួម ដោយឥតគិតថ្លៃចាប់ពីម៉ោង៤ល្ងាច ដល់ម៉ោង៨យប់ តែទស្សនិកជន ត្រូវបង្ហាញកាតចាក់វ៉ាក់សាំងរួចរាល់។
ល្ខោនសៀកកម្ពុជាហ្វារ នឹងរៀបចំការប្រគំតន្ត្រីផ្ទាល់បែបទសវត្សរ៍ឆ្នាំ៦០ ដោយក្រុម B-BAND និងមានការរៀនរាំ ក្បាច់រាំវង់ រាំក្បាច់ ឡាំលាវ ឆាឆាឆា និងម៉ាឌីហ្សូនបែបកម្ពុជាជំនាន់ឆ្នាំ៦០ ជាមួយក្រុមនេះផងដែរ។ ការរៀនភ្លេង និងរបាំជាមួយក្រុមមេធា និងរៀនសៀកជាមួយសិល្បករហ្វារ។ ការស្លៀកពាក់ និងតុបតែងខ្លួន ក្នុងឈុតបុរាណ ការថតរូបស្អាតៗ។ ក៏មានដែរ ការលក់ម្ហូបអាហារបែបតាមដងវិធី(Street Food)ដ៏ឈ្ងុយឆ្ងាញ់ ដែលរៀបចំដោយក្រុមចុងភៅចំណានៗ ពីក្រុមចុងភៅតាមដងវិថី។
ការសម្ដែងល្ខោនសៀកសហសម័យរបស់សិល្បករ នៃសហគ្រាសសង្គមហ្វារ កាលពីពេលកន្លងទៅ
កម្មវិធីសិល្បៈទាំងនេះ នឹងបើកឱ្យចូលទស្សនាដោយឥតគិតថ្លៃ ដោយចាប់ផ្តើមពីម៉ោង៤ល្ងាច ដល់ម៉ោង៨យប់ លើកលែងតែការសម្ដែងរបស់ក្រុមស្គរនារីកម្ពុជា ដែលមានតែមួយគត់នៅកម្ពុជា និងទស្សនីយភាព «ការត្រឡប់មកវិញនៃល្ខោនសៀកកម្ពុជាហ្វារ» ចាប់ពីម៉ោង៨យប់ ដល់ម៉ោង៩យប់ ដែលតម្រូវឱ្យទិញសំបុត្រ។ ថ្លៃសំបុត្រ១០ដុល្លារ សម្រាប់មនុស្សពេញវ័យ និងតម្លៃ២០ដុល្លារសម្រាប់កៅអីខាងមុខ និងកៅអីនៅចំកណ្ដាល។ ចំពោះកុមារក្រោមអាយុ១២ឆ្នាំ មិនតម្រូវឱ្យទិញសំបុត្រឡើយ។
លោក ហួត តារា នាយកប្រតិបត្តិសហគ្រាសសង្គមហ្វារ បានប្រាប់សារព័ត៌មានថ្មីៗថា គោលបំណងនៃការរៀបចំកម្មវិធីនេះ គឺដើម្បីអបអរដល់ព្រះរាជពិធីបុណ្យអុំទូក និងស្វាគមន៍សិល្បករមកសម្ដែងលើឆាកម្ដងទៀត។ លោក ហួត តារា បញ្ជាក់បន្ថែមដូច្នេះ៖«យើងសូមលើកទឹកចិត្តប្រជាជនកម្ពុជា ចូលរួមកម្មវិធីទាំងមូល គឺទាំងកម្មវិធីឥតគិតថ្លៃ និងកម្មវិធីទិញសំបុត្រ ព្រោះជាបទពិសោធន៍ដ៏សប្បាយរីករាយ ព្រមទាំងអាចគាំទ្រដល់សិល្បករយើងត្រឡប់មកលើឆាកវិញ»៕
ក្រុមស្គរនារី ដែលមានតែមួយគត់នៅកម្ពុជា(សម្ដែងកាលពីពេលកន្លងទៅ
Tag:
សៀក
សម្ដែង
អុំទូក
ព្រះរាជពិធីបុណ្យអុំទូក
សហគ្រាសហ្វារ
របាំ
© រក្សាសិទ្ធិដោយ thmeythmey.com