បន្ទាប់ពីរដ្ឋាភិបាលបានប្រកាសឱ្យឈប់សម្រាកក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក រយៈពេល៣ថ្ងៃ ពលរដ្ឋជាច្រើនបាននាំគ្នាធ្វើដំណើរកម្សាន្តនៅតាមបណ្ដារាជធានី-ខេត្តនានា។ ក្រសួងទេសចរណ៍បានបង្ហាញស្ថិតិបានឲ្យដឹងថា ថ្ងៃទី២ នៃពិធីបុណ្យអុំទូក មានទេសចរដើរកម្សាន្តក្នុងប្រទេសសរុបជាង៣៣ម៉ឺននាក់ ក្នុងនោះមានទេសចរអន្តរជាតិជាង៤,៤ពាន់នាក់។ ចំនួននេះកើនឡើង ១៥២ភាគរយ បើធៀបនឹងថ្ងៃទី១ ដែលមានទេសចរសរុបជាង ១៣ម៉ឺននាក់។ រយៈពេល២ថ្ងៃនៃពិធីបុណ្យអុំទូក មានទេសចរដើរកម្សាន្តទូទាំងប្រទេសសរុបចំនួន៤៦ម៉ឺននាក់។ 
  

បើតាមរបាយការណ៍ដដែល រាជធានីភ្នំពេញមានទេសចរទៅកម្សាន្តច្រើនជាងគេ គឺជាង៦,៦ម៉ឺននាក់ និងខេត្តសៀមរាបជាប់ចំណាត់ថ្នាក់លេខ២ មានជាង៤,៧ម៉ឺននាក់ ខណៈខេត្តព្រះសីហនុឈរនៅលេខរៀងទី៣ មានភ្ញៀវទេសចរជាង៤,៤ម៉ឺននាក់។ ខេត្តកែប បានទទួលភ្ញៀវទេសចរចំនួនជិត៣ម៉ឺននាក់ ស្ថិតក្នុងចំណាត់ថ្នាក់លេខ៤។ ដោយឡែក  ខេត្តពោធិ៍សាត់ មានភ្ញៀវទេសចរជាង២,១ម៉ឺននាក់ និង ខេត្តបាត់ដំបង មានជាង១,១ម៉ឺននាក់។ ចំណែក ខេត្តមណ្ឌលគិរី មានទេសចរជាង១ម៉ឺននាក់ ប្រហាក់ប្រហែលនឹង ខេត្តរតនគិរី ដែលមានទេសចរជាងម៉ឺននាក់ដែរ
  

លោក ថោង ខុន រដ្ឋមន្រ្តីក្រសួងទេសចរណ៍ លើកឡើងថា៖«ការចល័តរបស់ភ្ញៀវទេសចរពីខេត្តមួយទៅខេត្តមួយ នៅតែមានសន្ទុះខ្លាំងរហូតដល់ចុងសប្តាហ៍ ស្របពេលការកក់សណ្ឋាគារនៅតាមគោលដៅសំខាន់ៗដូចជា ខេត្តព្រះសីហនុ កែប កំពត សៀមរាប មណ្ឌលគិរី និង រតនគិរី គឺនៅតែមានកម្រិតខ្ពស់ គឺស្ថិតនៅចន្លោះពី ៨០ទៅ៩០ភាគរយ»។
 

ចំពោះបញ្ហាប្រឈមនានា នៅថ្ងៃឈប់សម្រាករយៈពេល២ថ្ងៃនៃពិធីបុណ្យអុំទូក រដ្ឋមន្រ្តីក្រសួងទេសចរណ៍បានបញ្ជាក់ថា ពុំមានបញ្ហាណាមួយកើតឡើងទេ ស្របពេលមូលដ្ឋានអាជីវកម្មទេសចរណ៍ភាគច្រើនបានខិតខំផ្តល់សេវាជូនភ្ញៀវទេសចរប្រកបដោយស្តង់ដា៕