បើតាមក្រសួងការបរទេសកូរ៉េខាងជើង ការអនុម័តរបស់ក្រុមប្រឹក្សាសិទ្ធិមនុស្ស UN ចំពោះដំណោះស្រាយសិទ្ធិមនុស្សធ្វើឡើងសំដៅទៅលើប្រទេសជាក់លាក់ណាមួយ ដែលប្រឆាំងទៅនឹងគោលបំណងរបស់ខ្លួនក្នុងការដោះស្រាយបញ្ហាសិទ្ធមនុស្សដែលផ្អែកលើភាពស្មើរគ្នា និងយុត្តិធម៌។

 

«ក្រុមប្រឹក្សាសិទ្ធិមនុស្សរបស់ UN បានក្លាយជាដំណាក់កាលមួយដែលកំណត់ប្រទេសឯករាជ្យ និងប្រទេសកំពុងអភិវឌ្ឍក្រោមស្តង់ដារលោកខាងលិចតាមតែអំពើចិត្ត»។ ក្រសួងដដែលរបស់កូរ៉េខាងជើងលើកឡើងបែបនេះនៅក្នុងសេចក្តីថ្លែងការណ៍មួយ ហើយបន្តថា អាម៉េរិក និងមហាអំណាចលោកខាងលិចផ្សេងទៀតគួរតែបញ្ឈប់ការបង្ខិតបង្ខំ និងភាពផ្តាច់ការ ហើយមកកែលម្អសិទ្ធិមនុស្សទៅតាមន័យជាក់ស្តែងវិញទៅ។

 

ជាមួយគ្នានេះផងដែរ ក្រសួងការបរទេសកូរ៉េខាងជើងទាមទារឱ្យអ្នករាយការណ៍ពិសេសអំពីស្ថានភាពសិទ្ធិមនុស្សរបស់កូរ៉េខាងជើងមកពីប្រទេសដែលមិនគោរពតាមតម្លៃ និងស្តង់ដារសិទ្ធិមនុស្សរបស់បស្ចិមប្រទេស ហើយត្រូវបានជ្រើសរើសដោយគ្មានការពិភាក្សាក្នុងចំណោមរដ្ឋជាសមាជិកក្រុមប្រឹក្សាសិទ្ធិមនុស្ស UN ។ បច្ចុប្បន្ន លោក Tomas Ojea Quintana ដែលជាមេធាវីមកពីអាហ្សង់ទីនទទួលបន្ទុកក្នុងដំណែងនេះតាំងពីឆ្នាំ២០១៦។

 

គួរបញ្ជាក់ថា សេចក្តីថ្លែងការណ៍នេះធ្វើឡើង បន្ទាប់ពីគណៈកម្មាធិការទី៣របស់មហាសន្និបាត UN នៅថ្ងៃទី១៧ ខែវិច្ឆិកា បានអនុម័តសេចក្តីសម្រេចថ្កោលទោសការរំលោភសិទ្ធិមនុស្សរបស់កូរ៉េខាងជើងជារៀងរាល់ឆ្នាំជាប់ៗគ្នាលើកទី១៧។ អង្គការសហប្រជាជាតិបានអនុម័តដំណោះស្រាយបែបនេះលើបញ្ហាសិទ្ធិមនុស្សរបស់កូរ៉េខាងជើងជារៀងរាល់ឆ្នាំចាប់តាំងពីឆ្នាំ ២០០៥មកម្ល៉េះ ហើយដំណោះស្រាយនៅឆ្នាំ២០២១នឹងត្រូវបញ្ជូនទៅកិច្ចប្រជុំពេញអង្គនៃមហាសន្និបាត UN នៅខែធ្នូ៕