ភ្នំពេញក្រោន ម្ចាស់ជើងឯកក្របខណ្ឌកំពូល និងជ័យលាភីឯកត្តជននានាប្រចាំរដូវកាលឆ្នាំ២០២១

កីឡាជាតិ

ជាតិ

ភ្នំពេញក្រោន ម្ចាស់ជើងឯកក្របខណ្ឌកំពូល និងជ័យលាភីឯកត្តជននានាប្រចាំរដូវកាលឆ្នាំ២០២១

21, Nov 2021 , 8:59 pm

រូបភាព

ដោយ៖ គឹម មករា

ជ័យជម្នះ ១-០ លើបឹងកេត បាននាំឲ្យភ្នំពេញក្រោយជាម្ចាស់ជើងឯកក្របខណ្ឌកំពូលខេមបូឌានលីគលើកទី៧ និងជាការរង់ចាំអស់រយៈ៥ឆ្នាំ។ កាលពីល្ងាចថ្ងៃសៅរ៍ ទី២០ ខែវិច្ឆិកា គណៈកម្មការប្រកួតបាល់ទាត់ជាតិកម្ពុជា (CNCC) បានរៀបចំពិធីប្រគល់ពានដល់ម្ចាស់ជើងឯក រួមទាំងប្រកាសជ័យលាភីឯកត្តជនផ្សេងទៀតផងដែរ នាកីឡដ្ឋានស្មាត អ.អេស.អិន របស់ភ្នំពេញក្រោនផ្ទាល់។

ក្នុងរដូវកាលដែលមានការផ្លាស់ប្តូររូបមន្ត និងពេលវេលាប្រកួតមួយចំនួនដោយសារកូវីដ-១៩ ភ្នំពេញក្រោន បានមានឱកាសលើកពាននៅចំពោះមុខក្រុមអ្នកគាំទ្ររបស់ខ្លួនឡើងវិញ ដោយសារតែរដ្ឋាភិបាល បន្ធូរបន្ថយ ការរឹតត្បិតការជួបជុំគ្នា។

ព្រះខ័នរាជស្វាយរៀង ក្លាយជាក្រុមរងជើងឯកពីររដូវកាលជាប់គ្នា វិសាខា បានចំណាត់ថ្នាក់លេខ៣ ណាហ្គាវើលដ៍ បានលេខ៤ រីឯបឹងកេត ទទួលបានពានរង្វាន់ក្រុមគោរពវិន័យបានល្អ (Fair Play)។

សម្រាប់ជ័យលាភីឯកត្តជន អ្នកចាំទីភ្នំពេញក្រោន សាវែង សំណាង ទទួលបានស្រោមដៃមាស ជាអ្នកចាំទីល្អជាងគេប្រចាំរដូវកាល។ ជាមួយគ្នានេះ គ្រូបង្វឹកអ៊ុយក្រែន លោក Oleg Staryinski ក្លាយជាគ្រូបង្វឹកឆ្នើមប្រចាំរដូវកាល ដោយលោកបាននាំភ្នំពេញក្រោនក្លាយជាម្ចាស់ជើងឯកសារជាថ្មីក្រោយខកខានតាំងពីឆ្នាំ២០១៥មក។

ខ្សែប្រយុទ្ធប្រេស៊ីល Marcio Marques របស់ណាហ្គាវើលដ៍ ទទួលបានស្បែកជើងមាស តាមរយៈការស៊ុតបាល់ បញ្ចូលទីចំនួន២២គ្រាប់ ក្នុងការលេងសរុប១៥៤១នាទី។ ទោះបីព្រះខ័នរាជស្វាយរៀងខកឱកាសឈ្នះជើងឯកក៏ដោយ ប៉ុន្តែខ្សែប្រយុទ្ធកាមេរូន Privat Mbarga នៅតែជាប់ជាកីឡាករល្អជាងគេប្រចាំរដូវកាល។

រីឯក្រុមអាជ្ញាកណ្តាលល្អវិញ មានលោកអាជ្ញាកណ្តាល លោក ជួប វិសាលា, ជំនួយការទី១លោក ស៊ុន ច័ន្ទភារិទ្ធ, ជំនួយការអាជ្ញាកណ្ដាលទី២ លោក ភី វិសាលា និងមន្ត្រីទី៤ លោក ជី សាមឌី។